Read Saluan KAJADIAN 25 Bible Online

KAJADIAN 25 - Saluan bible

KAJADIAN 25

¹I Abraham po'ule' mule' no'osoa tiba samian na boune sanggonyo i Ketura.

²Bengkele'nyo aijo' nohampeakon to ana-anak sanggonyo: I Zimran, i Yoksan, i Medan, i Midian, i Isybak, ka' i Suah.

³I Yoksan tuuma i Syeba tiba i Dedan, ka' lee' i Dedan aijo'mo mian nu Asyur, mian nu Letus ka' mian nu Leum.

⁴To ana-anak i Midian aijo'mo; i Efa, i Efer, i Henokh, i Abida, ka' i Eldaa. Aha iwi-iwi' lee' i Ketura.

⁵Maumo i Abraham nombee'mo iwi-iwi' na halata'nyo hi Ishak,

⁶tempo'nyo ia daagi' tutuu' ia nombee'imo palasen manjoo' hondo hi to ana-anak anu i humpaknyo hi to bengke-bengkele'nyo sangga'at. Lapas aijo' pinokaunyomo na to ana-anaknyo haha aijo' da molalinmo i da'erah sasu kabete'an Kana'an da matikojo'on hi Ishak anaknyo.

⁷I Abraham sinilaka umunnyo i langkai'mo hondo, tempo'nyo aitu ia 175 mo na taun.

⁹Ia i lamunmo nu to ana-anaknyo, aijo'mo i Ishak ka' i Ismael, i liang Makhpela tampatnyo, i ale' sasu kabete'an Mamre. U'utu mae ale' aijo' tumpunyo i Efron anak i Zohar, mian nu Het,

¹⁰ panyo ingolimo i Abraham hi mian nu Het aijo'. I Sara bengkele' i Abraham, suele i lamun kiijo' mae.

¹¹Salatan i Abraham sinilakamo, Tumpu Allah nombalakatimo i Ishak anak i Abraham. Tempo'nyo aitu i Ishak jinojoongmo koko bubung anu osanggohi, “Ia Anu Mompalahatikan mae Aku”.

¹²I Ismael aijo'mo na anak i Abraham hi Hagar, boune nu Mesir, posaihon i Sara aijo'.

¹³I Ismael ko anak sampulu' ka' ohua', anu sinanggo i aiya tinampu'unan hi utus tu'a ka' lundu-lunduannyo: I Nebayot, i Kedar, i Adbeel, i Mibsam, i Meisyma, i Duma, i Masa, i Hadad, i Tema, i Yetur, i Nafis ka' i Kedma. To ana-anak haha aijo' tinimbalimo mompolee' nu sampulu' ka' ohua' na tulunan nu bansa, ka' kampung ise' ka' pombauan nu aha kemah osanggohimo susumo sanggo nu aha haha aijo'.

¹⁷I Ismael sinilaka umunnyo 137 mo na taun.

¹⁸Lee'nyo jinojoongmo i daerah olot nu Hawila ka' Syur i sasu kabete'an Mesir mompatui mokiijo' i Asyur. Aha tinumuu' madi' notuang tiba lee' i Abraham sangga'at.

¹⁹Aiyamo na sisikon i Ishak, anak i Abraham.

²⁰I Ishak umunnyo patompulu' mo na taun salatan ia no'osoamo tiba i Ribka, utus ise' i Laban, anak i Betuel, mian nu Aram lengkat mae i Mesopotamia.

²¹Kalana i Ribka madi' nohumpak anak, i Ishak nondo'akonmo bengkele'nyo hi Tumpu. Ka' Tumpu nompopo ii'mo do'a i Ishak, sahingga i Ribka pinoboamo.

²²Ia pinoboa anak i hapi', ka' ma'isa pe'e anak haha aijo' i hampe', aha nongkohenggomo i uno nu ma'alumnyo. I Ribka notataemo, “Kadaka' han aiya jinadimo mae hi butongku?” Lantas ia nompoitamo tanga'an hi Tumpu.

²³ Tumpu notataemo hi ia, “Ohua' na bansa i uno nu ma'alum nu beleyum; beleyum mohampeakon ohua' na bansa anu saja' mompaha idek; utus ise' lebe mahoson molingkudui utusnyo tu'a utusnyo tu'a timbali posaihon hi utusnyo tampalui'.”

²⁴Tinokamo na tempo'nyo i Ribka mompohampemo, lantas ia nohampeakonmo ohua' na anak mo'ane hapi'.

²⁵Anu tumpe butongnyo mohaha, ka' kilitnyo sumo juba' anu ko bulunyo. Kalana aijo' ia sinanggohanmo i Esau.

²⁶Salatan anak ko ohua'nyo pinohampemo, limanyo kanyi-kanyinyit i pantigan hi Esau. Kalana aijo' ia sinanggohanmo i Yakub. I Ishak umunnyo anompulu'mo na taun tempo'nyo aha i hampe'.

²⁷Ua-ua'aha na anak aijo' kino daka-daka'nyomo. I Esau tinimbalimo anu pande na mombebas ka' anu saja' mongka'ima'i jojoong i padang bola, panyo i Yakub pakamok ka' mongka'ima'i jojoong i laigan.

²⁸I Ishak mongkalibosi hondo i Esau, kalana i Ishak mongka'ima'i mongkaan ponoha' anu o bebas. Panyo i Ribka mongkalibosi hondo i Yakub.

²⁹Daagi' kino sansinaa tempo'nyo i Yakub hau-haunyo mongkola' utan bue momea', tinokamo na i Esau lengkat mae nombebas. Ia no'ohopmo.

³⁰Ia notatae hi Yakub, “Aku no'ohopmo hondo. Bee'i mae sangkiding bue momea' aijo'.” (Mokonyo aijo' ia osanggohi i Edom.)

³¹Tinaaman i Yakub, “Ii', asan nu bee' pe'e mae momona na hak nu beleyum salaku anak tumpe.”

³²Notatae na i Esau, “Apaa na gunanyo hak aijo' hi belengku. Aku no'ohopmo mompai patemo!”

³³ Notatae mule' na i Yakub, “Basumpa' pe'e momona, beleyum motatae, hak nu beleyum obee'mo mae hi belengku.” I Esau binasumpa'mo ka' nombee'mo haknyo hi Yakub.

³⁴Lapas aijo', i Yakub nombee'imo ia roti, ka' sambagian na utan bue momea' aijo'. I Esau nongkaanmo ka' nonginumo lantas nambamo. Sumo aijo' na i Esau madi'mo nontapali haknyo salaku anak tumpe.