Read Saija Romanos 10 Bible Online

Romanos 10 - Saija bible

Romanos 10

¹Ɨ̃pemaarã Cristo k'aurepa, t'ãripa mɨa k'inia bɨ judiorãpa Cristode ijãadamerã. Ɨt'aa t'ɨ̃pari Tachi Ak'õremaa ãra chupɨria k'awaamerã, mãgá o k'achiadeepa uchiadamerã.

²Mɨchi taupa unu bɨ ãrapa Ak'õre net'aa k'awa k'inia p'anɨ. Mamĩda wãara iru k'awadak'aa.

³K'awa k'iniadak'aa Ak'õrepa Cristode ijãapataarã p'ek'au k'achia wẽe beepipari. K'ĩsiapata ne-inaa pia oo p'anɨpa Tachi Ak'õrepa ãchi pia ak'ɨit'ee. Maperã Cristode ijãa k'iniada-e.

⁴Mamĩda Cristopata ichideerã uchiapipari Tachi Ak'õre Ũraa p'ãdade jara bɨ jua ek'ariipa, oopataadamerã irua jara bɨk'a. Maperã Tachi Ak'õrepa Cristode ijãapataarã p'ek'au k'achia wẽe ak'ɨpari.

⁵Moisepa p'ãdade jara bɨ:‘Eperãpa ook'ãri jõmaweda Ak'õre Ũraade jara bɨk'a, ichita bapariit'ee ma ũraade jara bɨk'a.’ (Lv 18.5)

⁶Mamĩda p'ek'au k'achia wẽe beerã Cristode ijãa p'anɨ k'aurepa, mãgɨɨrãpa auk'a jaradai Moisepa jaradak'a Tachi Ak'õre k'awa k'inia p'anadap'edaarãmaa:‘K'ĩsianáatɨ pãchi t'ãridepai: “¿K'aita wãima Ak'õre eujãdee irua k'inia bɨ k'awaade?” ’ (Dt 30.12) (pia jarait'eera, Cristo chemerã Ak'õre eujãdeepa.)

⁷Maa-e pɨrã:‘ “¿K'aita piudap'edaarãmaa wãima Ak'õrepa k'inia bɨ k'awaade?” ’ (Dt 30.13) (pia jarait'eera, Cristo chemerã iru ɨadap'edaamãiipa.)

⁸Mãga k'ĩsiadai k'ãyaara, jaradaipia bɨ Ak'õre Ũraade jara bɨk'a:‘Nãgaweda Tachi Ak'õrepa jara pëida k'awa p'anɨ, mãgɨ́ pãchi it'aideepa jarapata perã mãik'aapa pãchi t'ãride k'awapata perã.’ (Dt 30.14) Mãgɨ́ pedee Moisepa p'ãdadepemak'a ichiaba taipa jarateepata jõmaarãmaa: t'ãripa Cristode ijãapataadamerã.

⁹Eperãpa jara bɨ pɨrã: “Jesucristo Mɨchi Waibɨa” mãik'aapa t'ãripa wãara ijãa bɨ pɨrã Tachi Ak'õrepa Cristo chok'ai p'irabaipiji, Tachi Ak'õrepa ma eperã wãpiit'ee ichi truadee.

¹⁰T'ãripa Cristode wãara ijãadak'ãri, p'ek'au k'achia wẽe p'aneepata Ak'õre k'ĩrapite. Ma awara tachi it'aideepa jaradak'ãri, “Jesucristo Mɨchi Waibɨa”, ak'ɨpipata irua tachi o k'achiadeepa k'aripa ataji.

¹¹K'irãpátɨ Ak'õre Ũraa p'ãdade ichiaba jara bɨ:‘Eperã Cristode ijãa bɨ k'ĩra pia-ee ba-e pait'ee Ak'õre k'ĩrapite.’ (Is 28.16)

¹²Mãga jara bairã k'awa p'anɨ judiorã, judio-eerã ome auk'a p'anɨ Tachi Ak'õre k'ĩrapite, Cristode ijãadak'ãri. Iruta Jõmaarã Waibɨa. Auk'a k'aripapari chi chupɨria iidirutaarã ichimaa, ãchi auk'a k'inia iru bapari perã.

¹³Maperã k'awa p'anɨ na Ak'õre Ũraa wãarata jara bɨ:‘Tachi Ak'õrepa ichimaa chupɨria iidirutaarã k'aripa atait'eeda aji, atuanaadamerã.’ (Jl 2.32)

¹⁴Mamĩda ¿sãga chupɨria iididaima, irude ijãada-e p'anɨ pɨrã? Ichiaba ¿sãga irude ijãadaima, irua ooda ãchi-it'ee ũrida-e p'anɨ pɨrã? Ma awara ¿sãga ũridaima irua ooda ãchi-it'ee, eperãpa mãga jara-e pɨrã ãchimaa?

¹⁵Mãgɨ́ eperã, ¿sãga wãima jarateede, awaraarãpa iru pëida-e p'anɨ pɨrã? Tachi Ak'õre Ũraa p'ãdade jara bɨ:‘Eperãarã o-ĩadaipata awaraarãpa pedee pia ãchimaa jara chedak'ãri.’ (Is 52.7)

¹⁶Mamĩda jõmaarãpa ũri k'iniada-e p'anɨ, Ak'õre pedee pia jara chedak'ãri. Mãga k'awa p'anɨ Tachi Ak'õre pedee jarapari Isaíapa p'ãdade jara bairã:‘Tachi Ak'õre, ¿k'aipa ijãajima aji, taipa jarateedap'edaa?’ (Is 53.1)

¹⁷Ma jõma jara aupadade k'ĩsiadak'ãri, k'awa p'anɨ eperãarãpa ũridak'ãri Cristopa ooda ãchi-it'ee, mãgapɨ irude ijãapata.

¹⁸Mãga pɨrã, ¿sãgap'eda judiorãpa ijãada-e paji? ¿Ũrida-e pajik'ã Cristopa ooda ãchi-it'ee? ¡Ũrijidapɨ! Ak'õre Ũraa p'ãdade jara bɨ:‘Tachi Ak'õrepa ooda jarateepachida jõmaarãmaa; na p'ek'au eujãdepema t'ɨmɨ́ beerãmaa paara k'awapijida irua ooda.’ (Sal 19.4)

¹⁹Mãga pɨrã, waya iidiit'ee: ¿sãgap'eda ijãada-e pajima? ¿K'awada-e pajik'ã ãchia ũridap'edaa? ¡K'awajidapɨ! Naapɨara mɨa k'irãpapi k'inia bɨ Moisepa p'ãdade jara bɨ:‘Tachi Ak'õrepa nãga jara bɨ ichi eperãarãmaa: Mɨa parã k'ĩra unuamaa iru p'anapiit'ee mɨchi eperãarã-eerãmaa, ãra mɨde ijãa k'inia p'anadairã. Ma awara parã k'ĩraupiit'ee mãgɨɨrã ome, chi parãpa k'ĩsiapata k'ĩsia k'awa-ee beerã.’ (Dt 32.21)

²⁰Ichiaba Isaíapa p'ãdade jĩp'a jara bɨ:‘Mɨ jɨrɨda-e p'anadap'edaarãpa mɨ unujida. Mɨa unupiji mɨ k'awa k'iniada-eerãmaa.’ (Is 65.1)

²¹Jõdee Israel pidaarã ãpɨte jara bɨ:‘Ichita mɨa Israel pidaarã k'aripa k'inia baji. Mamĩda ãchia oodaamaa p'anapachida mɨa jara bɨk'a, mɨde ijãa k'iniada-e p'anadap'edaa perã.’ (Is 65.2)