Read Saluan KAJADIAN 36 Bible Online

KAJADIAN 36 - Saluan bible

KAJADIAN 36

¹Aiyamo na lee' i Esau anu suele osanggohi i Edom.

² I Esau no'osoa tiba boune nu Kana'an aha totolu', aijo'mo: I Ada, anak i Elon mian nu Het; i Oholibama, anak i Ana ka' makumpu i Zibeon mian nu Hewi;

³ i Basmat, anak i Ismael ka' utus ise' i Nebayot.

⁴I Ada nohampeakon i Elifas, i Basmat nohampeakon i Rehuel,

⁵ka' i Oholibama nohampeakon i Yeus, i Yaelam ka' i Korah. Iwi-iwi' na anak haha aijo' i hampe' i lipu' nu Kana'an.

⁶Lapas aijo' i Esau nompala'imo i Yakub ka' nambamo i lipu' sangga'at, iwi-iwi' na bengkele'nyo binoanyo, to ana-anaknyo ka' iwi-iwi' na anu i uno nu laigannyo, hingga-hinggat tiba potuu'on ka' halata' anu i humpaknyo i Kana'an.

⁷I Esau noga'a-ga'atmo nompala'imo i Yakub kalana halata' nu aha talalomo nanjoo' sahingga aha madi'mo timbali tumuu' mosangalu. Apaa mule' i lipu' anu kajojoongan nu aha aijo' madi' manjoo' na ototon nu potuu'on nu aha anu talalomo hondo nanjoo' aijo'.

⁸Sahingga i Esau anu osanggohi suele i Edom, tinataapmo i da'erah bungkutnyo nu Seir.

⁹Aiyamo na lee' i Esau, mompolee' mae nu mian Edom.

¹⁰Bengkele' i Esau sanggonyo i Ada nohampeakonmo samian na anak mo'ane, sanggonyo i Elifas. Ka' i Elifas kino anak mo'ane aha olima', aijo'mo: I Teman, i Omar, i Zefo, i Gaetam ka' i Kenas. I Elifas kino ambahue' sanggonyo, i Timna. Ia nohampeakon anak mo'ane sanggonyo i Amalek. Bengkele' i Esau sanggonyo i Basmat nohampeakon samian na anak mo'ane sanggonyo i Rehuel. Ka' i Rehuel kino anak mo'ane aha opat, aijo'mo: I Nahat, i Zerah, i Syama, ka' i Miza.

¹⁴Bengkele' i Esau sanggonyo i Oholibama, aijo'mo anak i Ada ka' makumpu i Zibeon, nohampeakon anak mo'ane aha totolu' aijo'mo: I Yeus, i Yaelam, ka' i Korah.

¹⁵Aiyamo na kapala nu to tulu-tulunan nu bansa lee' mae i Esau: i Elifas anak tumpe i Esau, mompolee' mae nu to tulu-tulunan nu bansa aijo'mo: i Teman, i Omar, i Zefo, i Kenas,

¹⁶i Korah, i Gaetam, ka' i Amalek. Aha iwi-iwi' lee' mae i Ada bengkele' i Esau.

¹⁷I Rehuel, anak i Esau, aijo'mo na mompolee' mae nu to tulu-tulunan nu bansa haha aiya: I Nahat, i Zerah, i Syama ka' i Miza. Aha iwi-iwi' lee' mae i Basmat, bengkele' i Esau.

¹⁸Tulunan nu bansa haha aiya aijo'mo na lee' mae i Esau hi bengkele'nyo anu osa-osanggohi i Oholibama anak i Ana, nonganak i Yeus, i Yaelam ka' i Korah.

¹⁹Iwi-iwi' na tulunan nu bansa haha aijo' lee' mae i Esau.

²⁰Tumpu nu lipu' i tano' nu Edom nobagi-bagi hi to tulu-tulunan nu aha bansa lee' mae i Seir, aijo'mo mian nu Hori. To tulu-tulunan nu bansa haha aijo', aijo'mo: I Lotan, i Syobal, i Zibeon, i Ana, i Disyon, i Ezer ka' i Disyan.

²²I Lotan aijo'mo na mompolee' mae nu aha mian nu Hori ka' Heman. (I Lotan ko utusnyo boune, aijo'mo i Timna.)

²³I Syobal aijo'mo na mompolee' mae nu aha mian: Alwan, Manahat, Ebal, Syefo ka' Onam.

²⁴I Zibeon kino anak mo'ane ua'aha aijo'mo i Aya ka' i Ana. (I Ana aiyamo na nohumpak mata nu uee anu toto pana-panas i padang bone', tempo'nyo ia nolaya' to kele-keledai nu tuumanyo).

²⁵I Ana aijo'mo na tuuma i Disyon, ka' i Disyon aijo'mo na mompolee' mae nu aha mian Hemdan, Esyban, Yitran ka' Keran. I Ana suele ko anak boune samian, sanggonyo i Oholibama.

²⁷I Ezer aijo'mo na mompolee' mae nu aha mian: Bilhan, Zaawan ka' Akan.

²⁸I Disyan aijo'mo na mompolee' mae nu aha mian: Us ka' Aran.

²⁹Aiyamo na to tulu-tulunan nu bansa aha mian: Hori i lipu' Edom: Lotan, Syobal, Zibeon, Disyon, Ezer ka' Disyan.

³¹Ma'isa pe'e ko tomundo'nyo nompalentah Israel, tomundo haha aiya nompalentahmo i tano' Edom mobolo-bolos: I Bela anak i Beor lengkat mae i Dinhaba. I Yobab anak i Zera lengkat mae i Bozra. I Husyam lengkat i da'erah Teman. I Hadad anak i Bedad lengkat mae i Awit (Iamo na nompatundu' mian nu Midian tempo'nyo nahampate i da'erah nu Moab.) I Samla lengkat mae i Masreka. I Saul lengkat mae i Rehobot i sohipi' nu kaunyo. I Baal-Hanan anak i Akhbor. I Hadar lengkat me i Pahu (sanggonyo nu bengkele'nyo i Mehetabeel, anak i Matred ka' makumpu i Mezahab).

⁴⁰I Esau aijo'mo na mompolee' mae nu to tulu-tulunan bansa Edom haha aiya: I Timna, i Alwa, I Yetet, i Oholibama, i Ela, i Pinon, i Kenas, i Teman, i Mibzar, i Magdiel, ka' i Iram. Batu-batu tulunan nu bansa monsanggohimo da'erah kajojoongannyo o'alamo i sanggonyo.