Read Saluan KAJADIAN 22 Bible Online

KAJADIAN 22 - Saluan bible

KAJADIAN 22

¹ Ma'isa talalo pinin ilapas na aijo' Tumpu Allah nonguji'mo pa' totu-totu'u i Abraham tulu-tulutan. Tumpu Allah nolagamo, “Abraham!” Lantas tinaamanmo i Abraham, “Apaa, Tumpu.”

² Tumpu Allah notatae, “Lako'mo i tano' Moria tiba i Ishak anak nu beleyum anu sa'a-sa'angu'nyomo atina', anu talalo hondo nu kalibosi. Ikiijo' mae, i sa'angu' na bungkutnyo anu Ku potiju'je hi belemiu, osombahkon na anak nu beleyum salaku bau koloban hi belengku anu opapui.”

³Dodo-dodopnyo daagi' subu-subu, i Abraham nombiha-biha'mo kau' bau pompapui koloban ka' nombutu'mo kau' aijo' pinosake'nyo i keledainyo. Ia namba tiba i Ishak ka' ua'aha na mian posaihonnyo mamba i tampat anu pinoto'i nu Tumpu Allah hi ia.

⁴I sinaa ko itolunnyomo tinanggalakonmo i Abraham aijo' mae jo'o-jo'on na tampat aijo'.

⁵Lantas ia notataemo hi posaihonnyo ua'aha aijo', “Jojoongmo na belemiu i aiya tiba keledai aiya. Aku tiba anakku na mamba mokiijo' monsombah Tumpu, po'ule'je kami minsusule' mae hi belemiu.”

⁶I Abraham nomposimbumo kau' anu bau pompaui koloban aijo' hi bekoang i Ishak, ka' ia nomboamo piso' ka' oba nu apu bau pomposuni kau'. Salatan aha i lumajangmo hingga-hinggat,

⁷i Ishak notataemo, “kita Tuuma!” Tinaaman i Abraham, “Apaa anakku?” I Ishak nompokilawamo, “kita nomboamo apu ka' kau', panyo iya na anak nu domba anu opa-opapui bau koloban aijo'?”

⁸Tinaaman i Abraham, “Posi Tumpu Allahje na montoukai anak nu domba aijo'.” Lantas ua-ua'aha i lumajangmo lau-laus.

⁹ Salatan aha tinokamo i tampat anu pinoto'imo nu Tumpu Allah hi Abraham, ia nombaumo sa'angu' na mezbah tampat ponsombahkonan ka' pinotambunmo na kau' anu opapui aijo' aita' i mezbah. Lantas pinungunyomo na anaknyo ka' pinomale'nyomo i mezbah aita' i kau' anu opa-opapui aijo'.

¹⁰Lapas aijo' ingalanyomo na piso'nyo kahanda'mo mompatei anaknyo.

¹¹Panyo malaekat nu Tumpu notatae daka-daka' hi ia, lengkat mae i langit, “Abraham, Abraham!” Tinaaman i Abraham, “Apaa, Tumpu!”

¹²“Boli osakiti nu belento na anak aijo' kabai opoposia nu beleyum na ia”, sumo aijo' na potatae nu Tumpu anu pinoto'i nu malaekat. “Uuka aiya sinumbu'-Kumo taalu' beleyum mongadati ka' tulu-tulutan hi beleng-Ku, kalana beleyum madi' pinanggaga na nombee' anak nu beleyum anu sa'a-sa'angu'nyomo aijo' hi beleng-Ku.”

¹³Lantas i Abraham nosilele' duhu-duhuk ka' nontoa sa'angu' na domba lakinyo te tanduknyo kinalekodanmo nu kandang ka' tinopipuyumo i hemput. I Abraham nongalamo domba aijo' lantas sinombahkonnyomo hi Tumpu salaku bau koloban anu opapui pombolosi anaknyo.

¹⁴I Abraham nonsanggohimo tampat aijo', “Tumpu nontoukaimo anu opalalui.” Ka' sampe uuka aiya mian montaloakonmo, “Aita' i bungkutnyo nu Tumpu, Tumpu nontoukaimo anu opalalui.”

¹⁵Po'ule' mule' lengkat mae i langit malaekat nu Tumpu notataemo daka-daka' toka hi Abraham,

¹⁶ “Tumpu notatae: Aku basumpa' hi posi sanggong-Ku, kalana beleyum nombaumo han aiya ka' madi' pinanggaga na nombee' anak nu beleyum anu sa'a-sa'angu'nyomo aijo' hi beleng-Ku.

¹⁷ Ku balakatimo na beleyum molabi-labi ka' mompotimbalimo lee' nu beleyum susumo mandala' i langit na konjoo'nyo ka' susumo bone' i biwi nu ambai na konjoo'nyo. Makumpu nu beleyum mohungku'ije iwi-iwi' na sampobali' nu aha.

¹⁸ Iwi-iwi' na bansa i dunia mongkakaseje hi belengku da Ku balakati na aha susumo Aku nombalakatimo lee' nu beleyum — kalana beleyum nontulutimo palentah-ngKu.”

¹⁹Lapas aijo' ninsusule'mo na i Abraham hi ua'aha na posaihonnyo, lantas aha hingga-hinggat ninsusule'mo, i Bersyeba, ka' i Abraham jinojoongmo kiijo' mae.

²⁰I Abraham ko utusnyo tu'a sanggonyo i Nahor. Noko lapas na anu jinadimo i Bungkutnyo nu Moria aijo', i Abraham nohongo saba' i Milka bengkele' i Nahor ko anakmo to momo'ane aha uwalu' aijo'mo:

²¹I Us, anu tumpenyo; i Bus, utus ise'nyo; i Kemuel, anu tinimbali tuuma i Aram;

²²I Kesed, i Hazo, i Pildas, i Yidlaf, ka' i Setuel.

²³Anu tinimbali tuuma i Ribka. Aijo'mo na anak aha uwalu' anu i hampe'akon i Milka lengkat hi Nahor utus i Abraham.

²⁴I Nahor ko ambahue'nyo sanggonyo i Reumo ka' ambahue'nyo aijo' nohampeakon mule' i Tebah, i Gaham, i Tahas ka' i Maakha.