Read Salkinson-Ginsburg Hebrew New Testament 1886, 2018 (with vowels) הראשונה אל-טימותיוס 6 Bible Online

הראשונה אל-טימותיוס 6 - Salkinson-Ginsburg Hebrew New Testament 1886, 2018 (with vowels) bible

הראשונה אל-טימותיוס 6

¹הָעֲבָדִים הַנֹּשְׂאִים עֻלָּם יִתְּנוּ כָבוֹד לַאֲדֹנֵיהֶם כְּכָל־אֲשֶׁר יָאֲתָה לָּהֶם וְלֹא־יְחֻלַּל שֵׁם אֱלֹהִים וְתוֹרָתוֹ׃

²וְאֵלֶּה אֲשֶׁר גַּם־אֲדֹנֵיהֶם אַנְשֵׁי אֱמוּנָה אַל־יְחַשְּׁבוּם לְנִקְלִים בַּעֲבוּר כִּי־אַחִים הֵם כִּי אִם־בְּחֵפֶץ יֶתֶר יַעַבְדוּן אֶת־הַחֹלְקִים טוּב עֲבֹדָתָם בִּגְלַל אֱמוּנָתָם וְאַהֲבָתָם וְלִמַּדְתָּ אֶת־הַדְּבָרִים הָאֵלֶּה וְגַם־תְּצַוֶּה עֲלֵיהֶם׃

³אִישׁ כִּי־יוֹרֶה דֶרֶךְ אַחֶרֶת וְלֹא יָשִׁית לִבּוֹ לַדְּבָרִים הַנֶּאֱמָנִים לְיֵשׁוּעַ הַמָּשִׁיחַ אֲדֹנֵינוּ וּלְדִבְרֵי מוּסָר בְּיִרְאַת אֱלֹהִים׃

⁴אִישׁ יָהִיר הוּא וְאֵין תְּבוּנָה בוֹ כִּי נָגוּעַ הוּא בְּדִבְרֵי רִיבוֹת לְהוֹכַח מִלִּים וּמִמְּקֹרָם תֵּצֵא קִנְאָה תִּגְרָה נְאָצָה וְלֵב חֹרֵשׁ רָעָה׃

⁵מִלְחֲמוֹת הֲבָלִים בֵּין תֹּעֵי רוּחַ אֲשֶׁר הָאֱמֶת בְּתוֹכָם נֶעְדֶּרֶת וְיִרְאַת שָׁמַיִם בְּיָדָם לַעֲשׂוֹת מִקְנֶה וְקִנְיָן סוּר מֵאֲנָשִׁים כָּאֵלֶּה׃

⁶אָמְנָם יִרְאַת אֱלֹהִים וְלֵב שָׂמֵחַ בְּחֶלְקוֹ קִנְיָן גָּדוֹל הוּא׃

⁷כִּי לֹא־הֵבֵאנוּ מְאוּמָה לְתֵבֵל אַרְצֵנוּ וְיָדַעְנוּ כִּי לֹא נוֹצִיא מִמֶּנָּה מְאוּמָה׃

⁸עַל־כֵּן בִּהְיוֹת לָנוּ לֶחֶם לֶאֱכֹל וּבֶגֶד לִלְבּשׁ נִשְׂמְחָה בְּחֶלְקֵנוּ׃

⁹וְהַמְבַקְשִׁים לְהַעֲשִׁיר יִלָּכְדוּ בְמַסּוֹת וּבְמוֹקְשִׁים וּבְרֹב תַּאֲוַת כֶּסֶל וּמָשְׁחָת וּבְאַחֲרִיתָם יֵרְדוּ לִבְאֵר שַׁחַת וַאֲבַדּוֹן׃

¹⁰כִּי שֹׁרֶשׁ כָּל־רָע אַהֲבַת כֶּסֶף אֲשֶׁר חָמְדוּ בְנֵי־אָדָם וְתָעוּ מִדֶּרֶךְ אֱמוּנָתָם וַיַּכְאִיבוּ נַפְשָׁם בְּמַכְאֹבִים רַבִּים׃

¹¹וְאַתָּה אִישׁ אֱלֹהִים בְּרַח־לְךָ מֵאֵלֶּה כִּי אִם־צֶדֶק תִּרְדֹּף יִרְאַת אֱלֹהִים אֱמוּנָה אַהֲבָה עֹצֶר־רוּחַ וַעֲנָוָה׃

¹²הִלָּחֵם מִלְחֶמֶת צֶדֶק לֶאֱמוּנָתֵנוּ וְהַחֲזֵק בְּנַחֲלַת חַיֵּי עוֹלָם אֲשֶׁר נוֹעַדְתָּ לָהּ וַאֲשֶׁר עֵדוּת טוֹבָה עָנִיתָ לְעֵינֵי עֵדִים רַבִּים׃

¹³הִנְנִי פֹקֵד עָלֶיךָ הַיּוֹם נֶגֶד הָאֱלֹהִים הַמְחַיֶּה כֹל וְנֶגֶד יֵשׁוּעַ הַמָּשִׁיחַ אֲשֶׁר עָנָה הָעֵדוּת הַטּוֹבָה לְעֵינֵי פֹנְטִיּוֹס פִּילָטוֹס׃

¹⁴כִּי־תִשְׁמֹר אֶת־הַמִּצְוָה הַזֹּאת בָּרָה וּתְמִימָה עַד־יוֹם הִתְגַּלּוֹת יֵשׁוּעַ הַמָּשִׁיחַ אֲדֹנֵינוּ׃

¹⁵אֲשֶׁר בְּעִתּוֹ יַרְאֵנוּ הַמְבֹרָךְ הַמּשֵׁל הַיָּחִיד מֶלֶךְ הַמְּלָכִים וַאֲדֹנֵי הָאֲדֹנִים׃

¹⁶אֲשֶׁר עִמּוֹ לְבַדּוֹ מְקוֹר חַיִּים שֹׁכֵן אוֹר אֲשֶׁר אֵין לָגֶשֶׁת אֵלָיו לֹא רָאָה אֹתוֹ אָדָם וְלֹא יַעְצָר־כֹּחַ לִרְאוֹתוֹ אֲשֶׁר לוֹ הַכָּבוֹד וְהַגְּבוּרָה לְעוֹלָם וָעֶד אָמֵן׃

¹⁷צַו עַל־עֲשִׁירֵי הָעוֹלָם הַזֶּה לְבִלְתִּי יָרוּם לְבָבָם וְלֹא־יִבְטְחוּ בָעשֶׁר אֲשֶׁר כְּנָפַיִם לוֹ כִּי אִם־בֵּאלֹהִים הַנֹּתֵן לָנוּ דַּי וְהוֹתֵר לִשְׂבֹּעַ׃

¹⁸אַךְ יַעֲשׂוּ אֶת־הַטּוֹב וְיַעֲשִׁירוּ בְמַעֲשִׂים טוֹבִים לָתֵת וּלְחַלֵּק לַאֲשֶׁר אֵין נָכוֹן לוֹ׃

¹⁹וְלֶאְצֹר לָהֶם אוֹצָר לִיסוֹד טוֹב לֶעָתִיד לָרֶשֶׁת אֶת־חַיֵּי הָעוֹלָם׃

²⁰אָנָּא טִימוֹתִיּוֹס שְׁמֹר אֶת־הַפִּקָּדוֹן אֲשֶׁר הָפְקַד אִתְּךָ וְהַרְחֵק נַפְשְׁךָ מִשִּׂיחוֹת חוּלִין רְעוּת רוּחַ וּמִן־הַבִּקֹּרֶת אֲשֶׁר יְכַנּוּ בִשְׂפַת שֶׁקֶר בְּשֵׁם נְתִיבוֹת הַחָכְמָה׃

²¹וַאֲשֶׁר מִן־הַהֹלְכִים בָּהֵן תָּעוּ מֵאֹרַח אֱמוּנָתָםּ הַחֶסֶד יְהִי עִמָּךְ אָמֵן׃