Read Saluan KAJADIAN 16 Bible Online

KAJADIAN 16 - Saluan bible

KAJADIAN 16

¹I Sarai, bengkele' i Abram, ma'isa nohumpak anak. Panyo ia daagi' ko posaihon samian anu lengkat mae i Mesir, samian na langkoyang sanggonyo i Hagar.

²I Sarai notataemo hi Abram, “Tumpu madi' mompobee' aku da mohampeakon anak. Kalana aijo', sahanyo beleyum moduhusmo tiba posaihonku aijo. Ihe na monsumbu' ia mohampeakon anak bau anakku.” I Abram sinitujumo i i poitaon i Sarai.

³Sumo aijo' na i Sarai nombee' i Hagar hi Abram da opotimbali salaku ambahue'nyo. Tempo'nyo aitu i Abram sampulu'mo na taun kiijo' i Kana'an.

⁴I Abram noduhusmo tiba i Hagar, lantas boune aijo' pinoboamo. Panyo salatan sinumbu'mo i Hagar taalu' ia pinoboamo, ia kinobubuunmo ka' madi'mo nompajuli i Sarai.

⁵Lantas i Sarai notataemo hi Abram, “Aku nombee'mo posaihonku i Hagar hi beleyum, ka' salatan sinumbu'nyomo taalu' ia pinoboamo, ia madi'mo nompajuli mae aku. Atina' kasala'an nu beleyum. O amalakon da Tumpuje na momputusi palakala aiya hi beleyum ka' hi belengku.”

⁶Tinaaman i Abram, “Bakasmo, ia posaihon nu beleyum ka' beleyumo na mongkuasai ia; lewa'mo pokau na ia yayamo pongka'oho' nu beleyum.” Lantas saja'mo sinigohan i Sarai na mompokau i Hagar, sahingga ia nopalaimo.

⁷Malaekat nu Tumpu nonsingkabotimo i Hagar koko mata nu uee i tampat anu mateges, i jalan anu mokiijo' i tampat anu mateges Sur.

⁸Malaekat aijo' notatae, “Hagar, posaihon i Sarai, beleyum lengkat mae iya ka' kahanda'mo mamba moya?”

⁹Malaekat aijo' notatae, “Po'ule' pinsusule' hi ia ka' hongo-hongo na ia.”

¹⁰Lantas malaekat aijo' po'ule' mule' notatae, “Ku bee'ije na beleyum manjoo' hondo na makumpu, sahingga madi' ko samian pe'e na anu moko ala mombilang aha.

¹¹Madi'mo daagi' pin beleyum mohampeakonmo samian na anak mo'ane; sanggohi na ia i Ismael, kalana beleyum i humang i hongomo nu Tumpu.

¹²Panyo anak nu beleyum atina' tumuu' sumo keledai ma'ela'; batu-batu mian nu ewa, ka' batu-batu mian mongewa ia. Ia tumuu' madi' mogalum tiba to utu-utusnyo.”

¹³I Hagar nompotutugakonmo i uno nu kinyonyoanyo, “Pa' totu'u na aku montoamo Tumpu Allah anu mompalahatikan mae kantumuu'anku?” Sahingga ia nonsanggomo Tumpu anu notataemo mae hi ia, “O Tumpu Allah anu Mompalahatikan mae Kantumuu'anku”.

¹⁴Mokonyo aijo' mian monsanggohi bubung anu i olot nu Kades ka' Bered aijo', “Bubung Nu Anu Tumuu' Anu Mompalahatikan mae Aku”.

¹⁵ Lantas i Hagar nohampeakonmo anak mo'ane ka' tuumanyo i Abram nonsanggohi mo anak aijo' i Ismael.

¹⁶Tempo'nyo aitu umun i Abram uwalumpulu'mo anom na taun.