Read Saluan KAJADIAN 12 Bible Online

KAJADIAN 12 - Saluan bible

KAJADIAN 12

¹ Tumpu notataemo hi Abram, “Pala'imo na lipu' no beleyum, sampoto utusan nu beleyum ka' laigan nu tuuma nu beleyum, lantas mambamo i lipu' anu Ku potiju' hi beleyum.

²Ku ponjoo'je na lee' nu beleyum ka' aha timbalije bansa anu daka'. Ku balakatije na beleyum ka' mompotimbali sanggo nu beleyum talasanggo, sahingga beleyum timbalije balakat.

³ Ku balakatije na to mia-mian anu mombalakati beleyum ka' mongkutuki to mia-mian anu mongkutuki beleyum. Ka' kalana beleyum Ku balakatije na bansa iwi-iwi' i dunia.”

⁴I Abram umunnyo pitumpulu'mo ka' olima' na taun tempo'nyo ia nompala'imo mae Haran, susumo anu pinalentahkonmo nu Tumpu hi ia. I Abram namba i tano' Kana'an hingga-hinggat tiba i Sarai bengkele'nyo, ka' i Lot ponuanakonnyo ka' iwi-iwi' na halata'nyo tiba to posa-posaihon anu i humpak nu aha i Haran. Salatan aha tinokamo i Kana'an,

⁶i Abram nonsongkohi tano' aijo' sampe tinokamo i kau' anu ko balakatnyo kiijo' i More, aijo'mo tampat ponsomban Tumpu kiijo' i Sikhem. (Tempo'nyo aitu mian nu Kana'an daagi' monjoongi tano aijo'!)

⁷ Tumpu nanintoamo hi Abram ka' notatae hi ia, “Aiyamo na lipu' anu Ku bee'mo hi lee' nu beleyum.” Lantas i Abram nompotinjomo sa'angu' na mezbah ikiijo' bau ponsomban Tumpu anu nanintoamo hi ia.

⁸Lapas aijo' ia nambamo i sasu selatan, mokiijo' i da'erah anu mabungkut i sasu kabete'an kota nu Betel, ka' nombaumo kemah i olot nu Betel ka' Ai: Betel i sasu kinsoban ka' Ai i sasu kabete'an. Ka' suele mule' ikiijo' ia nompotinjomo mezbah ka' nonsombahmo Tumpu.

⁹Lapas aijo' ia namba mule' lengkat i sa'angu' na tampat namba mule' i tampat sangga'at mompanjolongi bahagian sasu selatan tano' nu Kana'an.

¹⁰Panyo kiijo' i Kana'an hau-haunyo tinokanmo nu kasusa'an i anu okaan anu talalomo hondo sahingga i Abram namba nompaka pajo'onmo mule' nokiijo' i sasu selatan, i lipu' nu Mesir da jojoongmo ikiijo' mae, sampe madi'mo ko kasusa'an aijo'.

¹¹Tempo'nyo ia nompala'imo potempasan ka' ninsoopmo i lipu' nu Mesir, notataemo na ia hi Sarai bengkele'nyo, “Beleyum handa, bengkele'ku.

¹²De mian nu Mesir montoa beleyum, tantu koonyo nu aha beleyum bengkele'ku, lantas aku tantu opateimo ka' beleyum na opotumuu'.

¹³ Jadi sahanyo nu poto'i, beleyum atina' utusku ise' da aku opotumuu' ka' madi' opoposia kalana beleyum.”

¹⁴Ka' memang tinotu'u, salatan i Abram nompala'imo potempasan ka' tinokamo i lipu' nu Mesir, mian nu Mesir nontoamo tukoonyo nu aha i Sarai handa hondo.

¹⁵To pia-piangkuka na mian anu ko pangkatnyo mokalaja i laigan nu tomundo nontoamo ia ka' nompoto'i hi tomundo palias na kino handanyo na boune kiijo'; kalana aijo' ia binoamo i laigan nu tomundo.

¹⁶Kalana i Sarai, sahingga i tomundo madi' nompoposia i Abram ka' nombee'imo ia to posa-posaihon, sampahas na domba ka' mee', sapi', keledai ka' unta.

¹⁷Panyo kalana i tomundo nongalamo i Sarai, Tumpu nompotokamo mae to panya-panyakit anu okabuhuk hi tomundo, ka' to mia-mian i uno nu laigannyo.

¹⁸Lantas i tomundo nolagamo i Abram ka' nompokilawa hi ia, “Apaa na anu binaumo nu beleyum hi belengku aiya? Kadaka' madi' pinoto'i nu beleyum ia aitu bengkele' nu beleyum?

¹⁹Kadaka' beleyum nompoto'i ia aitu utusum ise' ka' nompobee'mo aku nongala binau bengkele'ku? Aiyamo na ia, bengkele' nu beleyum; alamo ka' lako'mo!”

²⁰I tomundo nompalentahmo hi to pia-piangkuka anu ko pangkatnyo, ka' aha nonsabatakonmo i Abram da mompala'imo lipu' aijo' hingga-hinggat tiba bengkele'nyo ka' iwi-iwi' anu daagi' hi ia.