Read Sahu Tingoýi 6 Bible Online

Tingoýi 6 - Sahu bible

Tingoýi 6

¹Pasala i'a, ngoi to oḏi'i Doba ma Ngowa[13] 'a woi'i segele ma mulaingi. Ḏua ngoi to 'isene makhluk nga ḏuata gena-ge matengo 'o kanau, “Ino!” Re ma iḏingi ma tero sa'olo detere'e.

²Ḏua ngoi to oḏi'i jarana bu-buḏo rimoi. Ma ga-gasa Tai giama 'o gu'u ngami. Re Unanga 'o pake 'o lastari ga'a Ro dawongo sababu Unanga ro 'utungu toma parangi. Nange-ne, Unanga 'o tagi parangi di'a 'o 'utungu ḏi'i.

³Gena ḏua, Doba ma Ngowa gena-ge 'a woi'i segele ma nyo-nyoimi romoḏiḏi, kara to 'isene makhluk ma nyo-nyoimi romoḏiḏi gena-ge 'i kanau, “Ino!”

⁴Gena ḏua, jarana ma lelegu 'i supu ḏi'i. Jarana gena-ge 'i ko-kolili. Ma ga-gasa 'o sanga kuasa di'a singi-ngiranga dame toma dungia nena-ne ma dara, la manusia ma'u sengene. Dadi unanga gena-ge sanga samaranga lamo'o ḇotu moi.

⁵Ḏua, Doba ma Ngowa gena-ge 'a woi'i segele ma nyo-nyoimi ro'ange, ngoi to 'isene makhluk ma nyo-nyoimi ro'ange 'i kanau, “Ino!” Ḏua ngoi to oḏi'i 'o jarana ko-kotu'u rimoi. Ma ga-gasa 'o gu'u kilo rimoi.

⁶Re ngoi to 'isene ma tero sa'olo iḏingi toma makhluk rata enanga ma sigolona. Iḏingi gena-ge ma betongo so'o ne: “Gandum ma la-la, ma ijana liter rimoi lai hali ma tero ngowa'a matengo 'ai gaji di'a munara wange moi. Re gandum ma rousu ua, ma ijana liter ro'ange hali ḏi'i ma tero ngowa'a matengo 'ai gaji di'a munara wange moi. Mada'a sijira awa ate-ate zaitun re guḏa 'anggur!”

⁷Ḏua Doba ma Ngowa 'a woi'i segele ma nyo-nyoimi rata. Re ngoi to 'isene makhluk ma nyo-nyoimi rata 'i kanau, “Ino!”

⁸Ngoi to oḏi'i jarana rimoi 'i ḇuta. Ma ga-gasa 'ai lomanga Maut, re to oḏi'i ḏi'i 'O Dungia Maut 'i tu-tuu'u. Enanga gena-ge 'i dawongo kuasa toma dungia balangu moi toma balangu rata, la enanga nga'unu sisengene ngowa'a toma parangi ma dara, toma 'orasa sawini, toma 'orasa bobaku, re haiwani nga-ngabala ya'u 'omo.

⁹Gena ḏua, Doba ma Ngowa 'a woi'i ma segele ma nyo-nyoimi romotoa. Re ngoi to oḏi'i ngowa'a manga nyawa toma jou-jou ma ngi'i ma 'aḏu. Ngowa-ngowa'a 'aḏi sisengene ananga gena-ge sababu ananga sa'olo sakisi cufala ga'a 'aḏi singadolo Ma Jou'ongu Madutu 'ai demo.

¹⁰Ananga gena-ge 'aḏi maḏigaro'o ya siduga-duga, “Ya Ma Jou'ongu Madutu ga'a kuasa, re 'ofi-'ofi re banari! Ma di'ara sa'olo moju kara Ma Jou'ongu Madutu no sijuruhakimi dungia nena-ne, re No sihukumu ananga ga'a 'aḏi sisengene ngomi?”

¹¹Ananga matengo re matengo sanga juba bu-buḏo matengo bela moi. Ḏua ananga sanga soma'a mangomasa ceka'a 'ua moju singadolo ngowa'a 'aḏi sisengene manga ḏagilomu munara re manga ioronongoḏu ngo-ngaku rimoi ma tero sa'olo ananga ḏi'i, kara ma nyo-nyoimi ri ti-tiai.

¹²Gena ḏua, ngoi to oḏi'i Doba ma Ngowa gena-ge 'a woi'i segele ma nyo-nyoimi rarama. Ḏua 'i dadi wusu lai siḏi madutu. Re wangere ma la'o 'i dadi ko-kotu'u ma tero sa'olo ḇa'a kotu'u ma kasara, re ngara 'i dadi ko-kolili ma tero sa'olo ngaunu.

¹³Re mumuḏungu matai eta'a da'u diwanga tala ma tero sa'olo ate ma sowo'o 'i la'ere nyangu matai ḏaḏolo, na'o nga'unu karawiana lai siḏi.

¹⁴Diwanga 'i iranga ma tero sa'olo ngowa'a matengo 'o lo-lolo kartasi, re kie mo-moini re pulo-pulo ma ngi'i 'i lage.

¹⁵Ḏua 'olana-'olana dungia, ngowa-ngowa'a la-lamo'o, sordado-sordado ma sae'e, ngowa-ngowa'a rema-enanga re ngowa-ngowa'a rema ḏe-ḏegoro, re ngowa'a lelegu: bae budaka, bae ngowa-ngowa'a bebasa, mo-moini gena-ge 'aḏi magogono toma aḏu'u ma dara re toma maḏi kie ma dalanga.

¹⁶Toma kie-kie re maḏi-maḏi gena-ge, ananga gena-ge 'aḏi poa'a, “Kie re maḏi 'i damunu re gogono ngomi ra Unanga 'ai momina ga'a 'o tegoro ra Ma 'Olana 'ai ḏe-ḏegoro, re Doba ma Ngowa 'ai borata!

¹⁷Sababu bahaya ma 'orasa gena-ge ri sapolo. Nange-ne Ma Jou'ongu Madutu re Doba ma Ngowa ya sijumu manga borata, re matengo i'a mai ua nga'unu 'o matahana ra Ananga manga biono!”