Read Saluan KAJADIAN 17 Bible Online

KAJADIAN 17 - Saluan bible

KAJADIAN 17

¹Salatan umun i Abram siniompulu'mo ka' osio' na taun, Tumpu nanintoamo hi ia ka' notatae, “Akumo na Tumpu Allah Anu Daka' hondo na kuasanyo. Otuluti na Aku ka' saja' obau na pongka'oho'-Ku.

²Aku mombaumo palajanjian tiba beleyum ka' mombee'imo lee' manjoo'.”

³Lantas tinolodadupumo na i Abram, lapas aijo' Tumpu Allah notataemo,

⁴ “Aiyamo na palajanjian anu Ku janji' akon hi beleyum: Aku balajanji' saba' beleyum timbalimo mompolee' nu bansa manjoo'. Kalana aijo' sanggo nu beleyum misa'mo i Abram, panyo i Abrahamo.

⁶Ku bee'ije na beleyum manjoo' na makumpu, ka' hi aha saidi' mae daagi'je ko anu timbali to tomu-tomundo. Lee' nu beleyum timbalimo da'isan, sahingga aha timbalimo to bansa-bansa.

⁷ Ku totu'uakonje na palajanjian-Ku hi beleyum, ka' toka-toka hi lee' nu beleyum molundu-lundu, ka' palajanjian aijo' sampe toka sidu-sidutu'. Aku timbalimo Tumpu Allah nu beleyum ka' Tumpu Allah nu lee' nu beleyum.

⁸ Ku bee'mo hi beleyum ka' hi lee' nu beleyum na tano' aiya, anu uuka aiya kajojoongan nu beleyum salaku mian anu lengkat mae i salipu'an. Songko-songko na tano' Kana'an timbalimo anu nu makumpu nu beleyum sampe toka sidu-sidutu' ka' Aku timbalimo Tumpu Allah nu aha.”

⁹Tumpu Allah po'ule' mule' notatae hi Abraham, “Beleyum mule' tionyo ahi' tulu-tulutan hi palajanjian aijo'. Beleyum kabai mule' lee' nu beleyum sampe molundu-lundu na tulunan.

¹⁰ Beleyum ka' iwi-iwi' na lee' nu beleyum, to momo'ane tionyo ahi' o sunat.

¹¹O tampu'uni uuka aiya beleyum tionyo ahi' monsunat batu-batu anak mo'ane anu daagi' bungamea' anu umunnyo uwalun sinaamo, tiba to posa-posaihon anu i hampe'akon i laigan nu beleyum kabai anu ingoli nu beleyum. Sunat aijo' bau pontandai palajanjian anu jinanji'-Kumo hi komiu.

¹³Batu-batu mian tionyo ahi' o sunat ka' aijo' bau pontandai anu timbali otoa ka' momponyata' saba', palajanjian-Ku hi komiu aijo' sampe toka sidu-sidutu'.

¹⁴Batu-batu mo'ane anu madi' o sunat, madi'mo oposoop mian anu pinalesayamo hi beleng-Ku, kalana ia madi' montoongi palajanjian aijo'.”

¹⁵Lapas aijo' Tumpu Allah notatae mule' hi Abraham, “Beleyum bolimo molaga bengkele' nu beleyum i Sarai; otampu'uni uuka aiya sanggonyo i Sara mo.

¹⁶Ku balakatije na ia, ka' ia mohampeakonje samian na anak mo'ane anu Ku bee' hi beleyum. Memang, Aku mombalakatije i Sara, ka' ia timbalije tina nu mompolee' nu to bansa-bansa. Hi lee'nyo aijo' ko anuje timbali to tomu-tomundo.”

¹⁷Lantas i Abraham tinolodadupumo, panyo ia tinolokojomo salatan nompotutugakonmo, “Te daagi' timbali samian na mo'ane anu umunnyo sa'atumo na taun daagi' mohumpak anak? Te daagi' timbali na i Sara mohampeakon anak sadang umunnyo siniompulu'mo na taun?”

¹⁸Lantas ia notataemo hi Tumpu Allah, “Sahanyo anu timbali tumpunyo nu halata'ku i Ismaelmo.”

¹⁹Panyo Tumpu Allah notatae, “Madi'. I Sara bengkele' nu beleyum mohampeakonje anak mo'ane ka' beleyum monsanggohije ia i Ishak. Saja' Ku toongi na palajanjianKu hi anak aijo' ka' tiba lee'nyo sampe toka sidu-sidutu'. Palajanjian aijo' sampe toka sidu-sidutu'.

²⁰Panyo Ku bee'je suele apaa na anu pinoitamo nu beleyum mongkona i Ismael. Kalana aijo' ia Ku balakatije ka' Ku bee'ije lee' manjoo'. Ia timbali mompolee' nu aha anu sampulu' ka' ohua' na kapala nu tulunan nu bansa, ka' lee'nyo Ku potimbalije sa'angu' na bansa anu daka'.

²¹Panyo palajanjian-Ku, Ku pokonamo hi Ishak, anak nu beleyum anu nu hampe'akonje i Sara, taun aiya mae i ahop kila-kila susumo sinaa uuka aiya.”

²²Noko taloakon sumo aijo', Tumpu Allah nompala'imo i Abraham.

²³I sinaamo aijo', na i Abraham nontulutimo Tumpu Allah ka' nonsunatmo i Ismael anaknyo, ka' iwi-iwi' na mo'ane anu i uno nu laigannyo, tibamo to posa-posaihonnyo anu i hampe' i uno nu laigannyo kabai anu ingolinyomo.

²⁴I Abraham umunnyo siniompulu'mo ka' osio' na taun tempo'nyo ia sinunat,

²⁵ka' i Ismael anaknyo umunnyo sampulu'mo ka' totolu' na taun.

²⁶Aha sinunat hingga-hinggat i sinaamo ai-aitu,

²⁷tiba iwi-iwi' na posaihon i Abraham.