Read Saija Apocalipsis 5 Bible Online

Apocalipsis 5 - Saija bible

Apocalipsis 5

¹Ma rey su-ak'ɨ beeparide su-ak'ɨ bɨ jua juaraare mɨa unuji joip'aruk'a bɨ pɨrat'ɨda pedee p'ãda ome. P'ã baji taawaik'a eere, edajãde paara. Tauchaada siete tauchaa baji jɨrrɨ torrabaidapa.

²Ichiaba unuji angeleerã poro waibɨa aba. Mãgɨ́ golpe pedee baji. Iidiji: —¿K'aipata nãga k'ĩsia bɨma? “Mɨchia jã tauchaada ogat'aai mãik'aapa ewai jãgɨ́ joip'aruk'a bɨ.”

³Mamĩda apidaapa ma joip'aruk'a bɨ ewada-e pai; ɨt'aripemaarã apidaapa, na p'ek'au eujãdepemaarãpa pida mãik'aapa piudap'edaarã eujã ek'ari p'anɨɨrãpa pida.

⁴Mãpai mɨ jẽedachi apida wẽ-e pada perã ma joip'aruk'a bɨ ewadait'ee mãik'aapa ma pedee p'ãda leedait'ee.

⁵Mamĩda ma chonaarã poro waibɨarã veinticuatrodepemapa mɨmaa mãgaji: —Jẽenáaji. ¡Ak'ɨ́ji! León apata Judá ëreerãdepema; chonaarãwedapema Rey Daviddeepa uchiadapa k'achia p'oyaaji. Iruata jã tauchaada siete ogat'aai mãik'aapa jã joip'aruk'a bɨ ewat'aai.

⁶Ak'ɨk'ãri, mɨa unuji Oveja Chak'e apata eperãarãpa peedap'edaak'a. Ichi bainɨ̃ baji ma rey su-ak'ɨ beepari k'ĩrapite mãik'aapa ma ne-inaa chok'ai bɨ k'ĩmari k'ĩrapite, mãɨrã ma chonaarã poro waibɨarã veinticuatro esajĩak'a. Ichia cacho siete iru baji. Ichiaba tau siete iru baji. Ma tau siete jara k'inia bɨ Tachi Ak'õre Jaure, jaure siete pɨk'a pëida na p'ek'au eujã jõmaade.

⁷Ma Oveja Chak'e wãji ma rey su-ak'ɨ beeparide su-ak'ɨ bɨ k'ait'a mãik'aapa mãgɨ́ jua juaraareepa ataji ma joip'aruk'a bɨ pɨrat'ɨda.

⁸Mãga ook'ãri, ma ne-inaa chok'ai bɨɨrã k'ĩmari weda mãik'aapa ma chonaarã poro waibɨarã veinticuatro weda bedabaidachida iru k'ĩrapite. Ma chonaa chaachaa iru baji arpa mãik'aapa p'arat'u nẽedee ooda. Ma p'arat'u chaa ipuru baji ne-inaa bajũbak'a t'ũa bɨpa. Mãgɨ́ jara k'inia bɨ Cristodeerãpa ɨt'aa t'ɨ̃pata.

⁹Mãga nɨde ma bedabaidap'edaarã jõmaarãpa k'ari chiwidi k'arijida: —‘Pɨata ma joip'aruk'a bɨ atai mãik'aapa ma tauchaada ogat'aai, eperãarãpa pɨ peet'aadap'edaa perã. Pɨchi waa mãgá bat'ada k'aurepa eperãarã uchiapiji p'ek'au k'achia jua ek'ariipa. Mãgá Tachi Ak'õre-it'ee neto pɨk'a ataji eperãarã k'ĩra t'ãdoo nãgee chaadepema: ëreerã, pedee, p'uuru, eujã, mãgee chaadepema.

¹⁰Pɨa ãra Tachi Ak'õre jua ek'ari bɨji p'aareerãk'a irumaa ɨt'aa t'ɨ̃pataadamerã. Ichiaba pɨa ãra reyrãk'a papiit'ee na p'ek'au eujãdepemaarã ak'ɨpataadamerã.’ (Ex 19.6)

¹¹Mãpai mɨa unuji ma rey su-ak'ɨ beepari, ma ne-inaa chok'ai bɨ k'ĩmari mãik'aapa ma chonaarã poro waibɨarã angeleerãpa wap'ɨra ata p'anɨ. Audú cho-k'ara paraaji; tachia p'oyaa juasiada-e.

¹²Mãɨrãpa otau apai pɨk'a bɨde golpe pedeejida: —Oveja Chak'e peedap'edaa; irumaapaita jaradaipia bɨ: Jõmaweda pɨ jua ek'ari p'anapata, nejõmaata përé perã. Pɨ k'ĩra wãreera bɨ; jõmaarã k'ãyaara k'ĩsia k'awaara bapari; jõmaarã k'ãyaara juataura bapari; jõmaarã k'ãyaara waibɨara bɨ. Mapa pɨmaa ɨt'aa t'ɨ̃pata, awaraarãmaa ɨt'aa t'ɨ̃dai k'ãyaara.

¹³Mãpai mɨa ũriji jõma ne-inaa chok'ai p'anɨɨrã ɨt'aripema, na p'ek'au eujãdepema, na p'ek'au eujã ek'aripema mãik'aapa p'usadepema; ne-inaa jõmaweda Tachi Ak'õrepa ooda. Mãɨrãpa mãgajida: —Rey su-ak'ɨ beeparide su-ak'ɨ bɨmaa mãik'aapa Oveja Chak'emaa jõmaarãpa ichita ɨt'aa t'ɨ̃daipia bɨ mãik'aapa ichita jaradaipia bɨ parã jõmaarã k'ãyaara waibɨara bɨ, ne-inaa jõmaweda parã jua ek'ari bapari perã.

¹⁴Mãga jaradak'ãri, ma ne-inaa chok'ai bɨ k'ĩmariirãpa p'anaujida: —¡Amén! Ma awara ma chonaarã poro waibɨarã veinticuatro waya bedabaidachida ma su-ak'ɨ bɨ k'ĩrapite mãik'aapa Oveja Chak'e k'ĩrapite.