Read Saija San Juan 11 Bible Online

San Juan 11 - Saija bible

San Juan 11

¹Eperã, t'ɨ̃jarapatap'edaa Lázaro k'ayaa baji. Ma eperã chi ɨ̃pewẽraarã María, Marta ome Betania p'uurudepema paji.

²(T'ẽepai mãgɨ́ Mariapa k'era weeji Jesús bɨɨrɨ ɨ̃rɨ mãik'aapa Jesús bɨɨrɨ p'ooji ichi pudapa.)

³Lázaro k'ayaa bada perã, chi ɨ̃pewẽraarãpa jara pëijida Jesumaa: —Tachi Waibɨa, pɨ k'õp'ãyo k'inia Lázaro k'ayaa bɨ.

⁴Jesupa mãga ũrik'ãri, mãgaji chi k'õp'ãyoorãmaa: —Ma k'ayaapa jai-idaaru pɨjida, chok'ai p'irabaiit'ee. Iru k'ayaa bɨ eperãarãpa k'awaadamerã Tachi Ak'õre jõmaarã k'ãyaara waibɨara bɨ mãik'aapa k'awaadamerã Tachi Ak'õre Warrapa ne-inaa jõma ooi ichi Ak'õrepa oopi bɨk'a. Mãga ook'ãri, jarapataadait'ee Tachi Ak'õre t'ãri pia bapari eperãarã ome; chi Warra jida auk'a.

⁵Jesupa k'inia p'e iru bapachi Marta, María mãik'aapa Lázaro.

⁶Jesumaa jara pëijida mĩda, ichi badamãi k'ãima omé beeji.

⁷Maap'eda mãgaji chi k'õp'ãyoorãmaa: —Waya wãdáma aji, Judea eujãdee.

⁸P'anaujida: —Mamĩda Tachi Jarateepari, mak'ɨara taarã-e bɨda ajida, judiorã poro waibɨarãpa pɨ mãupa peedait'ee p'anadap'edaa. ¿Waya jãmaa wã k'inia bɨk'ã? ajida.

⁹Jesupa p'anauji: —¿Ewari doce hora ɨ̃daa nɨ̃bapari-ek'ã? aji. Eperã ãstaawa nipak'ãri, t'ĩutɨk'aa, ɨ̃daa nɨ̃bairã.

¹⁰Mamĩda eperã p'ãrik'ua ni pɨrã, t'ĩutɨpari ɨ̃daa-e bairã.

¹¹Mãga jarap'eda, Jesupa mãgaji: —Tachi k'õp'ãyo Lázaro k'ãi bɨ. Mamĩda mɨa ɨ̃rɨmat'aanait'ee.

¹²Chi k'õp'ãyoorãpa p'anaujida: —Tachi Waibɨa, iru k'ãi bɨ pɨrã, jɨpait'eeda ajida.

¹³Jesupa jara k'inia baji Lázaro jai-idaa bɨ. Mamĩda ãrapa k'awada-e p'anajida. K'ĩsiajida jĩp'a k'ãi bɨ.

¹⁴Mãpai Jesupa jĩp'a mãgaji: —Lázaro jai-idaajida aji.

¹⁵Pia bɨ mɨ naaweda wã-e paji, ma k'aurepa ɨ̃rá parãpa waapɨara ijãadait'ee perã Tachi Ak'õrede. Ɨ̃rá wãdáma aji, Lazaromaa.

¹⁶Mãpai Tomapa (ichiaba t'ɨ̃jarapatap'edaa Me-iso) apemaarãmaa mãgaji: —Wãdáma aji, iru ome, tachi peek'ooruta pɨjida. Jesude ijãapataarã chok'ai p'irabaidait'ee jai-idaaruta pɨjida

¹⁷Jesús pachek'ãri Lázaro bapatamãi, k'ãima k'ĩmari baji ɨadap'edaa.

¹⁸Jerusalendeepa Betania p'uuru perá kilometro õpee baji.

¹⁹Mamãik'aapa judiorã chok'ara cheepuru p'anajida Marta mãik'aapa María k'õp'ãyaadait'ee, ãra ɨ̃pema jai-idaa bada perã.

²⁰Martapa k'awaak'ãri Jesús cheru, wãji iru k'ĩrachuude. Mamĩda María teeda beeji.

²¹Jesús unuk'ãri, Martapa mãgaji: —Tachi Waibɨa, pɨ cheda paara, mɨ ɨ̃pema jai-idaa-e pak'ajida aji.

²²Mamĩda mɨa k'awa bɨ at'ãri pɨa iidiruta Tachi Ak'õrepa ooit'ee.

²³Jesupa mãgaji: —Pɨ ɨ̃pema p'irabaiit'eeda aji.

²⁴Martapa p'anauji: —Mɨa k'awa bɨ na p'ek'au eujã jõdaik'ãri, iru chok'ai p'irabaiit'ee mãik'aapa ɨt'aa wãit'ee.

²⁵Mãpai Jesupa mãgaji: —Mɨa piu beerã waya chok'ai p'anapiparida aji. Chi jai-idaada Ak'õre eujãde ichita chok'ai bapariit'eeda aji, mɨde ijãa bapachi perã.

²⁶Ma awara chi chok'ai bɨ jida atua-e. Ichita ɨt'ari banait'eeda aji, ijãa bapari perã. ¿Pɨa mãga ijãa bɨk'ã? aji.

²⁷Martapa mãgaji: —Ijãa bɨpɨ. Pɨta Mesías, chi na p'ek'au eujãdee cheit'ee bada eperãarã k'aripade. Pɨta Tachi Ak'õre Warra. Jesús Lázaro ɨadap'edaamãi jẽeda

²⁸Mãga jarap'eda, Marta wãji ichi ɨ̃pewẽra Mariamaa mãik'aapa k'ɨɨrɨ ik'aawa mãganaji: —Tachi Waibɨa nama bɨ. Pɨ t'ɨ̃ bɨda aji.

²⁹Mariapa mãga ũrik'ãri, isapai Jesumaa wãji.

³⁰Jesús waide pana-e baji p'uurude; at'ãri Marta ome unudamãi baji.

³¹Judiorã María ome p'anadap'edaarãpa ichi isapai uchiaru unudak'ãri, iru t'ẽe wãjida, wãit'ee jĩak'aapa jẽede Lázaro ɨadap'edaamãi.

³²Mamĩda Mariapa Jesús unuk'ãri, bedabaidachi mãik'aapa mãgaji: —Tachi Waibɨa, pɨ nama bada paara, mɨ ɨ̃pema jai-idaa-e pak'ajida aji.

³³Jesupa unuk'ãri María chi che p'anadap'edaarã ome jẽe para nɨ̃bɨ, t'ãri p'ua nɨ̃beeji.

³⁴Mãpai iidiji: —¿Sãma ɨajidama? aji. P'anaujida: —Chepáde ajida, ak'ɨde.

³⁵Jesús jẽedachi.

³⁶Mãga unudak'ãri, judiorãpa mãgajida: —¡Ak'ɨ́tɨ! ¡Mãgara Lázaro k'inia iru baji!

³⁷Mamĩda mãɨrã ũk'uruurãpa mãgajida: —Na Jesupa tau p'ãriu beerã pia unupipari. Maperã ¿Lázaro jɨpak'aji-ek'ã ajida, jai-idaanaamerã? Lázaro chok'ai p'irabaida

³⁸Lázaro piuda k'aurepa Jesús at'ãri t'ãri p'ua nɨ̃bɨde, panaji Lázaro ɨadap'edaamãi. Mãu te uria baji mãik'aapa chi t'ai jɨ̃a nɨ̃baji mãu choma bɨpa.

³⁹Mapa Jesupa mãgaji: —Jã mãu ãyaa ata bɨnadapáde aji. Mãpai Marta, chi piuda ɨ̃pewẽrapa mãgaji: —Mamĩda Tachi Waibɨa, ɨ̃rá iru k'ap'ɨa mik'ia jo nɨ̃bɨda aji, k'ãima k'ĩmari bairã ɨadap'edaa.

⁴⁰Mãpai Jesupa mãgaji: —¿Mɨa pɨmaa jaraji-ek'ã? aji. Ijãa bɨ pɨrã, Ak'õrepa ne-inaa pia ooit'ee eperãarãpa p'oyaa oodak'aa ãchi juadoopa.

⁴¹Mãpai chi mãu ãyaa ata bɨjida. Maap'eda Jesús ɨt'aa ak'ɨji mãik'aapa mãgaji: —Ak'õre, gracias mɨa chupɨria iidida ũrida perã.

⁴²K'awa bɨ mɨa iidipari chaa pɨa ũripari. Mamĩda na pedee jararu na eperãarãpa ũridamerã mãik'aapa ijãadamerã pɨa mɨ pëiji.

⁴³Mãga jarap'eda, Jesupa golpe biaji: —¡Lázaro, uchíaji jãmãik'aapa!

⁴⁴Mãpai chi jai-idaa bada uchiaji. Ichi k'ap'ɨa jõma at'ãri pɨra baji p'arupa; chi jua, jĩru paara. Ichiaba ichi poro pɨra baji p'arupa. Mapa Jesupa mãgaji: —Iru ɨa bada p'aru ẽrat'aadapáde aji. Jesús jita atadait'ee pedeeteedap'edaa

⁴⁵Jesupa ooda unudak'ãri, judiorã chok'ara María ome wã p'anadap'edaarãpa irude ijãajida.

⁴⁶Mamĩda mãɨrãdepema ũk'uru fariseorãmaa wãjida Jesupa ooda nepɨrɨde.

⁴⁷Mapa ma fariseorã p'aareerã poroorã ome t'ɨ̃ pëijida Junta Supremadepemaarã mãik'aapa mãgajida: —¿K'ãata oodait'eema? ajida. Jã eperãpa oomaa bɨ ne-inaa chok'ara eperãarãpa p'oyaa oodak'aa ãchi juadoopa.

⁴⁸Ita-aria bɨrutara, jõmaarãpa irude ijãadai. Mãgara Romadepemaarã chedayada ajida, Tachi Ak'õre te waibɨa t'eet'aade mãik'aapa tachi auk'aarã jõt'aade.

⁴⁹Judío t'ɨ̃jarapatap'edaa Caifás p'aareerã poro waibɨa paji ma añode. Ichia mãgaji: —Parãpa maarepida k'awada-e p'anɨda aji.

⁵⁰Piara bɨ eperã aba piumerã tachi p'uuru pidaarã pari, tachi p'uuru pidaarã jõmaweda piudai k'ãyaara.

⁵¹Mamĩda Caifapa mãga jara-e paji ichi k'ĩsiadoopa. Ma añode p'aareerã poro waibɨa pada perã, Tachi Ak'õrepa ne-inaa p'asait'ee bada ichimaa jarapiji. Maperãpɨ ichia jaraji Jesús piut'ee ãchi p'uuru pidaarã pari.

⁵²Mamĩda wãara ma eujãdepemaarã-it'ee aupai piu-e pait'ee paji. Ichiaba piut'ee paji eperãarã jõmaarã pari, chi Tachi Ak'õrede ijãapataadait'eerã awara-awaraa eujãde p'anapataarã pari.

⁵³Caifapa mãga jarada ewatedeepa judiorã poroorãpa pedeeteepachida Jesús peedait'ee.

⁵⁴Maperã Jesús judiorã t'ãide tau taawa nipak'aa paji naawedapemak'a. Mamãik'aapa wãji eujã pania wẽe bɨ k'ait'a, eperãarã mak'ɨara p'anadak'aa p'uurude. Mãgɨ́ p'uuru t'ɨ̃jarapachida Efraín. Mama beeji chi k'õp'ãyoorã ome.

⁵⁵Ma t'ẽepai judiorã Pascua fiesta ɨ̃rɨ pak'ãri, eperãarã chok'ara awara ãiipa chejida Jerusalendee Tachi Ak'õre Ũraa p'ãdade jara bɨk'a oodait'ee mãik'aapa pia p'anadait'ee iru k'ĩrapite.

⁵⁶Mama p'anɨde ma eperãarã Jesús jɨrɨ nipapachida mãik'aapa Tachi Ak'õre te waibɨade pedee para baji ãchi k'õp'ãyoorã ome: —¿K'ãata k'ĩsia p'anɨma? ajida. ¿Iru cheipaa na fiestade wa mãga-e?

⁵⁷Mamĩda fariseorãpa mãik'aapa p'aareerã poroorãpa Jesús jita atapi k'inia p'anapachida. Mapa jarajida apidaapa Jesús unuruta pɨrã, ãchimaa jara chedamerã.