Read Saluan KAJADIAN 29 Bible Online

KAJADIAN 29 - Saluan bible

KAJADIAN 29

¹I Yakub nolausakonmo lajangnyo ka' nambamo i lipu' sasu kabete'an Kana'an.

²Monti-montiik ia nontoamo sa'angu' na bubung i padang, ka' madi' majo'on ikiijo' notulu na pahasan nu mee' ka' domba anu biasa opo'inum ikiijo' paha-paha lukut. Bubung aijo' kinuluban nu batu anu daka'.

³De iwi-iwi' na pahasan nu mee' ka' domba sihukmo i tampat aijo', to pola-polaya' molingginakonmo batu aijo' i sohipi'nyo lantas opo'inumo na mee' ka' domba haha aijo'. Lapas aijo' to pola-polaya' po'ule'mo mongkulubi bubung aijo'.

⁴Lantas pinokilawamo i Yakub hi to pola-polaya' anu daagi' ikiijo', “To sanga-sangalu lengkat mae iya na belemiu aiya?” “Lengkat mae i Haran”, na tinaaman nu aha.

⁵Po'ule' mule' pinokilawa i Yakub, “Osumbu' miu na i Laban anak i Nahor?” “Osumbu',” na tinaaman nu aha.

⁶“Mosia na bau-baunyo nu kantumuu'an nu aha?” Po'ule' pinokilawa i Yakub. “Ma'i-ma'ima',” Tinaaman nu aha. “Toa, aitumo mae na anaknyo boune sanggonyo i Rahel. Ia tinoka nomboa mae pahasan nu mee' ka' domba nu tuumanyo.”

⁷Notatae na i Yakub, “Daagi' sinaa ma'isa pe'e tempo'nyo na mee' ka' domba oposoop i pangkun. Kadaka' binatang haha aijo' madi' opo'inum nu belemiu, lantas opojohokmo miu da po'ule' mongotot hemput?”

⁸Tinaaman nu aha, “Kami timbalimo mompo'inum domba haha aijo', de iwi-iwi' na pahasan nu domba sihukmo i aiya ka' batu pongku-pongkulubi olingginakonmo.”

⁹Daagi' hau-haunyo i Yakub basisik tiba aha, i Rahel tinokamo tiba pahasan nu mee' ka' dombanyo.

¹⁰Salatan i Yakub nontoamo i Rahel tiba pahasan nu binatang haha aijo', nambamo na i Yakub i bubung aijo', lantas nolingginakonmo batu pongku-pongkulubi i sohipi'nyo ka' nompo'inumo pahasan nu binatang haha aijo'.

¹¹Lapas aijo' ingookannyomo na i Rahel, ka' i humang kalana nolibosmo.

¹²Ia notataemo hi Rahel, “Aku anak i Ribka, utus nu tuuma nu beleyum.” Lantas nopadeka'mo na i Rahel ninsusule' i laigannyo da monsisik han aijo' hi tuumanyo.

¹³Salatan i Laban nohongomo lele mongkona i Yakub, ponuanakonnyo aijo', nopadeka'mo na ia namba nonsingkaboti. I Laban nontanggogolimo i Yakub ka' nongooki ia, lantas nomboamo ninsoop i laigan. Salatan sinisikmo i Yakub na han iwi-iwi' mongkona butongnyo hi Laban,

¹⁴i Laban notataemo, “Memang totu'umo, beleyum julu anu daagi' ohani mae tiba aku.” I Yakub jinojoong i laigan aijo' sina'angu' na bitu'on.

¹⁵Daagi' kino sansinaan pinoto'imo i Laban hi Yakub, “Madi' pantas ola palasuma na beleyum mokalaja hi belengku, mele-melemo beleyum daagi mae julungku. Sangkuka na nu kahanda'i na bau pontamboi?”

¹⁶I Laban ko anak boune ua'aha; anu tumpe sanggonyo i Lea ka' utus ise'nyo sanggonyo i Rahel.

¹⁷I Lea matanyo ma'ima' hondo, panyo i Rahel butongnyo matali' hondo, ka' ohupnyo handaa hondo.

¹⁸I Yakub nongka'ima'imo i Rahel, kalana aijo' tinaamannyomo na i Laban, “Aku mongka'oho' mokalaja popitu' na taun na kopinnyo, de belento Babo' sanang aku mongosoaimo i Rahel.”

¹⁹Notatae na i Laban, “Sahanyo ku bee'mo na ia hi beleyum ka' de mule' hi mian sangga'at; jadi, jojoongmo i aiya.”

²⁰Sahingga nokalajamo na i Yakub pinopitu' na taun na kopinnyo da mongala i Rahel, ka' de hi ia taun haha aijo' motulu ola susumo to pia-pian sinaa kalana ia mongka'ima'i hondo langkoyang aijo'.

²¹Lapas aijo' notataemo na i Yakub hi Laban, “Popitu'mo na taun i aiya; sanangmo mae na belento Babo' da aku mo'osoamo tiba anak nu belento.”

²²Lantas i Laban nombaumo bau-bauon po'osoan ka' nongundangmo iwi-iwi' mian i kota aijo'.

²³Panyo pihi-pihi aijo' misa' i Rahel, panyo i Lea na binoa i Laban hi Yakub, ka' i Yakub noduhusmo tiba ia.

²⁴(I Laban nombee'mo posaihonnyo boune sanggonyo i Zilpa hi Lea, da timbali posaihonnyo.)

²⁵Dodododopnyoje atina'je ka' sinumbu' i Yakub taalu' i Lea, na ingosoannyo. Lantas i Yakub nambamo hi Laban ka' notatae, “Kadaka' belento Babo' nombaumo aku susumo aiya? Te misa' aku nokalajamo da mongala i Rahel? Kadaka' belento Babo' nongakalimo aku?”

²⁶Tinaaman i Laban, “Adat mami i aiya, utus ise' madi' timbali mo'osoa momona moliu-liumo utus tu'a.

²⁷Tanda'imo moko lapas na lamean po'osoan pitun sinaa ku bee'je na i Rahel hi beleyum suele, asan beleyum mongka'oho' mokalaja daagi' popitu' na taun.”

²⁸I Yakub sinitujumo, ka' salatan lamean aijo' ilapasmo, i Laban nombee'mo hi ia i Rahel da bau mule' bengkele'nyo.

²⁹(I Laban nombee' posaihonnyo sanggonyo i Bilha hi Rahel, da timbali posaihonnyo.)

³⁰I Yakub noduhusmo tiba i Rahel, ka' ia lebe mongka'ima'i i Rahel, panyo i Lea madi' talalo nu ka'ima'i. Lapas aijo' ia daagi' nokalaja pinopitu' na taun.

³¹Salatan tinoa nu Tumpu na i Lea madi' talalo nuka'ima'i susumo i Rahel, Tumpu nombee'imo i Lea anak, panyo i Rahel madi' nohumpak anak.

³²I Lea pinoboamo lantas nohampeakonmo samian na anak mo'ane. Ia notatae, “Tumpu nontoamo mae kasusa'anku, ka' uuka aiya langkai'ku nongka'ima'imo aku.” Lantas sinanggohannyomo na anaknyo aijo' i Ruben.

³³I Lea po'ule' mule' pinoboa lantas nohampeakonmo samian na anak mo'ane. Notatae na i Lea “Tumpu nombee'mo mae hi belengku anak aiya mule' kalana i hongo-Nyomo na aku madi' oka'ima'i.” Lantas sinanggohannyomo na anak aijo' i Simeon.

³⁴I Lea po'ule' mule' pinoboa lantas nohampeakonmo samian na anak mo'ane. Ia notatae, “Uuka aiya langkai'ku lebemo mongka'ima'i aku, kalana aku nohampeakonmo totolu'mo na anak mo'ane”. Lantas sinanggohannyomo na anaknyo aijo' i Lewi.

³⁵Lapas aitu i Lea po'ule' mule' pinoboa ka' nohampeakonmo samian na anak mo'ane. Ia notatae, “Uuka aiya aku mompuji'mo Tumpu”. Lantas sinanggohannyomo na anaknyo aijo' i Yehuda. Lapas aitu i Lea madi'mo daagi' nohampeakon.