Read Saluan KAJADIAN 19 Bible Online

KAJADIAN 19 - Saluan bible

KAJADIAN 19

¹Noko lapas sinonso' hi Abraham, ua'aha na malaekat aijo' namba no nokiijo' i Sodom ka' tinoka ikiijo' pinihimo. I Lot hau-haunyo suha-suhang i sabatan daka' nu kota, ka' salatan nontoamo aha, ia tinuminjomo kahanda' molabot aha. Lantas tinolodadupumo na ia i ahop nu aha,

²ka' notatae, “To Tuan-tuan, ku poita da sonso' i laiganku. To Tuan-tuan timbali mombaso'i tengke ka' male'mo pe'e i laiganku. Dodop de mongka'oho', na to Tuan-tuan mobulaje subu-subu ka' po'ule'je mamba.” Panyo tinaaman nu aha, “Talima kase, bakas kami male'mo aiya i natan nu kota.”

³Pagala kinakase i Lot, sahingga ahennyo aha ninsoopmo tiba ia i uno nu laigannyo. I Lot nontoukaimo kaanon anu ma'ima' ka' nombaumo roti sinaimbanggan anu opalalui lantas kinaanmo nu aha.

⁴Panyo ma'isa pe'e to mia-mian anu sinonso' aijo' lako' i hoyot, to mia-mian nu Sodom nontumbuhimo laigan aijo'. Iwi-iwi' na to momo'ane i kota aijo' anu motu'amo kabai daagi' olitau, nokiijo'mo.

⁵ Aha noloboo'imo i Lot ka' nompokilawa, “Iya na to mia-mian anu tinoka mae nale' i laigan nu beleyum? Bee' mae na aha, da okamale'i mami na aha!”

⁶I Lot nosabatmo aijo' i laigannyo, ka' salatan tinumbannyomo na sabatan,

⁷ia notataemo hi to mia-mian nu Sodom aijo', “To utu-utus, ku poita hondo-hondo, boli mombau han anu ma'idek sumo aijo'!

⁸Soba hongo mae, aku daagi' ko anak langkoyang ua'aha bakas ku bee'je na aha hi komiu ka' bauje apaa na anu ka' oho' obau miu hi aha. Panyo boli opoposia na anu sinonso' mae aiya hi belengku; kalana aku pantas monjagai aha.”

⁹Panyo notatae na mian nu Sodom haha aijo' hi Lot, “Tula' lamba! Beleyum mian anu lengkat mae i salipu'an kahanda'mo mongatun mae kami? Sampa lako'! De madi', beleyum obandahimo mami sahanyo mian haha itina' ua'aha na madi' talalo opoposia mami.” Lantas aha nonsulakonmo i Lot ka' nontumbuhimo kahanda'mo mongidei tumban.

¹⁰Panyo ua'aha na mian anu sinonso' aijo' nohahumbitakonmo i Lot ninsoop i uno nu laigan lantas nontumbanmo sabatan.

¹¹ Aha nompopisokmo iwi-iwi' na mata nu mian anu i sambiha' nu laigan aijo', sahingga mian haha aijo' madi'mo daagi' noko ala nontoa-toa sabatan.

¹²Ua'aha na anu sinonso' aijo' notatae hi Lot, “De beleyum ko anak mo'ane, anak boune, monian kabai to utu-utus sangga'at anu jojoong i uno nu kota aiya, boa sabatakonmo na aha lengkat i aiya,

¹³kalana kota aiya ohansunimo mami. Tumpu nohongomo poosala-poosala' anu maboat mongkona mian anu jojoong i aiya, ka' kami sinainyomo mae da mohopu'imo kota Sodom.”

¹⁴Lantas i Lot nambamo nompahakabot ua'aha na dohoi nu anaknyo, anu ua'aha aijo', ka' nompoto'i, “Sampamo posabatpala'imo na tampat aiya, kalana nuhopu'imo nu Tumpu.” Panyo aha nonsangka i Lot ola basedu'.

¹⁵Subu-subu hondo ua'aha na malaekat aijo' sabole-bolehmo nonsai i Lot da sampamo mamba, “Palia-lia',” na koonyo nu aha. “Lako'mo tiba bengkele' nu beleyum ka' ua'ahana anak langkoyang nu beleyum pala'imo na tampat aiya, da komiu boli silaka de kota aiya ohansunimo.”

¹⁶ I Lot binimbangmo. Panyo Tumpu nongkalibosimo ia; kalana aijo' ua'aha na anu sinonso' aijo' nontuntunimo i Lot ka' bengkele'nyo ka' ua'aha na anaknyo nambamo i sambiha' nu kota.

¹⁷Lapas aijo' samian na malaekat aijo' notataemo, “Popalaimo, posalamat na nyawa nu belemiu! Boli monsiloi hiku ka' boli tolotinjo i bangka'nyo. Popalaimo mokiita' i bungkutnyo, da belamiu boli silaka!”

¹⁸Panyo tinaaman i Lot, “Ibeh, Tuan boli osai na kami mopalai mokiita' i bungkutnyo.

¹⁹Memang, i Tuan talalomo hondo montulungi mae aku ka' momposalamat nyawangku. Panyo bungkutnyo aijo' talalo majo'on; manga-manga aku nusampamo nu balaa' aijo' lantas silakamo padahan ma'isa pe'e toka ikiita' mae.

²⁰Toa, atina' i ahop daagi' ko kota ise' anu madi' talalo majo'on. Pobee' mae na aku mopalai mokiijo' da salamat.”

²¹Tinaaman nu malaekat aijo', “Ma'ima'mo, kota ise' aijo' madi' Ku hopu'i.

²²Malia-lia' popalaimo! Kalana aku ma'isa timbali mombau apa-apaa de belemiu ma'isa pe'e toka kiijo' mae.” Kalana i Lot nonsanggohimo kota aijo' ise', sahingga kota aijo' sinanggohanmo Zoar.

²³Sinaa binete'mo salatan i Lot tinokamo i Zoar.

²⁴ Monti-montiik Tumpu nontudunakonmo ujan alilang anu ko apunyo hi Sodom ka' Gomora.

²⁵Ohu-ohua' na kota aijo' i hansunmo, ka' suele songko-songko na bangka'nyo ka' iwi-iwi' na hemput ka' kau', tiba iwi-iwi' na mian anu jojoong ikiijo'.

²⁶ Panyo bengkele' i Lot nosiloi i hiku, sahingga ia nongabali'mo ka' tinimbalimo timuson sumo ohi' tinjo-tinjo.

²⁷Dodo-dodopnyo subu-subu, i Abraham namba lia-lia' nokiijo' i tampat kinatinjoannyo i ahop nu Tumpu nabongi'an mae tempo'nyo han aijo' ma'isa jinadi.

²⁸Ia nontanggalakon sasu Sodom ka' Gomora ka' songko-songko na bangka'nyo, ka' nontoamo tibuk kino sipu-sipuhamo lengkat mae i tano' aijo', susumo tibuk anu lengkat mae i polu' anu talenga'nyo hondo.

²⁹Sumo aijo'mo na tempo'nyo Tumpu Allah nohopu'imo kota haha aijo' i bangka'nyo kajojoongan i Lot. Tumpu Allah nonginau' i Abraham ka' nontulungimo i Lot nompalaihakonmo butongnyo.

³⁰Kalana i Lot nabuhukmo na jojoong i Zoar, sahingga ia nambamo i bungkutnyo hingga-hinggat tiba anaknyo boune, lantas aha jinojoongmo i sa'angu' na liang.

³¹Anak boune anu tumpe notatae hi utusnyo ise', “Tuumanto i langkai'mo, ka' songko-songko na lipu' aiya madi' ko mo'ane anu timbali mongosoai kita da kita mohumpak anak.

³²Imbo', da olangui na tuumanto, lantas kita moduhusmo tiba ia da kita mohumpak anak.”

³³Pihi-pihi aijo' pino'inumanmo nu aha nu anggur na tuuma nu aha lantas anak anu tumpenyo noduhusmo tiba ia; panyo tuumanyo nalangumo hondo sahingga madi'mo sinumbu'nyo pa' apaa na tinimbali.

³⁴Dodododopnyo anak anu tumpe notataemo hi utusnyo ise', “Na' utu pihi-pihi aku noduhusmo tiba tuumanto! De saidi' malomo po'ule' mule' olanguinto na ia. Lantas beleyumo na moduhus tiba ia. Da kita toto samian mohumpak anak.”

³⁵Sumo aitu mule' pihi-pihi aijo' aha nolangui mule' i Lot, ka' anaknyo anu ko ohua'nyo na noduhusmo tiba ia. Ka' i Lot talalomo nalangu mule' sahingga madi' sinumbu'nyo pa' apaa na anu tinimbali.

³⁶Lantas ua-ua'aha na anak i Lot aijo' pinoboamo kalana posi tuuma nu aha.

³⁷Anak anu tumpenyo nohampeakon anak mo'ane anu sinanggohannyo i Moab. Ia tinimbalimo mompolee' nu mian Moab tempo' uuka aiya.

³⁸Anak anu ko ohua'nyo nohampeakon anak mo'ane suele anu sinanggohannyo i Ben-Ami. Ia tinimbalimo mompolee' nu bansa Amon tempo' uuka aiya.