Read Saluan KAJADIAN 27 Bible Online

KAJADIAN 27 - Saluan bible

KAJADIAN 27

¹Daagi' kino sansinaan, salatan i Ishak i langkai'mo ka' mule' pinahamo, i laganyomo na i Esau anaknyo anu tumpenyo, lantas notataemo hi ia, “Anakku!” “Apaa, Tuuma”, tinaaman i Esau.

²I Ishak notatae, “Sinumbu'umo aku aiya i langkai'mo ka' ugaat madi'mo pin na tumuu'.

³Jadi alamo na pana' ka' matanyo, lako'mo mamba pombebas mae sa'angu' na binatang i padang.

⁴Unjang mae ima-ima' susumo anu saja' ku ka'ima'i, ka' boa mae hi belengku. Ku poko kaan ku bee'mo na balakat hi beleyum ma'isa pe'e aku silaka.”

⁵I Ishak binasisik tiba i Esau aijo' i hongo i Ribka. Sahingga salatan i Esau nambamo nombebas,

⁶notataemo na i Ribka hi Yakub, “Sala'je i hongongku hi Tuumaum nompoto'i hi Esau sumo uuka,

⁷'Bebasi mae sa'angu' na binatang ka' unjangakon mae ima-ima' hi belengku. Ku poko kaan, ku bee'mo na balakat hi beleyum i ahop nu Tumpu, ma'isa pe'e aku silaka.'

⁸Jadi, anakku,” na koonyo i Ribka mule', “potombihing mae ka' bau apaa na anu tinaloakonkumo aiya.

⁹Lako' i tampat nu dombanto aijo', ka' pile'i mae ohua' na anak nu mee' anu to lompo-lompo' da ku unjang timbali kaanon anu nuka-nuka ima'i nu tuumaum.

¹⁰Lapas aijo' boaje hi ia da nu kaan, ka' lapas aijo' nu bee'mo na balakatnyo hi beleyum ma'isa pe'e ia silaka.”

¹¹Panyo i Yakub notatae hi tinayo, “O tinangku, te misa' butong i Esau ko bulunyo, panyo butongku madi'an?

¹²Boli-boli tuumangku monsapu butongku ka' nu sumbu' taalu' aku nonga kalimo ia; sahingga misa' balakat na nu bee' mae, panyo ola ahi' mongkutuki mae aku.”

¹³Tinanyo nontaami, “Boli bata-bata, Anak. Bakas akuje na montanggungimo kutuknyo iwi-iwi'. Baumo apaa na anu pinoto'ingkumo aiya, lako'mo ala na mee' haha aijo'.”

¹⁴Sahingga i Yakub nambamo nongala mee' haha aijo' ka' nomboa mae hi tinanyo, lantas ingunjangmo i Ribka na kaanon anu nuka-nuka'ima'i i Ishak.

¹⁵Lapas aijo' ingalamo i Ribka na baju' i Esau anu ma'i-ma'ima' hondo anu pino'una'nyo i laigan, lantas pinopusoknyomo hi Yakub.

¹⁶Pinobobotnyo mule' na kilit nu anak nu mee' i botokonnyo ka' i gogohong i Yakub anu madi' ko bulunyo aijo'.

¹⁷Lantas binee'nyomo hi Yakub na anu ingunjangmo ima-ima' aijo' tiba roti anu binaunyomo.

¹⁸Lapas aijo' nambamo na i Yakub hi tuumanyo ka' notatae, “O Tuumangku!” “Apaa”, tinaaman i Ishak, “ihe na beleyum, i Esau kabai i Yakub?”

¹⁹Tinaaman i Yakub, “I Esau, anak nu belento tuuma anu tumpenyo; potuunon nu belento tuuma binaungkumo. Suhang mae ka' kaan na ponoha' anu binebaskumo anu binoangkumo mae aiya, da belento tuuma mombalakati mae aku.”

²⁰I Ishak notatae, “Nalia' hondo na beleyum nohumpak mae, O Anakku.” Tinaaman i Yakub, “Kalana Tumpu Allah anu nu sombah nu belento tuuma nontulungimo mae aku.”

²¹Lantas notataemo na i Ishak hi Yakub, “Imbo' u'uka mae oha-ohani da ku sapu na beleyum. Pa' totu'u beleyum i Esau?”

²²I Yakub nongohanimo tuumanyo, lantas tuumanyo aijo' nonsapumo ka' notatae, “Potataeum sumo potatae i Yakub, panyo botokonum sumo botokon i Esau.”

²³I Ishak madi'mo nonsumbu' i Yakub kalana botokonnyo nimbulumo susumo botokon i Esau. Panyo salatan ia kahanda'mo mombalakati i Yakub,

²⁴ia daagi' ninsan na po'ule' nompokilawa, “Totu-totu'u beleyum i Esau?” “Totu'u,” na tinaaman i Yakub.

²⁵Lantas notataemo na i Ishak, “Bee' mae na ponoha' itina' hi belengku. De ku poko kaanmo ku bee'mo na balakatku hi beleyum.” I Yakub nombee'mo ponoha' aijo' hi ia ka' suele sangkiding na anggur da o inum.

²⁶Lantas notataemo na tuumanyo hi ia, “Imbo' pompaka ohani mae mule' Anak, ka' ooki mae na aku.”

²⁷ Salatan i Yakub nongohanimo kahanda'mo mongooki ia, i Ishak nongookmo nohong nu baju' i Esau, lantas binalakatannyomo na ia. Koonyo i Ishak, “Nohong nu anakku ma'i-ma'ima' sumomo nohong nu padang anu binalakatanmo nu Tumpu.

²⁸O'amalakon da Tumpu Allah mombee'i ujan lengkat mae i langit, da mompotimbali iwi-iwi' na ale' nu beleyum molumba'! O'amalakon da Ia mombee'i beleyum gandum ka' anggur molabi-labi!

²⁹ O'amalakon da to bansa-bansa timbali posaihon nu beleyum ka' tulunan nu to bansa-bansa matundu' hi beleyum. O'amalakon da beleyum mongkuasai sampoto utusan nu beleyum ka' lee' nu tina nu beleyum monsombah i ahop nu beleyum. O'amalakon da mohumpak kutuk na iwi-iwi' mian anu mongkutuki beleyum ka' mohumpak balakat na iwi-iwi' mian anu mombalakati beleyum.”

³⁰Madi' pinin salatan i Ishak nombee'mo balakatnyo ka' i Yakub nambamo, i Esau, utusnyo tu'a, ninsusule'mo mae namba nombebas.

³¹Ia suele nongunjangmo kaanon anu ma'ima' lantas binoanyomo hi tuumanyo, ia notatae, “Suhang mae, Tuumangku, ka' kaan na ponoha' anu binoangkumo mae bau baginto Tuuma, da obalakati mae nu belento Tuuma na aku.”

³²“Ihe na beleyum?” pinokilawa i Ishak. “I Esau anak nu belento Tuuma anu tumpe”, na pinontaaminyo.

³³I Ishak nontampu'unimo i langkakatan na butongnyo iwi-iwi' ka' ia nompokilawamo, “Desumo aitu ihe na anu nombebasmo binatang ka' nomboamo mae hi belengku u'uka? Kinaankumo ma'isa pe'e beleyum tinoka. Lantas aku nombee'mo balakatku anu pupusnyomo, ka' uuka balakat aiya, tinimbalimo anunyo sidu-sidutu'.”

³⁴Salatan i Esau nohongomo aijo', ia i humangmo daka-daka' ka' talalomo hondo nolibos, lantas ia notataemo, “Balakatiakon mae na aku suele, o Tuumangku.”

³⁵I Ishak notatae, “Utusum ise' tinokamo mae ka' nongakalimo aku. Ia nongalamo balakat anu sabenannyo ku bee' hi beleyum.”

³⁶ I Esau notatae, “Aiyamo na ko pinduannyo ia nongakali aku. Pantasmo na sanggonyo i Yakub. Ia nongalamo hakku salaku anak tumpe, ka' u'uka aiya ia nongala mule' balakat anu aku ahi' na tumpunyo. Te belento Tuuma madi'mo ko balakat sangga'at bau bagingku?”

³⁷I Ishak nontaami, “Pinotimbalingkumo na ia tuan nu beleyum, ka' iwi-iwi' na sampoto utusannyo pinotimbalingkumo posaihonnyo. Binee'kumo hi ia na gandum ka' anggur. Uuka aiya madi'mo daagi' ko apa-apaa anu timbali ku bau, da bau bagium, o Anakku!”

³⁸ I Esau madi' mongka'oho' momohokot na mongkakase hi Tuumanyo, “Te belento Tuuma ola sa'angu' na balakat? Balakatimo mae na aku, o Tuumangku!” Lantas po'ule' mule' i humang na ia.

³⁹ Lapas aijo' i Ishak notataemo hi ia, “Madi'mo daagi ko ujan lengkat mae i langit toka hi beleyum, madi'mo daagi' ko ale' anu molumba' hi beleyum.

⁴⁰ Beleyum me montumuu' nu bajak nu beleyum, panyo de beleyum moto muhuk, beleyum madi'mo nupoko ala nu kuasai.”

⁴¹Sahingga i Esau nongka'idekimo i Yakub, kalana Tuumanyo nombee'mo balakat hi utusnyo ise' aijo'. Ia binapikin, “Madi'mo daagi' pin tuumanyo silakamo, ka' lapas na kami moliwangi, i Yakub ku pateimo!”

⁴²Salatan i Ribka nohongomo tanga'an i Esau aijo', ia noki lagamo mae i Yakub ka' notatae, “Hongo mae, utusum tu'a i Esau ko kahanda'mo mombalosi ka' mompatei beleyum.

⁴³Jadi, bau apaa na anu ku poto'i aiya. Lambamo lia-lia' hi utusku tu'a i Laban anu kiijo' mae i Haran,

⁴⁴ka' jojoongmo hi ia gagana' pin sahingga madi'mo pusa na utusum tu'a.

⁴⁵Ka' ia mongkolilimimo apaa na anu binaumo nu beleyum hi ia. Lapas aijo' ku saije na mian momboa mae beleyum minsusule' mae. Aku madi' mongka'oho' molapus ohu-ohua' na anakku i uno nu sansinaa.”

⁴⁶Sahingga notataemo na i Ribka hi Ishak, “Aku, ma'osamo na montoa to bengke-bengkele' i Esau anu lengkat mae i bansa salipu'an aijo'. De i Yakub suele mo'osoa tiba langkoyang nu Het, sahanyo aku silakamo.”