Read Saluan KAJADIAN 34 Bible Online

KAJADIAN 34 - Saluan bible

KAJADIAN 34

¹Daagi' kino sansinaan i Dina anak boune i Yakub hi Lea, mamba nompaha pia to pia-piangkuka na boune nu Kana'an.

²Salatan i Sikhem, anak i Hemor mian nu Hewi anu tinimbalimo tomundo i da'erah aijo' nontoa i Dina pinalaihakonnyomo na boune aijo', lantas pinasala'nyomo.

³Panyo ia talalomo hondo nongkamilui i Dina, sahingga kina'ima'annyomo na ia ka' noliomo jalan da langkoyang aijo' suele mongka'ima'i ia.

⁴Notataemo na i Sikhem hi tuumanyo, “Ku poita da kita Tuuma molio jalan pa' mosia da ku alamo na langkoyang aijo'. Aku mongka'oho'mo mongosoai ia.”

⁵I Yakub nohongomo anaknyo taalu' nabusikmo na sanggonyo, panyo kalana to ana-anaknyo hau-hauno monjagai potuu'on nu aha kiijo' mae i tampat padang bola, ia ma'isa nombau apa-apaa de ma'isa pe'e aha minsusule' mae.

⁶I Hemor tuuma i Sikhem, tinokamo hi Yakub kahanda'mo basale' tiba ia.

⁷Tempo'nyo aitu to ana-anak i Yakub ninsusule'mo mae lengkat i tampat padang bola. Nohongo han anu jinadimo aijo', aha tinolokengkengmo ka' na'idekanmo hondo na kinyonyoa nu aha. Kalana nompasala'mo anak i Yakub aijo', alati'nyo i Sikhem nongambangimo iwi-iwi' na mian nu Israel.

⁸Notatae na i Hemor hi Yakub, “Anakku i Sikhem nongka'ima'imo anak nu belento Utus; ku poita da belento Utus mompobee'mo mae anakku mo'osoa tiba ia.

⁹Imbo da kita basale' ima-ima' da bansa nu kita Utus ka' bansa mami timbali mompaha oso-osoai.

¹⁰Sahingga to utu-utus timbali jojoong tiba kami i lipu' aiya; iya na anu oka'ima'i nu belento Utus. To Utu-utus timbali badagang ka' mohumpak halata'.”

¹¹Lapas aijo' i Sikhem notataemo hi tuuma i Dina tiba hi to Utu-utusnyo tu'a, “Pobee'mo mae na anu ku poita aiya, da ku bee'mo mau mule' pa' apaa na anu okahanda'i nu belemiu.

¹²Poto'imo mae pa' palasen apaa na anu okamilui nu belemiu, ka' poto'i mae na sompa'nyo. Tionyo ku bee' pa' apaa na anu opoita nu belemiu asan opobee'mo mae nu belemiu na aku mongosoai langkoyang aijo'.”

¹³Kalana i Sikhem nombusikimo sanggo nu utus ise' nu aha i Dina, to ana-anak i Yakub nombaleko'imo i Sikhem ka' i Hemor tuumanyo.

¹⁴Pinoto'i nu aha hi mian ua'aha aijo', “Kami ma'ambang na mompobee' utus ise' mami mo'osoa tiba mian anu madi' basunat.

¹⁵Kami ola timbali monsitujui apaa na anu opoita nu belemiu atina' asan mohongo poitaon mami sumo uuka: Komiu tionyo ahi' timbali sumo kami, alati'nyo iwi-iwi' na mo'ane anu atina' hi komiu tionyo o sunat.

¹⁶Lapas atina' ositujuije mami na anu opoita nu belemiu mongkona mompaha oso-osoai atina'. Kami jojoongmo hi komiu ka' mosa'angu'mo tiba bansa nu belemiu.

¹⁷Panyo de komiu madi' mongka'oho' mongala poitaon mami ka' madi' mongka'oho' o sunat, po'ule'mo o ala mami na langkoyang atina' ka' oboamo mami.”

¹⁸I Hemor ka' i Sikhem nompotutugakonmo poitaon aijo' konanyomo.

¹⁹Sahingga i Sikhem malia-lia' na nongganapi poitaon aijo' kalana ia nongka'ima'imo i Dina. Hi aha iwi-iwi' sampoto utusannyo, i Sikhem-mo na anu talalo opopodaka'.

²⁰Lapas aijo' i Hemor ka' i Sikhem nambamo i tampat pogombuan i sabatan daka' nu kota, ka' nompoto'i hi aha anu jojoong i kota, sumo uuka.

²¹“To mia-mian nu Israel aijo' moto bela'mo tiba kita. Jadi pobee'mo na aha jojoong i lipu' aiya hingga-hinggat tiba kita ka' opoloas na aha mamba moyaya na nuka'ima'i nu aha. Lipu' aiya ewa hondo na bau kajojoongan nu aha suele. Kita timbalimo mo'osoa tiba to lalangkoyang nu aha, ka' aha suele timbalimo mo'osoa tiba to lalangkoyangto.

²²Panyo mian haha aijo' timbali mongka'oho' jojoong tiba kita ka' mosa'angu' timbali bansanto asan tionyo ahi' mombatuki poitaon nu aha, aijo'mo: iwi-iwi' na mo'ane anu aiya hi kita tionyo ahi' o sunat susumo aha.

²³Saba' iwi-iwi' na pahasan nu binatang nu aha ka' iwi-iwi' na halata' nu aha timbalimo anunto. Jadi imbo' da ositujuintomo apaa na anu nupoita nu aha, da aha jojoongmo hingga-hinggat tiba kita.”

²⁴Iwi-iwi' na anu jojoong i kota anu binalagombu aijo' nonsitujuimo poitaon i Hemor ka' i Sikhem, lantas iwi-iwi' na mian to momo'ane anu tu'amo i kota aijo' sinunatmo.

²⁵Kino itolunnyo, tempo'nyo to momo'ane haha aijo' daagi' hau-haunyo masakit kalana sinunatmo, ua'aha na anak i Yakub, aijo'mo utus tu'a i Dina anu sanggonyo i Simeon ka' i Lewi, nongalamo bajak nu aha, lantas hoko-hokot ninsoopmo i uno nu kota. Lantas aha nompateimo iwi-iwi' na mian to momo'ane ikiijo',

²⁶tibamo i Hemor ka' i Sikhem suele. Lantas aha nongalamo i Dina kiijo' i laigan i Sikhem ka' nambamo.

²⁷Noko lapas na nompatei, to ana-anak i Yakub sangga'at nompahuhuimo kota aijo' salaku pombalosi nu aha kalana utus ise' nu aha binusikanmo na sanggonyo.

²⁸Aha nongalamo pahasan nu mee', domba, sapi' ka' keledai, ka' iwi-iwi' apaa na anu daagi' i kota ka' anu kiijo' mae i padang bola.

²⁹Ingalamo nu aha iwi-iwi' na pakakas anu mahan na angga'nyo, binoamo nu aha na to bou-boune iwi-iwi' ka' to ana-anak ka' nompahuhuakonmo iwi-iwi' na isi nu laigan anu i kota aijo'.

³⁰I Yakub notataemo hi Simeon ka' hi Lewi, “Komiu monsusa'imo aku. Uuka aiya mian nu Kana'an ka' mian nu Feris ka' iwi-iwi' na anu jojoong i lipu' aiya mongka'idekimo mae aku. To mia-mianto madi' manjoo'; de mian anu jojoong i lipu' aijo' iwi-iwi' mosa'angu'mo mongewa ka' montumbuhimo mae aku, kita sa'anakan iwi-iwi' nupateimo mae nu aha.”

³¹Panyo aha nontaami, “Kami madi' mompojohok utus ise' mami obaumo susumo anu saja' masala'.”