Read Saluan KAJADIAN 32 Bible Online

KAJADIAN 32 - Saluan bible

KAJADIAN 32

¹I Yakub nolausakonmo lajangnyo. Lantas tinopia-piangkuka na malaekat tinokamo mae monsingkaboti ia.

²Salatan tinoamo i Yakub na aha ia notataemo, “Aiyamo na pinombauan kemah nu Tumpu Allah,” kalana aijo' sinanggohannyomo na tampat aijo' Mahanaim.

³Lapas aijo' i Yakub nonsaimo tinopia-piangkuka na anu i lumajang mamba pe'e i moona i lipu' Edom da singkabot i Esau, utusnyo tu'a.

⁴I Yakub nompoto'i hi aha, “Poto'i hi Esau utusku tu'a sumo uuka: 'Aku i Yakub, posaihon nu belento. Sapinnyo uuka aku jinojoongmo hi Laban.

⁵Uuka aiya aku kino sapi'mo, keledai, domba, mee' ka' to posa-posaihon. Aku mompolele mae lele hi belento tuanku, mongima-imani da kita tuanku sanang mae hi belengku.' ”

⁶Salatan to posa-posaihon ninsusule'mo mae hi Yakub pinoto'imo nu aha, “Kami nambamo hi Esau, utus tu'a nu belento Tuan ka' uuka aiya ia uutumo mae laja-lajang mamba mae singkabot hi belento Tuan. Ia toka mae tiba aha pato atu' na mian.”

⁷Nohongo aijo' i Yakub nabuhukmo hondo ka' binata-batamo. Lantas to mia-mian anu kiijo' hi ia binaginyomo binau ohua' na tompukan, sumo aitu mule' na dombanya, mee'nyo, sapi' ka' untanyo.

⁸Tinutugannyo, “De i Esau toka ka' montumbuhimo tompukannyo anu momona, tantu tompuk anu ko ohua'nyo timbali moko ala mopalai.”

⁹Lapas aijo' i Yakub binalado'amo, “O Tumpu Allah anu nu sombah nu kai'ku i Abraham, ka' tuumangku i Ishak, hongoakon mae na aku! Tumpu nonsaimo aku ninsusule' mae i lipu'ku ka' hi to utu-utusku. Ka' Tumpu nonjanji'mo mompoko ima'imo iwi-iwi' da timbali bau ka'ima'anku.

¹⁰Aku madi' pantas montalima iwi-iwi' na kalibosan ka' kanonongan anu pinotoamo nu Tumpu hi belengku. Tempo'nyo aku nambamo mae notaap i Kaunyo nu Yordan, aku madi' mae nomboa apa-apaa, boli mompiakon tokon. Uuka aiya aku minsusule'mo mae tiba ohua' na tompukan aiya.

¹¹Sabole-boleh ku poita, posalamatakon mae na aku hi utusku tu'a i Esau. Aku mabuhuk boli-boli ia tokamo mae ka' mompateimo mae kami iwi-iwi', sumo aitu mule' boune ka' to ana-anak.

¹² Inau'akon mae kalana Belento Tumpu nojanji'mo mompoko ima'imo iwi-iwi' bau ka'ima'anku ka' mombee'imo lee' manjoo' hi belengku. Madi' ko samian pe'e na moko ala mombilang kalana konjoo'nyo sumo bone' i biwi nu ambai.”

¹³Noko hoyot ikiijo', i Yakub nongalamo sambagian na to bina-binatangyo bau palasen hi Esau. Palasen aijo' aitumo: ua'atu na mee' behenyo, uampulu' na mee' lakinyo, ua'atu na domba behenyo, uampulu' na domba lakinyo, tolumpulu' na unta anu daagi' momposusu, tiba to ana-anaknyo, patompulu' na sapi' behenyo, sampulu' na sapi' lakinyo, uampulu' na keledai behenyo ka' sampulu' na keledai lakinyo.

¹⁶Binagi-baginyo na binatang haha aijo' tinimbali tinopia-piangkuka na tompukan, lantas toto santompuk binee'nyo hi samian na posaihonnyo. Ia notatae hi aha, “Lajangmo maba i moona, aku i mihije, ka' otoa na olotnyo lengkat i tompukan sa'angu' tiba tompukan nu sangga'at.”

¹⁷I Yakub nompalentahkon hi posaihon anu momona, “De utusku tu'a i Esau singkabotmo tiba beleyum, ka' mompopokilawa, 'Ihe na tuan nu beleyum? Moyamo? Ihe na tumpu nu to bina-binatang anu oboa miu atina'?'

¹⁸Otaami, 'Anu nu posaihon nu belento i Yakub. Ia momboa mae aiya da osombahkon hi Esau, tuannyo. Posaihon nu belento i Yakub utuje mae i mihi, kami i moonamo mae.' ”

¹⁹Hi posaihonnyo anu ko ohua'nyo, ka' ko totolu'nyo ka' iwi-iwi' mian anu pinalentahkon montoa ka' mongkalesang pahasan nu binatang haha aijo' binee'annyomo palentah pokakana. Kalana tinutugan i Yakub anu nu sombahkon aijo', de singkabot saidi' mae tiba i Esau bau pohase'nyo da i Esau mongka'oho' mongampuni ia.

²¹Jadi ia nompakatumo mae i moona anu osombahkon aijo', panyo ia daagi' mae sinonso' i nale' i kemah.

²²Pihi-pihi aijo' i Yakub nobulamo lantas nomboamo ua-ua'aha na bengkele'nyo, ua-ua'aha na ambahue'nyo ka' sampulu' sa'angu' na to ana-anaknyo notaapmo i Kaunyo nu Yabok.

²³Noko taapakon aha, ia ninsusule'mo ka' nokiboamo iwi-iwi' na anunyo nokiijo' i santoa.

²⁴ Panyo ia sausa'nyo daagi' jinojoong. Lantas tinokamo na samian na mo'ane nahaluku' tiba i Yakub sampe dodododopnyo subu-subu.

²⁵Salatan ingo'anmo nu mian aijo' taalu' ia madi' untung i pahaluku'an aijo', jinagunnyomo na i Yakub i lampeokannyo aijo' sahingga tinonggoisi'mo na ia.

²⁶Lantas mian aijo' notataemo, “Lapasakonmo mae na aku, madi'mo pin sinaa bete'mo.” Tinaaman i Yakub, “Madi' ku lapasakon na kita Tuan, beilako' kita Tuan mombalakati mae aku.”

²⁷“Ihe na sanggo nu beleyum?” pinokilawa nu mian aijo'. Tinaamannyo, “i Yakub”.

²⁸ Mian aijo' notataemo, “Sanggo nu beleyum misa'mo i Yakub. Beleyum nahaluku'mo tiba Tumpu Allah ka' tiba manusia, ka' beleyum na inguntungmo; kalana aitu sanggo nu beleyum i Israelmo”.

²⁹ I Yakub notatae, “Poto'i mae na sanggo nu Belento Tuan.” Panyo mian aijo' nontaami, “Madi' palalu nu pokilawa ihe na sanggongku!” Lantas binalakatan-Nyomo na i Yakub.

³⁰Lapas aijo' i Yakub notataemo, “Aku nompaha piamo tiba Tumpu Allah, ka' aku daagi' tinumuu'.” Kalana aijo' sinanggohannyomo na tampat aijo' Pniel.

³¹Salatan sinaa binete'mo, pinala'ianmo i Yakub na Pniel, ka' ia pinengko'mo kalana losuan nu lampeokannyo tinonggoisi'mo.

³²Sampe tempo' uuka aiya lee' nu bansa Israel madi' mongkaan antok anu maningkampon i losuan nu lampeokan nu binatang, kalana i Yakub kinonamo nu ponjagun i lampeokannyo.