Read Saluan KAJADIAN 37 Bible Online

KAJADIAN 37 - Saluan bible

KAJADIAN 37

¹I Yakub jinojoongmo i lipu' Kana'an, tampat kinajojoongan nu tuumanyo,

²ka' aiyamo na sisikon nu aha saanakan i Yakub; Tempo'nyo i Yusuf, anak i Yakub umunnyo sampulu'mo ka' popitu' na taun, ia nongkalesangmo pahasan nu mee', domba tiba to utu-utusnyo tu'a, aijo'mo to ana-anak i Bilha ka' i Zilpa, ua-ua'aha aijo' ambahue' nu tuumanyo. Ia nompoto'i hi tuumanyo hahan anu ma'idek anu binaumo nu to utu-utusnyo tu'a.

³I Yakub mongkalibosi hondo i Yusuf, panyo anaknyo sangga'at madi' talalo nu kalibosi, kalana i Yusuf i hampe'akon salatan tumanyo i langkai'mo. Daagi' kino sansinaan kina'utannyomo na i Yusuf sa'angu' na juba' anu talalo hondo ma'ima'.

⁴Salatan to utu-utus tu'a i Yusuf nontoa taalu' tuuma nu aha talalo mongkalibosi i Yusuf, panyo aha na madi' ahi' talalo okalibosi, kina'idekanmo nu aha na i Yusuf, sahingga madi'mo monsampo sisik ima-ima' ia.

⁵Daagi' kino sampahuan i Yusuf nongipimo, ka' tempo'nyo ia nonsisik ipionnyo aijo' hi to utu-utusnyo tu'a, aha nompaka ka'ideki mule' ia.

⁶Uuka na anu sinisik i Yusuf hi aha, “Soba hongo!

⁷Aku nongipi, kita iwi-iwi' hau-haunyo mompuuti gandum kiijo' mae i ale', lantas gandumku na tinuminjo hodi-hodi'. Anu pinaha puutanmo nu belemiu pinotimpasmo montiikubi anu pinuutankumo, lantas nonsombahmo ia.”

⁸“Nu sumbu' beleyum timbalimo tomundo ka' mompalentahmo kami?” tinaloakon nu to utu-utusnyo tu'a. Lantas nompaka ka'idekimo mule' na aha ia, kalana ipionnyo ka' kalana apaa na anu sinisiknyomo.

⁹Lapas aijo' i Yusuf po'ule' mule' nongipi, ka' sinisiknyo mule' hi to utu-utusnyo tu'a, “Aku po'ule' mule' nongipi, aku nontoa batu nu sinaa, bitu'on ka' sampulu' sa'angu' na mandala' monsombah aku.”

¹⁰Ipionnyo aijo' sinisiknyo mule' hi tuumanyo, ka' tuumanyo nontaloakonmo hi ia, ia notatae, “Ipion apaa na itina'? Nu tutugi aku, ka' tina nu beleyum ka' to utu-utus nu beleyum tokamo tolodadupu monsombah beleyum?”

¹¹ To utu-utus tu'a i Yusuf nasakitmo na kinyonyoa nu aha hi ia, panyo tuumanyo saja'mo nompotutugakon ipion aijo'.

¹²Daagi' kino sansinaan tempo'nyo to utu-utusnyo tu'a i Yusuf nambamo nokiijo' i Sikhem molaya' pahasan nu mee' ka' domba nu tuuma nu aha,

¹³notataemo na i Yakub hi Yusuf, “Lako' mamba i Sikhem, i tampat nu to utu-utus tu'a nu beleyum nolaya' pahasan nu mee' ka' dombanto.” Tinaaman i Yusuf, “Ii', kita Tuuma.”

¹⁴Notatae na tuumanyo, “Toa mae pa' mosia na balu-balu'nyo na to utu-utus nu beleyum tu'a ka' pahasan nu mee' ka' domba, lantas pinsusule'mo mae, ka' osisik mae hi belengku.” Lantas pinobakasnyomo na i Yusuf namba nompala'i Bangka'nyo nu Hebron. Madi' pinin tinokamo na i Yusuf kiijo' mae i Sikhem.

¹⁵Hau-haunyo ia lumajang mokiijo' ka' mo'uuka mae i padang bola, siningkabotmo na ia tiba samian na mo'ane anu nompokilawa ia, “apaa na nu lio?”

¹⁶“To utu-utusku tu'a. Aha hau-haunyo molaya' pahasan nu mee' ka' domba,” tinaaman i Yusuf, “Osumbu' nu belento Tuuma iya mae na aha uuka?”

¹⁷Notatae na mian aijo', “Aha nambamo pinala'ianmo nu aha na tampat aiya. I hongongku na aha notatae tukoonyo, aha mambamo mokiijo' i Dotan.” Lantas nambamo na i Yusuf nonsusuakonmo to utu-utusnyo tu'a ka' tinokannyo na aha kiijo'mo i Dotan.

¹⁸Daagi' jo'o-jo'on tinoamo mae nu aha na i Yusuf, ka' ma'isa pe'e ia tinoka hi aha, aha sinangaja'mo kahanda' mompateimo ia.

¹⁹Aha notataemo samian ka' samian, “Toa, anu saja-saja' mongipi, aijo' tinokamo mae.

²⁰Dongan opateintomo na ia, ka' otua na bangke'nyo i uno nu bubung anu madi'mo ko ueenyo. Opoto'intoje saba' ia kinaanmo nu binatang anu mahangas. Otoantoje pa' mosia na katimbaliannyo nu ipionnyo haha aijo'.”

²¹I hongo i Ruben na tanga'an nu aha aijo', lantas ia nogogia'mo kahanda' mompotumuu' i Yusuf. “Boli opatei na ia,” na koonyo.

²²“Ola ahi' otuantomo i uno nu bubung i padang bola aiya, panyo boli obandahinto kabai obelai na ia.” Han aijo' tinaloakonnyo kalana ia kahanda' mompotumuu' i Yusuf ka' nompokaumo ia da minsusule'mo mamba i laigan.

²³Salatan i Yusuf tinokamo hi to utu-utusnyo tu'a, balomo pinakisa nu aha na nongukatakon juba' i Yusuf anu talalo hondo ma'ima' aijo'.

²⁴Lantas i hela'mo nu aha na ia ka' tinuanyomo i uno nu bubung anu madi'mo ko ueenyo.

²⁵Tempo'nyo aha hau-haunyo mongkaan, monti-montiik tinoa nu aha to mia-mian nu Ismael anu badagang hau-haunyo mamba lengkat mae i Gilead mokiijo'mo i Mesir. To unta-unta nu aha ko sake'nyo to lampa-lampa ka' kismis.

²⁶Lantas notataemo na i Yehuda hi to utu-utusnyo, “Apaa na gunanyo na mompatei utusto ise' ka' opohowini na nompatei aijo'?

²⁷Imbo' da opobalukto na ia hi mian nu Ismael haha aijo'. Boli pilenje olanitinto na ia aijo'. Mau mule' pa' mosiamo ia suele ahi' utusto ise'.” To utu-utusnyo sinitujumo,

²⁸ ka' salatan to pia-piangkuka na mian nu Midian anu badagang notulumo, i Yusuf binuatakonmo nu to utu-utusnyo tu'a lengkat aijo' i uno nu bubung lantas pinobalukmo hi mian nu Ismael aijo', olinyo uampulu' na takean nu doi salaka. Lapas aijo' binoamo na ia nu to daga-dagang namba i Mesir.

²⁹Salatan i Ruben po'ule'mo nokiijo' i bubung aijo' ka' madi'mo tinokannyo na i Yusuf ikiijo', bineaknyomo na baju'nyo kalana talalomo hondo molibos.

³⁰Ia ninsusule'mo nokiijo' hi to utu-utusnyo ka' notatae, “Anak aijo' madi'mo daagi' ko anu kiijo'! Apaa na anu tionyo ku bau uuka aiya?”

³¹Lantas aha nongkolotmo sa'angu' na mee' ka' i lobong nu aha na juba' i Yusuf i baso' nu mee' aijo'.

³²Lapas aitu juba' aijo' sinaimo nu aha da oboa hi tuuma nu aha ka' pinotuun, “Juba' aiya i humpak mami. Pa' aiya anu nu anak nu belento tuuma?”

³³Nusumbu' i Yakub na juba' aijo', lantas notataemo, “Totu'u, aiya juba' nu anakku! Tantu ia kinaanmo nu binatang anu mahangas. Paya', na anakku i Yusuf, sinilakamo binea-beakmo nu binatang haha kiijo'!”

³⁴I Yakub nombeakmo baju'nyo kalana talalomo nolibos ka' nompusokmo baju' kalibosan hi mian anu sinilakamo. Sansina-sinaa na ia mohangi anaknyo aijo'.

³⁵Iwi-iwi' na to ana-anaknyo, to momo'ane, kabai to bou-boune toka mongindeko'. Ia notatae, “Sidutu' silaka na aku, aku saja' mohangi anakku.” Sumo aijo'mo na ia saja'mo nolibos monginau', kalana i Yusuf anaknyo sinilakamo.

³⁶Hau-haunyo aijo', kiijo' i Mesir ko to mia-mian nu Midian nompobalukmo i Yusuf hi Potifar, samian na suludadu nu tomundo anu montoongi pangkat kapala monjagai laigan nu tomundo.