Read Saluan KAJADIAN 26 Bible Online

KAJADIAN 26 - Saluan bible

KAJADIAN 26

¹I lipu' aijo' po'ule' mule' tinoka na tempo' nu kasusa'an i anu okaan, susumo anu toho'mo jinadi tempo'nyo hi Abraham. I Ishak nangadapmo hi Abimelekh, tomundo nu aha mian nu Filistin anu kiijo' i Gerar, ka' nomoita da opobee' jojoong kiijo' mae.

²Han aijo' binaunyo kalana Tumpu nanintoamo hi ia ka' notatae, “Boli mamba mokiijo' i Mesir; jojoongmo i lipu' aiya susumo anu pinalentahkon-Kumo hi beleyum.

³ Ku jagaije na beleyum ka' ku balakati. Songko-songko na da'erah aiya Ku bee'mo hi beleyum ka' hi lee' nu beleyum. Ku ganapije na janji' anu binee'-Kumo hi Abraham tuuma nu beleyum.

⁴Ku bee'ije na beleyum lee' sumo mandala' i langit na konjoo'nyo, ka' songko-songko na da'erah aiya Ku bee'mo hi aha. Iwi-iwi' na bansa i dunia aiya mompoitaje hi beleng-Ku da Ku balakati na aha susumo Aku mombalakatimo lee' nu beleyum.

⁵Ku balakatije na komiu, kalana i Abraham nontulutimo Aku ka' nompo'imboamo iwi-iwi' na atulan ka' palentah-ngKu.”

⁶Jadi jinojoongmo na i Ishak kiijo' mae i Gerar.

⁷ Salatan mian haha kiijo' mae lewa'mo noleleki i Ribka, i Ishak nontaami tukoonyo, aijo' utus ise'nyo misa' bengkele'nyo. I Ishak nabuhuk mo hi mian haha aijo' dumo saidi' mae nu pateimo nu aha na ia ka' nu alamo nu aha na i Ribka anu handa hondo aijo'.

⁸Salatan i Ishak jinojoongmo kiijo' mae gagana'mo pinin, daagi' kino sansinaan i Tomundo Abimelekh nontanggalakon lengkat mae i tolongan nu laigan, tinoanyomo na i Ishak hau-haunyo biang ka' i Ribka.

⁹Sahingga i laganyo na i Ishak ka' ia notatae, “Te misa' boune aijo' bengkele' nu beleyum? Kadaka' nu poto'i tukooyum ia utus ise' nu beleyum?” Tinaaman i Ishak, “Ku tutugi, saidi' mae dumo aku opatei de ku poto'i ia aijo' bengkele'ku.”

¹⁰“Apaa na anu binaumo nu beleyum hi kami?” na koonyo i Abimelekh. “Sala'samian na layatku timbali ahi' hoyot tiba bengkele' nu beleyum, ka' de han aijo' timbali beleyum na montanggungi kasala'an mami aijo'.”

¹¹Lapas aijo' i Abimelekh nompokinde' imo iwi-iwi' na layatnyo sumo uuka, “Ihe na monggeguani mian aiya kabai bengkele'nyo, tionyo o hukum mate.”

¹²I Ishak nonsaumo bine' nombaumo ale' i lipu' aijo', ka' i taun aijo' nohumpak hasinnyo i lipat pininsa'atu na nolingkudui anu sinaunyo, kalana binalakatanmo nu Tumpu na ia.

¹³Kakaya'annyo nompaka pintuangmo ka' ia kinayamo hondo.

¹⁴Mian nu Filistin nongka'idekimo ia kalana ia ko posaihon manjoo', pahasan nu domba ka' sapi'.

¹⁵Lantas pinaha tabuhanmo nu aha nu tano' iwi-iwi' na bubung anu kinekemo nu to posa-posaihon i Abraham tempo'nyo ia daagi' tutuu'.

¹⁶Lapas aijo' i Abimelekh notataemo hi Ishak, “Lako' pala'imo na lipu' mami. Beleyumo na lebe ko kuasa molingkuduimo kami.”

¹⁷Jadi nambamo na i Ishak ka' nombaumo kemah i Bangka'nyo nu Gerar. Ikiijo' ia jinojoongmo gagana' pininmo.

¹⁸Ia po'ule'mo nongkekei to bubu-bubung anu kinekemo tempo'nyo i Abraham ka' anu tinabuhanmo nu tano' nu mian Filistin salatan pinala'ianmo i Abraham. Bubung haha aijo' sinanggohannyomo pokakana susumo pinonsanggohi nu tuumanyo.

¹⁹To posa-posaihon i Ishak nongkekemo bubung i Bangka'nyo nu Gerar aijo', ka' nohumpakmo uee manjoo' hondo.

²⁰Panyo to pola-polaya' binatang anu kiijo' i Gerar pinainggagamo tiba to pola-polaya' binatang i Ishak. Aha notatae, “Uee aiya kami na tumpunyo.” Kalana aijo' i Ishak nonsanggohimo bubung haha aijo', “Painggagan.”

²¹To posa-posaihon i Ishak po'ule' mule' nongkeke bubung sangga'at, sahingga jinadi mule' na painggagan mongkona bubung aijo'. Kalana aitu, i Ishak nonsanggohimo bubung aijo', “Mompaha bali'”.

²²Lapas aijo' ia nolalinmo lengkat ikiijo, ka' nongkeke mule' bubung anu ko pintolunnyomo. Uuka aiya madi'mo ko painggagan. Kalana aitu, i Ishak nonsanggohimo bubung aijo', “Binebasmo”. Ia notatae, “Uuka aiya Tumpu nompobebasmo kita da jojoongmo i lipu' aiya, ka' kita timbalimo sanang i aiya.”

²³Lapas aijo' i Ishak nambamo ka' tinokamo i Bersyeba.

²⁴Pihi-pihi aijo' Tumpu nanintoamo hi ia ka' notatae, “Akumo na Tumpu Allah nu tuuma nu beleyum i Abraham. Boli mabuhuk; Ku jagaije na beleyum. Ku balakatije na beleyum ka' mombee'i beleyum lee' manjoo' kalana anu jinanji'-Kumo hi posaihon-Ku i Abraham.”

²⁵Lantas i Ishak nompotinjomo mezbah ka' nonsombah Tumpu i tampat aijo'. Ia nombau kemah ikiijo' ka' to posa-posaihonnyo nongkekemo bubung sangga'at.

²⁶ Daagi' kino sansinaan i Abimelekh tinokamo lengkat mae i Gerar, tiba i Ahuzat, anu saja' mombee'i pokinde' ia, ka' i Pikhol, kapala nu suludadunyo da singkabot tiba i Ishak.

²⁷Sahingga pinokilawamo i Ishak, “Kadaka' komiu tokamo mae singkabot tiba aku uuka aiya, padahan u'utu mae komiu mongewa aku ka' nolaa'mo mae da opala'i mae na lipu' miu?”

²⁸Lantas tinaamanmo nu aha, “Uuka aiya sinumbu'mo mami taalu' Tumpu monjagai beleyum ka' kami binapikinmo lebe ma'ima' kita balajanji'mo. Basumpa'mo

²⁹saba' beleyum madi' mombau idek hi kami, susumo kami suele madi' toho' nombau idek hi beleyum. Kami nombaumo ima' hi beleyum ka' nompobee'mo beleyum namba ima-ima'. Nanasamo hi kami taalu' beleyum nubalakati nu Tumpu.”

³⁰Lapas aijo' i lagamo i Ishak mongkaan na aha, ka' aha nongkaanmo ka' nonginumo.

³¹Dodododopnyo subu-subu toto samian nontaloakonmo palajanjian anu pinkododomo nu sumpa'. Lantas i Ishak nontaloakonmo pia mae i jalan, hi aha, ka' noga'a-ga'atmo na aha salaku mian anu nobela'mo.

³²I sinaa aitu mule' to posa-posaihon i Ishak tinokamo ka' nonsisik hi ia mongkona bubung anu kinekemo nu aha. Koonyo nu aha, “Kami nohumpakmo uee”.

³³Lantas i Ishak nonsanggohimo bubung aijo', “Sumpa'.” Aijo'mo na pinolengkatan momonanyo sahingga kota aijo' sinanggohanmo Bersyeba.

³⁴Salatan i Esau umunnyo patompulu'mo na taun, ia no'osoamo tiba ohua' na langkoyang lengkat mae i tulunan bansa nu Het, aijo' mo i Yudit anak i Beeri, ka' i Basmat anak i Elon.

³⁵Ua-ua'aha na boune aijo' nonsusa'i hondo kantumuu'an i Ishak ka' i Ribka.