Read Saluan KAJADIAN 21 Bible Online

KAJADIAN 21 - Saluan bible

KAJADIAN 21

¹Tumpu nombalakatimo i Sara, susumo anu jinaji'-Nyomo.

² Salatan tinokamo na tempo'nyo anu tinantukanmo nu Tumpu Allah, tempo'nyo aitu i Abraham i langkai'mo, i Sara pinoboamo lantas nohampeakonmo samian na anak mo'ane.

³Sinanggohanmo i Abraham na anak aijo' i Ishak;

⁴ ka' salatan i Ishak umunnyo uwalunsinaamo, sinunatmo i Abraham susumo anu pinalentahkonmo nu Tumpu Allah.

⁵I Abraham umunnyo sa'atumo na taun tempo'nyo i Ishak i hampemo.

⁶I Sara notataemo, “Tumpu Allah nompolame'mo kinyonyoangku sahingga aku kinumojomo. Batu-batu mian anu mohongo han aiya tantu kumojomo kalana lame'mo hingga-hinggat tiba aku.”

⁷Lapas aijo' po'ule' mule' tinaloakonnyo, “Ihe na u'utu mae nontaloakonmo hi langkai'ku tukoonyo aku momposusumo anak? Panyo memang aku nompohampemo ahi' mau mule' langkai'ku i langkai'mo hondo.”

⁸Anak aijo' kinodaka-daka'nyomo, ka' salatan ia madi'mo pinosusu, binaumo i Abraham na adatnyo, ia nombaumo bau-bauon anu daka' hondo.

⁹Daagi' kino sansinaan, i Ismael, anak i Abraham hi Hagar boune aha mae mian nu Mesir aijo', hau-haunyo biang tiba i Ishak anak i Sara.

¹⁰ Tinoa i Sara aha aijo' biang lantas pinoto'inyomo hi Abraham, “Laa'mo na posaihon boune aijo' tiba anaknyo. Madi' timbali anak nu boune aijo' mohumpak bagian i kakaya'an nu beleyum anu saidi' mae nu haki nu anakku aiya i Ishak.”

¹¹I Abraham madi' hondo sanang i poitaon aijo', kalana i Ismael suele ahi' anaknyo.

¹² Panyo pinoto'imo nu Tumpu Allah hi Abraham, “Boli beleyum bata-bata pa' mosia saidi' mae na posaihon nu beleyum i Hagar, tiba anaknyo aijo'. Tulutimo na pongka'oho' i Sara, kalana aijo'mo hi Ishak na pohumpakan nu beleyum lee' anu jinanji'-Kumo aijo'.

¹³Sumo aijo' mule' na hi anak i Hagar, Ku ponjoo'je na makumpu da aha timbali sa'angu' na bansa. Kalana ia suele ahi' anak nu beleyum.”

¹⁴Dodododopnyo subu-subu, binee'anmo i Abraham na i Hagar anu okaan, ka' sa'angu' na botutu kilit pinongisian uee da bau mantu ijalan. Ia nomposombung anak aijo' hi bekoang i Hagar ka' nonsaimo boune aijo' da mambamo. Lantas nambamo na i Hagar ka' jinojoongmo lewa' sinongko i padang bola Bersyeba.

¹⁵Salatan uee anu binau mantunyo i ningkotmo, i Hagar nompo'una'mo anaknyo ipatuu nu kumbung.

¹⁶Lantas sinumuhangmo kila-kila sa'atu na meten lengkat itampat aijo'. Ia notatae i uno nu kinyonyoanyo, “Aku madi' moko ala montoa anakku silaka.” Lantas ia ihumangmo.

¹⁷Tumpu Allah nohongomo potatae i Ismael, ka' lengkat mae aita' i langit Tumpu Allah notataemo hi Hagar, Ia notatae, “Apaa na nu susa' akon Hagar? Boli mabuhuk. Tumpu Allah nohongomo potatae nu anak nu beleyum.

¹⁸Lako'mo hi anak nu beleyum hangkat ka' ede-edek na ia. Kupotimbalije na ia lee' nu sa'angu' na bansa anu daka'.”

¹⁹Lantas Tumpu Allah nompotimbalimo i Hagar da manasa na montoa, sahingga ia nontoamo sa'angu' na bubung. Lantas ia nambamo nongisi botutu kilit nu uee, kapas aijo' pino'inumnyomo hi anaknyo.

²⁰Tumpu Allah saja' mombaya'i i Ismael. Anak aijo-jo' kinodaka-daka'nyomo; ia jinojoongmo i padang bola Paran, ka' tinimbalimo mian to po bebas anu pande.

²¹Tinanyo nompo osoakon ia tiba samian na bo une nu Mesir.

²² Tempo'nyo aitu i Tomundo Abimelekh ka' i Pikhol, kapala nu suludadunyo tinokamo hi Abraham ka' notatae, “Tumpu Allah nontulungimo beleyum i uno nu iwi-iwi' na han anu nu bau.

²³Kalana aijo' basumpa' na beleyum aiya i ahop nu Tumpu Allah, beleyum motatae madi'mo mombau han anu ma'idek hi belengku, sumo aitu mule' hi to ana-anakku, kabai hi lee'ku. Susumo aku nanonongmo hi beleyum, sumo aijo'mo na obau mae hi belengku ka' hi lipu' anu nu jojoongi aiya.”

²⁴I Abraham notatae, “Aku basumpa'mo.”

²⁵Panyo ilapas mae i Abraham nompele-pele'mo hi Abimelekh mongkona sa'angu' na bubung anu ingagoanmo nu to posa-posaihon nu tomundo aijo'.

²⁶I Abimelekh notatae, “Aku madi' nonsumbu' pa' ihe na nombau han aijo'. Ma'isa toho mae pinoto'i nu beleyum hi belengku, u'ukaje aiya na aku nohongo mongkona han aijo'”.

²⁷Lantas i Abraham nombee'imo tinopia-piangkuka na domba ka' sapi hi Abimelekh, ka' aha ohua' na mian aijo' nombaumo palajanjian.

²⁸I Abraham nompotademo popitu' na anak nu dombanyo anu aijo' galu-galum hi dombanyo,

²⁹lantas pinokilawamo i Abimelekh hi ia, “Kadaka' binaumo nu beleyum sumo atina'?”

³⁰Tinaaman i Abraham, “Alamo na anak nu domba popitu' aiya salaku tanda saba' belento Tuan mongakuimo, akumo aiya na nong keke bubung aiya.”

³¹Sumo aijo' na tampat aijo' sahingga sinanggohanmo Bersyeba, kalana ikiijo'mo na ua aha na mian aijo' bina sumpa'mo.

³²Noko lapas na aha nombau palajanjian aijo'kiijo' i Bersyeba i Abimelekh tiba i Pikhol ninsusule'mo i lipu' nu mian Filistin.

³³Lantas i Abraham nonsu'anmo sangkau na kau' tamariska kiijo' i Bersyeba ka' mulai tempo'nyo aijo' tampat aijo' binaumo ponsomban Tumpu, Tumpu Allah anu sampe toka sidu-sidutu'.

³⁴Lapas aijo' i Abraham jinojoongmo daagi gagana' pinin i lipu' nu mian Filistin.