Read Saluan KAJADIAN 15 Bible Online

KAJADIAN 15 - Saluan bible

KAJADIAN 15

¹Lapas aijo', i Abram nontoamo ka' nohongomo Tumpu notatae hi ia, “Boli mabuhuk, Abram, Ku jagai na beleyum da boli ko balaa montokai mae ka' mombee'imo tambo anu daka' hi beleyum.”

²Panyo notatae na i Abram, “Tumpu Anu Matangkas hondo na kuasanyo, Tumpu madi' mae mombee'i anak aku. Mian anu mongala halata'ku olamo i Eliezer, posaihonku anu lengkat mae i Damsyik. Jadi apaamo na ma'ananyo Tumpu mombee'i mae aku tambo?”

⁴Lapas aijo' i Abram nohongo mule' Tumpu notatae hi ia, “Misa' posaihon nu beleyum na anu timbali mongala halata' nu beleyum, panyo posi anak nu beleyum mo'ane.”

⁵ Tumpu nomboamo i Abram nosabat, lantas notataemo hi ia, “Sinda na langit, ka' soba bilang na to manda-mandala'; beleyum ko lee'je konjoo'nyo sumo mandala' haha aita'.”

⁶ I Abram pinalesayamo hi Tumpu, ka' kalana aijo' Tumpu nontalimamo ia salaku mian anu momposanang kinyonyoa-Nyo.

⁷Lapas aijo' Tumpu po'ule' mule' notatae hi ia, “Akumo na Tumpu, anu nolaya'mo mae beleyum nosabat lengkat mae i lipu' Ur anu ikiijo' mae i Babilonia, da mombee' tano' aiya hi beleyum timbali beleyumo na tumpunyo.”

⁸Panyo pinokilawa i Abram, “O Tumpu Anu Matangkas hondo na kuasanyo, apaa na bau ponsumbu'anku saba' tano' aitu akumo na tumpunyo?”

⁹Tinaaman nu Tumpu, “Ala mae bau baging-Ku sa'angu' na sapi' behenyo, sa'angu' na mee' behenyo ka' sa'angu' na mee' lakinyo, toto sa'angu' umunnyo totolu'mo na taun ka' suele sa'angu' na tomonsi' sapatau ka' sa'angu' na tomonsi' malapati'.”

¹⁰Lantas i Abram nongalamo binatang haha aijo' bau bagi nu Tumpu Allah. Sapi', mee' ka' domba aijo' toto sa'angu' biniha'nyomo ohua', ka' biha'annyo haha aijo' pinaha potimpasnyomo mompaha ahop ohua' na jiji'annyo. Panyo tomonsi' haha aijo' madi' biniha'nyo.

¹¹Antoknyo nu binatang haha aijo' tinengke'anmo nu to tomo-tomonsi' anu lewa' montoluk bangke', panyo i laa'an i Abram.

¹² Salatan batu nu sinaa kahanda'mo makakinsap, i Abram kinahoyotanmo. Monti-montiik ingoa'annyo talalomo hondo nabuhuk.

¹³ Tumpu notataemo hi ia, “Inau' lee' nu beleyum saidi' mae timbalimo mian anu jojoong i lipu' nu mian sangga'at; aha timbalimo posaihon ikiijo' mae ka' osansalamo pato atu' na taun na kopinnyo.

¹⁴ Panyo bansa anu mombotuani lee' nu beleyum aijo' Ku hukum, ka' salatan lee' nu beleyum mompala'imo lipu' aijo' aha momboamo manjoo' na halata'.

¹⁵Posi beleyum mule' montokaimo umun anu matangkas; beleyum silaka ma'i-ma'ima', lantas olamunmo.

¹⁶Salatan patolapismo na anu o lee'akon, to maku-makumpu nu beleyum po'ule'mo minsusule' mae i aiya, kalana Aku madi' molaa' mian nu Amori, de ma'isa pe'e kalakuan nu aha jadimo ma'idek hondo. Sahingga palalumo ahi' o hukum.”

¹⁷Salatan sinaa nalomo monti-montiik sa'angu' na polu' ise' tinokamo ko tibuknyo ka' potong anu moak, lantas notulumo i olot nu antok anu sinampa-sampanmo haha aijo'.

¹⁸ Tempo'nyo aijo' na Tumpu binalajanji'mo hi Abram. Notataemo na Tumpu, “Aku balajanji'mo mombee'mo hi lee' nu beleyum songko-songko na tano' aiya, lengkat pe'e mae i potempasan nu lipu' Mesir toka-toka mokiijo' mae i Kaunyo nu Efrat,

¹⁹tinonsoopmo suele na tano' nu mian Keni, Kenas, Kadmon,

²⁰Het, Feris, Refaim,

²¹Amori, Kana'an, Girgasi ka' Yebus.”