Read Saluan KAJADIAN 13 Bible Online

KAJADIAN 13 - Saluan bible

KAJADIAN 13

¹I Abram nompala'imo Mesir lantas nambamo i sasu utara i bahagian selatan i Kana'an tiba bengkele'nyo ka' iwi-iwi' na anu daagi' hi ia, ka' i Lot suele ahi' nombatukimo.

²I Abram kaya hondo; ia daagi' ko domba, mee', sapi' ka' mule' salaka tiba mosoni'.

³Sahingga ia nambamo lengkat i sa'angu' na tampat, ka' nolalinmo mule' i tampat sangga'at, nompanjolo Betel. Ia tinokamo i da'erah olot nu Betel ka' Ai, i tampat anu ko balakatnyo anu u'utu mae pinombauannyo kemah,

⁴ka' mule' pinombauannyo mezbah. Ikiijo'mo na pinonsombannyo Tumpu.

⁵I Lot suele ko bengkele'nyomo ka' ko to ana-anaknyomo tiba to posa-posaihonnyo ka' domba, mee' ka' sapi'.

⁶Kalana aijo' tano' anu ikiijo' madi' ewa ka' madi' manjoo' na hemputnyo bau kajojoongan nu aha ohua', kalana potu'on nu aha talalo manjoo'.

⁷Lantas pinainggagamo na to pola-polaya' potu'on i Abram ka' to pola-polaya' potu'on i Lot. (Tempo'nyo aitu mian nu Kana'an ka' mian nu Feris daagi' monjoongi tano' aijo'.)

⁸I Abram notataemo hi Lot, “Kita aiya moto utus, madi' ma'ima' de to mia-mian nu beleyum ka' to mia-mianku painggaga.

⁹Kalana aijo' sahanyo kita moga'a-ga'atmo. Pile'imo na bahagian nu tano' aiya iya na anu nu ka'ima'i. De beleyum mamba i sasu aiya, aku mamba i sasu sangga'at.”

¹⁰ I Lot nontanggalakon songko-songko, ka' tinoanyo iwi-iwi' na Bangka'nyo nu Yordan toka-toka i kota Zoar manjoo' na ueenyo, sumomo Taman nu Tumpu kabai sumomo tano' nu Mesir. (Sumomo aijo' na balu-balu'nyo u'utu mae ma'isa pe'e Tumpu nongidei to kota-kota nu Sodom ka' Gomora.)

¹¹Ahennyo i Lot nompile'imo songko-songko na Bangka'nyo nu Yordan aijo', lantas nambamo i sasu kabete'an. Sumo aijo' na ua'aha aijo' noga'a-ga'atmo.

¹²I Abram tataap jinojoongmo i tano' Kana'an, panyo i Lot nombaumo kemah i to kota-kota anu kiijo' i bangka'nyo tinoka-toka kiijo' mae koko Sodom.

¹³Kota Sodom aijo' jojoongan nu to mia-mian anu ma'idek na kinyonyoanyo ka' baladosa' hi Tumpu.

¹⁴Salatan i Lot nambamo, Tumpu notataemo hi Abram, “I tampat kinatinjoan nu beleyum atina' tanggalalokon ima-ima' na tampat aiya songko-songko;

¹⁵ Ku bee'mo hi beleyum ka' hi lee' nu beleyum na tano' songko-songko anu tinoamo nu beleyum atina' da timbalimo bau bagi nu beleyum sampe toka sidu-sidutu'.

¹⁶Ku bee'ije na beleyum lee' anu da'isan hondo, sahingga madi' ko samian na anu moko bilang aha. Sumomo mian madi' moko ala mombilang abu' i tano', sumo aitumo na lee' nu beleyum madi' opoko ala obilang.

¹⁷Uuka aiya songkohimo na tano' aiya kalana Ku bee'mo hi beleyum.”

¹⁸Lapas aijo' i Abram nolalinmo kemahnyo, lantas tinataapmo koko kau' anu singkap ko balakatnyo tampat lewa' ponsomban kiijo' mae i Mamre koko Hebron ka' ikiijo'mo na ia nompotinjo mezbah bau ponsomban Tumpu.