Read Saluan KAJADIAN 2 Bible Online

KAJADIAN 2 - Saluan bible

KAJADIAN 2

¹Lantas ilapasmo na nompotimbali songko-songko na dunia ka' iwi-iwi' na isinyo.

² Sinaa anu ko popitu'nyo Tumpu Allah nompomingkotmo kalaja-Nyo aijo', lantas Ia nilawemo.

³Lantas binalakatan-Nyomo na sinaa ko popitu'nyo aijo' ka' pinotimbali-Nyomo sinaa anu susi', kalana i sinaa aijo' Tumpu Allah nilawemo, salatan iningkotmo na kalaja-Nyo.

⁴Sumo aijo' na sisikonnyo nompotimbali dunia ka' iwi-iwi' na isinyo. Tempo'nyo Tumpu Allah nompotimbali songko-songko na dunia,

⁵ma'isa ko anu tinumuu' ka' ma'isa ko sosu'anon i tano', kalana Tumpu ma'isa nontudunakon ujan ka' ma'isa ko mian monggunakon tano' aijo'.

⁶Panyo uee nontampu'unimo nintambulalak lengkat mae i uno nu tano' ka' nohumpisimo tudunyo nu tano'.

⁷ Lapas aijo' Tumpu Allah nongalamo sangkiding na tano', lantas kinompon-Nyomo ka' tinimbalimo samian na manusia, lantas pinuhakon-Nyomo na sawo anu mompotumuu' i uno nu bolo' nu sungnyo; sahingga tinumuu'mo na manusia aijo'.

⁸Lapas aijo' Tumpu Allah nombaumo taman kiijo' i Eden, i sasu kabete'an, ka' pinojoong-Nyomo ikiijo' na manusia anu kinompon-Nyomo aijo'.

⁹ Tumpu Allah nompotumuu'mo iwi-iwi' na ngahan nu kau' anu ma'ima', anu mohasinakon to bua-bua'nyo anu ma'ima'. I totonga' nu taman tinumuu'mo na kau' anu mombee'i kantumuu'an, ka' kau' anu mombee'i ilimu' da monsumbu' han anu ma'ima' ka' han anu ma'idek.

¹⁰Kaunyo sa'angu' mo ili lengkat mae i Eden monguei taman aijo'; ka' i sambiha'nyo nu Eden kaunyo aijo' nobagimo tinimbali opat na sopa'nyo.

¹¹Anu momona osanggohi Pison; kaunyo aijo' mo ili montotonga'i tano' Hawila.

¹²Ikiijo' ko mosoni'nyo anu madi' ko galo'nyo apa-apaa, ka' suele to bala-balang anu toto noho-nohong anu mahan hondo na o humpak, tiba mule' ko to batu-batu anu timbali bau mainan.

¹³Kaunyo ko ohu'nyo osanggohi Gihon; ueenyo mo ili montotonga'i tano' nu Kus.

¹⁴Kaunyo anu ko totolu'nyo osanggohi Tigris ka' mo ili mamba i sasu kabete'an Asyur. Kaunyo anu ko opatnyo osanggohi Efrat.

¹⁵Lapas aijo' Tumpu Allah nompojoongmo manusia aijo' i taman Eden da mompalakai ka' monjagai taman aijo'.

¹⁶Tumpu notatae hi manusia aijo', “Beleyum timbali mongkaan iwi-iwi' na bua' nu kau' i taman aiya.

¹⁷Panyo kau' anu mombee'i ilimu' da monsumbu' han anu ma'ima' ka' han anu ma'idek boli. Bua'nyo madi' timbali beleyum mongkaan; de beleyum mongkaan, beleyum silakamo i sinaa aijo'.”

¹⁸Lantas Tumpu Allah notataemo, “Madi' ma'ima' na manusia tumuu' sausa'nyo. Ku-bauje na anu timbali sangalunyo anu mompahakona ka' montulungi ia.”

¹⁹Lantas Ia nongala tano' sangkiding ka' nongkompon binau-Nyo iwi-iwi' na ngahan nu binatang i katano'an ka' binatang aita' i langa. Iwi-iwi' binee' nu Tumpu Allah hi manusia aijo' da montoa apaa na ponsanggohinyo binatang haha aijo'. Aijo'mo na tampu'unannyo binatang i katano'an ka' aita' i langa nohumpak sanggonyo toto sa'angu'.

²⁰Sumo aijo'mo na manusia monsanggohi iwi-iwi' na binatang i katano'an ka' aita' i langa. Panyo madi' ko sa'angu' pe'e aijo' hi aha na timbali bau sangalu anu mompahakona montulungi ia.

²¹Lantas Tumpu Allah nompihoyotimo manusia, i hoyotmo binobogon, ka' hau-haunyo ia daagi' hoyo-hoyot, Tumpu Allah nombubutmo sala'sa'angu' na buku nu has i butong nu manusia aijo', lantas tampatnyo aijo' po'ule' ingisian-Nyo nu antok.

²²Buku nu has aijo' binontukmo nu Tumpu Allah tinimbali samian na boune, lantas binee'nyomo hi manusia aijo'.

²³Sahingga notatae na manusia aijo', “Aiya ia, mian anu pokakana tiba aku — buku lengkat i bukungku, ka' antok lengkat i antok-ku. Ku sanggohimo na ia boune, kalana ia ingala lengkat i mo'ane.”

²⁴ Mokonyo aijo' mo'ane mompala'imo tuuma ka' tinanyo ka' mosa'angu'mo tiba bengkele'nyo, lantas ua-ua'aha timbalimo sa'asa'angu'.

²⁵Mo' ane ka' boune aijo' langgo-langgo', panyo aha madi' ma'ambang.