Read Saluan KAJADIAN 14 Bible Online

KAJADIAN 14 - Saluan bible

KAJADIAN 14

¹Opat na tomundo aijo'mo: i Amrafel lengkat mae i Babilonia, i Ariokh lengkat mae i Elasar, i Kedorlaomer lengkat mae i Elam, ka' i Tideal lengkat mae i Goyim

²nahampatemo nongewa olima' na tomundo' sangga'at, aijo'mo: i Bera lengkat mae i Sodom, i Birsya lengkat mae i Gomora, i Syinab lengkat mae i Adma, i Semeber lengkat mae i Zeboim, ka' tomundo lengkat mae i Bela anu biasa osanggohi Zoar.

³Oli-olima' na tomundo aijo' nosa'angu'mo ka' nomposihukmo suludadu nu aha i Bangka'nyo nu Sidim, anu tempo' uuka sinanggohanmo Ambai Mate.

⁴Sinampulu' ka' ohua' na taun na kopinnyo aha kinuasan nu Tomundo Kedorlaomer, panyo i taun ko sampulu'nyo ka' totolu', aha nongewamo madi'mo nontuluti ia.

⁵Taun ko sampulu'nyo ka' opat, i Kedorlaomer ka' anu nosa'angu'mo tiba ia tinokamo nomboa suludadu nu aha ka' nompatundu'mo mian nu Refaim kiijo' i Asyterot-Karnaim, mian nu Zuzim kiijo' i Ham, mian nu Emim kiijo' i Syawe-Kiryataim,

⁶ka' mian nu Hori anu i bungkutnyo nu Edom, lantas i loloi'mo nu aha tinoka-toka kiijo' i El-Paran i habe'nyo nu tampat anu mateges.

⁷Lapas aijo' aha anu nololoi' po'ule'mo ninsusule' mae ka' namba nokiijo' i En-Mispat anu tempo' uuka sinanggohanmo Kades. Aha nompatundu'mo songko-songko na tano' nu Amalek ka' nompatundu'mo mian nu Amori anu jojoong kiijo' i Hazezon-Tamar.

⁸Lapas aijo' to tomu-tomundo anu lengkat mae i Sodom, i Gomora, i Adma, i Zeboim ka' i Bela nomposadiamo suludadu nu aha ikiijo' i Bangka'nyo nu Sidim lantas nahampatemo

⁹mongewamo to tomu-tomundo lengkat mae i Elam, i Goyim, i Babilonia, ka' i Elasar; jadi, olima' na tomundo nongewa opat na tomundo.

¹⁰Bangka'nyo aijo' kaho bubung nu aspal, ka' salatan to tomu-tomundo lengkat mae i Sodom ka' i Gomora nalaimo mae nompala'imo mae pahampatean, aha singkapmo nanabu' i bubung haha aijo'. Totolu' na tomundo sangga'at madi' kino apa-apaanyo ka' nalaimo nokiita' i bungkutnyo.

¹¹Opat na tomundo anu inguntungmo na nahampate nompahuhuimo iwi-iwi' apaa na anu kiijo' i Sodom ka' i Gomora, tiba anu okaan lantas inambamo.

¹²I Lot ponuanakon i Abram suele jojoong kiijo' i Sodom, kalana aijo' ia suele binoamo nu sampobali' nu aha tiba iwi-iwi' na kakaya'annyo.

¹³Panyo samian na anu noko ala nalai anu madi' binoa nu sampobali' nu aha nonsisikmo iwi-iwi' apaa na anu jinadimo aijo' hi Abram, mian nu Ibrani aijo'. I Abram jojoong koko kau' anu ko balakatnyo tampat ponsomban anu i Mamre, mian nu Amori. I Mamre ka' to utu-utusnyo aijo'mo, i Eskol ka' i Aner atina'mo na to sanga-sangalu anu nosa'angu'mo tiba i Abram.

¹⁴Salatan i Abram nohongomo ponuanakonnyo binoamo nu sampobali'nyo, ilimu'nyomo na iwi-iwi' mian anu hingga-hinggat jojoong i kemahnyo, aijo'mo anu toto mako-makolit' na mahampate, konjoo'nyo 318 na mian, lantas nontuloi'mo aha opat na tomundo aijo' tinoka-toka i kota Dan.

¹⁵Ikiijo' mae i Abram nombagimo to mia-miannyo pinaha tompu-tompuknyo lantas nontumbuhimo sampobali' nu aha pihi-pihi ka' nompatundu'mo aha. Ia nololoi'mo aha tinoka-toka kiijo' mae i Hoba sasu utara kota Damsyik.

¹⁶I Abram po'ule' nongala to bala-balang anu pinahuhuanmo nu sampobali' ka' suele i Lot tiba iwi-iwi' na kakaya'annyo ka' to bou-boune ka' sangga'at anu i hakop nu sampobali'.

¹⁷Noko patundu' i Tomundo Kedorlaomer tiba to tomu-tomundo anu nosa'angu'mo tiba ia, i Abram ninsusule'mo mae. Lantas tomundo nu Sodom nambamo nonsingkaboti ia kiijo' i Bangka'nyo nu Syawe anu biasa osanggohi Bangka'nyo nu Tomundo.

¹⁸ I Melkisedek, tomundo nu Salem anu suele montoongi imam nu Tumpu Allah Anu Matangkas hondo na kuasanyo, nomboaimo roti ka' anggur hi Abram,

¹⁹lantas nombalakatimo i Abram, ia notatae, “O' amalakon da Tumpu Allah Anu Matangkas hondo na kuasanyo, anu nompotimbalimo langit ka' tano' mombalakati i Abram!

²⁰Opuji' na Tumpu Allah Anu Matangkas hondo na kuasanyo anu mombee'mo hi beleyum ka'untungan nompatundu'mo sampobali' nu beleyum.” Lapas aijo' i Abram nombee'imo i Melkisedek, anu sampulu' na bagian, iwi-iwi' na to bala-balang anu binoanyomo mae, sambahagian na binee'nyo hi Melkisedek.

²¹Lantas notataemo na tomundo nu Sodom hi Abram, “Alamo na to bala-balang anu pinahuhuakon mae atina', panyo asan sanang mae na kinyonyoa monsule'akon mae hi belengku to mia-mian haha atina' hi belengku iwi-iwi'.”

²²Panyo tinaaman i Abram, “Aku basumpa' i ahop nu Tumpu, Tumpu Allah Anu Matangkas hondo na kuasanyo, anu Nompotimbalimo langit ka' tano,

²³saba' aku madi' koko mongala mau pa' apaa na anu nu beleyum, sahamba pe'e na banang kabai sambatu pe'e na bibit nu sandan madi' ku ala. Tiba jalan anu sumo aiya, madi' beleyum motatae', 'Akumo aiya na nompotimbali i Abram da kinaya.'

²⁴Aku madi' mongka'oho' mongala apa-apaa bau bahagianku. Aku ola mongka'oho' mongala apaa na anu pinakemo nu to mia-mianku. Panyo pobakas da sahanyo to sanga-sangalungku anu nosa'angu'mo tiba aku aijo'mo i Aner, i Eskol ka' i Mamre na mongala bagian nu aha.”