Read Saluan KAJADIAN 30 Bible Online

KAJADIAN 30 - Saluan bible

KAJADIAN 30

¹Panyo i Rahel ma'isa suele nohumpak anak, kalana aijo' ia ninsihipmo hi utusnyo tu'a, lantas notataemo hi Yakub, “Bee'i mae anak na aku, de madi' aku silakamo.”

²I Yakub nontambuha'imo i Rahel ka' notatae, “Aku aiya misa' Tumpu Allah. Ia na nompotimbali beleyum madi' mohumpak anak.”

³Lantas i Rahel notataemo, “Aiya posaihonku i Bilha, poduhusmo tiba ia da ia mohampeakon. Tiba jalan aijo' aku timbalimo samian na totina, kalana ia”.

⁴Lantas binoanyomo na i Bilha hi langkai'nyo, lantas i Yakub noduhusmo tiba posaihonnyo aijo'.

⁵I Bilha pinoboamo lantas nohampeakonmo samian na anak mo'ane.

⁶I Rahel notataemo, “Tumpu Allah ingadinmo nombee'imo mae anu ku palalui. I hongo-Nyomo mae na do'angku, ka' binee'an-Nyomo mae sa'angu' na anak mo'ane hi belengku”. Lantas sinanggohannyomo na anak aijo' i Dan.

⁷I Bilha pinoboa mule' ka' nohampeakonmo samian na anak mo'ane.

⁸Notatae na i Rahel, “Aku binala usahamo giomo silaka nongewa utusku tu'a, ka' aku inguntungmo,” kalana aijo' sinanggohannyomo na anak aijo' i Naftali.

⁹Salatan sinumbu'mo i Lea taalu' ia madi'mo daagi' mohumpak anak binee'nyomo na posaihonnyo aijo'mo i Zilpa, hi Yakub da bau bengkele'nyo.

¹⁰I Zilpa nohampeakonmo samian na anak mo'ane.

¹¹I Lea notataemo, “Aku inguntungmo,” lantas sinanggohannyomo na anak aijo' i Gad.

¹²I Zilpa po'ule' mule' nohampeakon samian na anak mo'ane,

¹³lantas i Lea notataemo, “Aku binilahimo hondo! Uuka aiya iwi-iwi' na to bou-boune nontaloakonmo aku, binilahimo.” Kalana aijo' sinanggohannyomo na anak aijo' i Asyer.

¹⁴Tempo'nyo pinompadakanmo gandum, i Ruben nambamo i padang bola, ka' i humpaknyo kiijo' mae sangahan na bombong bau pakuli', lantas binonnyomo hi Lea tinanyo. I Rahel notataemo hi Lea, “Bee'i mae na aku ise-ise' bombong atina' da bau pakuli' anu i humpak nu anak nu beleyum aijo'.”

¹⁵Tinaaman i Lea, “Ma'isa sukup na beleyum nongalamo langkai'ku? Uuka aiya beleyum mompaka soba mule' mongala bombong bau pakuli' anu i humpak nu anakku.”

¹⁶Notataemo na i Rahel, “De beleyum mongka'oho' mombee'i mae bombong bau pakuli' anu i humpak nu anak nu beleyum atina' hi belengku, beleyum timbalimo moduhus tiba i Yakub saidi' pihi.” Salatan i Yakub ninsusule'mo mae i laigan lengkat mae i padang malo malom aijo', i lalabotmo i Lea ka' notatae, “Hoyotmo mae tiba aku saidi' pihi, kalana binayankumo na kahanda' aijo' nu bombong bau pakuli' anu i humpak nu anakku”. Lantas noduhusmo na i Yakub pihi-pihi aitu tiba ia.

¹⁷Tumpu Allah nompopo'i'mo do'a i Lea, ka' i pinoboamo lantas nohampeakonmo anak anu ko olima'nyo.

¹⁸Notataemo na i Lea, “Tumpu Allah nontamboimo aku kalana aku nombee'mo i Zilpa hi langkai'ku,” kalana aijo' sinanggohannyomo na anak aijo' i Izakar.

¹⁹I Lea pinoboamo mule' ka' nohampeakonmo anak anu ko anomnyo.

²⁰Ia notataemo, “Tumpu Allah nombee'imo palasen hi belengku anu ma'ima' hondo. Uuka aiya langkai'ku monggangga'imo aku kalana aku nohampeakonmo anom na anak mo'ane,” kalana aijo' sinanggohannyomo na anak aijo' i Zebulon.

²¹Lapas aijo' i Lea nohampeakonmo samian na anak boune anu sinanggohannyomo i Dina.

²²Lantas inginau'mo nu Tumpu Allah na i Rahel; Tumpu Allah nompopo'i'mo do'anyo ka' mombee'i mule' ia mohampeakon anak.

²³Sahingga i Rahel pinoboamo ka' nohampeakonmo samian na anak mo'ane. Notataemo na i Rahel, “Tumpu Allah nongalinakonmo ka ambanganku.

²⁴Ku amalakon da Tumpu po'ule' mule' mombee'i mae aku anak mo'ane samian”. Kalana aijo' sinanggohannyomo na anak aijo' i Yusuf.

²⁵Salatan i Rahel noko hampe'akonmo i Yusuf, i Yakub notataemo hi Laban, “Pobee'mo mae na aku minsusule' i lipu'ku.

²⁶Mambamo na aku ka' ku boamo na bengkele'ku ua-ua'aha tiba to ana-anakku. Aha i humpaku kalana nokalajamo hi belento Babo'. Belento Babo' nonsumbu'mo, aku nokalajamo totu-totu'u.”

²⁷I Laban notataemo hi ia, “Hongo pe'e: Ingoa'ankumo na Tumpu nombalakatimo mae aku kalana beleyum.

²⁸Poto'imo mae pa' sangkuka na nu poita.”

²⁹Tinaaman i Yakub, “Belento Babo' nonsumbu'mo aku anu nokalajamo totu-totu'u, ka' potuu'on nu belento Babo' nompaka panjoo'mo kalana aku na nompotuu'.

³⁰Ma'isa pe'e aku tinoka, halata' nu belento Babo' ma'isa pe'e sangkuka, panyo uuka aiya belento Babo' kinayamo. Tumpu nombalakatimo belento Babo' kalana aku. Uuka aiya tempo'nyomo na aku mokalaja bau kapentingan nu kami salaigan.”

³¹Notataemo na i Laban, “Jadi apaa na anu tionyo ku bee' hi beleyum?” Tinaaman i Yakub, “Bolimo pilenje belento Babo' mombee'i mae apa-apaa. Aku daagi' tataap mompotuu'akon potuu'on nu belento Babo' asan situjui mae na poitaonku uuka:

³²Pobee' mae na aku sinaa aiya lumajang i totonga' nu iwi-iwi' na pahasan nu mee' ka' domba nu belento Babo', ka' mongala batu-batu anak nu domba anu mo'itom, ka' suele batu-batu mee' anu ma'isa daka', ka' belongka' kabai bulitik. Ola aijo' na tambonyo anu ku kahanda'i.

³³Da imihinyo mae dengke na belento Babo' monsumbu' pa' totu-totu'u hodi' na kinyonyoangku. De kita Babo' toka mae mompalesa tambongku ka' montoa daagi' ko mee' anu madi' bulitik kabai belongka', kabai domba anu madi' mo'itom, nusumbu'mo nu belento Babo' taalu' binatang haha aijo' binulingkumo.”

³⁴Tinaamanmo i Laban, “Situjumo! Obauntomo susumo poitaon nu beleyum!”

³⁵Panyo i sinaa aijo' i Laban nongga'atakonmo mee' lakinyo iwi-iwi' anu juhit kabai belongka' ka' mee' behenyo iwi-iwi' anu belongka', bulitik kabai ko galo'nyo pute'; ia mule' mongga'atakonmo domba iwi-iwi' anu mo'itom. Lapas aijo' pinokaunyomo na to ana-anaknyo da mongkalesang binatang haha aijo',

³⁶lantas nambamo na aha tiba binatang haha aijo' matikojo'on hi Yakub, olotnyo olajangi tolun sinaa. Labinyo nu pahasan nu mee' ka' domba anu i Laban aijo' nu pinotuu' i Yakub.

³⁷Lapas aijo' i Yakub nongalamo to panga-panga' nu kau' hawar anu molumba', kau' badam ka' kau' berangan, ka' nongkiliti sambagian na kilitnyo sahingga binelongka'mo.

³⁸Pinotimpasnyo na panga' haha aijo' i ahop nu pahasan nu mee' aijo' i uno nu tampat ponginumannyo, kalana binatang haha aijo' mongka'ima'i mohasi' de tempo'nyomo monginum.

³⁹Jadi de mee' haha aijo' mohasi' i ahop nu panga' haha aijo', anaknyo juhit kabai belongka' kabai bulitik.

⁴⁰Lapas aijo' i Yakub nongalamo domba haha aijo' lantas pinaha po'ahopnyomo mokiijo' i sasu mee' haha aijo' anu juhit ka' mo'itom. Tiba jalan aijo' ia nohumpakmo posi binatangnyo sampahas ka' nongga'atakonmo i pahasan nu binatang i Laban.

⁴¹De to bina-binatang anu mahoson hau-haunyo mohasi', nupotimpasmo i Yakub na panga' haha aijo' anu kinilitannyomo aijo' i ahop nu aha, i uno nu tampat ponginumannyo.

⁴²Panyo panga' haha aijo' madi' ia mompotimpas i ahop nu to bina-binatang anu madi' mahoson. Jadi binatang iwi-iwi' anu mopute' aijo' madi' mahoson, ka' aijo'mo na bahagian i Laban, panyo iwi-iwi' na binatang anu mo'itom, belongka' ka' bulitik aijo' na mahoson, ka' aijo'mo na bahagian i Yakub.

⁴³Tiba jalan anu sumo aijo' i Yakub kinayamo hondo. Ia ko pahasan nu mee' manjoo' hondo, domba, unta, keledai ka' to posa-posaihon.