Read Saluan KAJADIAN 40 Bible Online

KAJADIAN 40 - Saluan bible

KAJADIAN 40

¹Madi' pinin ua'aha na posaihon nu tomundo Mesir, aijo'mo anu mongkalesang inumonnyo ka' anu mongkalesang rotinyo, nombaumo kasala'an hi tomundo.

²Sahingga notambuha'mo na i tomundo hi ua'aha na posaihonnyo aijo',

³lantas aha pinosoopmo i uno nu talungku' i laigan nu kapala anu monjagai laigan nu tomundo, i tampat suele i Yusuf tinalungku'.

⁴Pinin suele na aha tinalungku' aijo', ka' kapala nu anu monjagai laigan nu tomundo nompalentahmo i Yusuf da mongkalesang aha.

⁵Daagi' kino sampahuan anu mongkalesang inumon ka anu mongkalesang roti toto samian nongipimo. Alati'nyo nu ipion nu aha aijo' madi' pokakana.

⁶Salatan i Yusuf tinokamo hi aha dodododopnyo subu-subu, aha tinoanyo sinusa'mo.

⁷Lantas pinokilawanyomo, “Kadaka' to Utu-utus sinusa'mo sinaa aiya?”

⁸Tinaaman nu aha, “Na'utu pihi-pihi kami nongipimo, ka' madi' ko anu monsumbu' alati'nyo.” Notatae na i Yusuf, “Ola Tumpu Allah na moko ala mompotimbali mian mompoto'i alati'nyo nu ipion. Soba sisik na ipion nu belemiu aijo'.”

⁹Anu mongkalesang inumon aijo' notataemo, “I uno nu ipion aijo' aku nontoa daagi' ko kau' anggur i ahopku.

¹⁰Kau' anggur aijo' ko panga'nyo totolu'. Sala'je na panga'nyo haha aijo' mongkahanda'imo mihon, lia-lia' na to bunga-bunganyo tinimbokamo, lantas bua'nyo i nahamo.

¹¹Tempo'nyo aitu aku hau-haunyo montoongi galas ponginuman i tomundo, jadi ingalangkumo na bua' nu anggur aijo' ka' pinao'kumo i uno nu galas i tomundo, lantas tinatuakonkumo hi ia.”

¹²I Yusuf notataemo, “Uuka na alati'nyo; Totolu' na panga'nyo aijo' alati'nyo tolun sinaa.

¹³Ka' daagi' tolun sinaa uuka i tomundo mompobebasmo beleyum, ia mongampunimo beleyum ka' po'ule'mo mompokalaja beleyum i kalaja u'utu mae. Beleyum po'ule'mo montatuakon galas nu anu o inum hi tomundo susumo u'utu mae.

¹⁴Panyo o inau' mae na aku de beleyum mingkalianganmo. Tulungi potokakon na han nu butongku hi tomundo da aku opobebasmo i talungku' aiya.

¹⁵Kalana, aku sabenannyo naipuan mae i hakop ka' pinalaihakon lengkat mae i lipu' nu mian Ibrani ka' suele mule' i aiya, aiya i Mesir madi' toho' aku nombau anu ma'idek padahan pinosoopmo i uno nu talungku'.”

¹⁶Salatan anu mongkalesang roti aijo' nonsumbu'mo alati'nyo nu ipion nu anu mongkalesang inumon aijo' ma'ima', saba' ia suele nompoto'imo hi Yusuf, “Aku suele nongipi, aku nonsu'un totolu' na kalanjang nu roti i ubak.

¹⁷I uno nu kalanjang anu aita' mae i buannyo hondo-hondo ko ngangahan nu kukis bau bagi nu tomundo, panyo to tomo-tomonsi' tinokamo mae nontoluki kukis haha aijo'.”

¹⁸Tinaaman i Yusuf, “Uuka na alati'nyo nu ipion aijo': Totolu' na kalanjang aijo' alati'nyo tolun sinaa.

¹⁹Daagi' tolun sinaa aiya i tomundo mompalentahmo mian mompolo ubak nu beleyum lantas mompokalayo'mo bangk'e nu beleyum i sa'angu' na ohi', ka' to tomo-tomonsi' tokamo mae montoluki antok nu beleyum.”

²⁰Tinoka tolun sinaa, kakona sinaa kinahampean i tomundo, ia nombaumo bau-bauon anu daka' hondo ka' nolagamo iwi-iwi' na anu ko pangkatnyo. Ia nompalentahkon da anu mongkalesang inumon ka' anu mongkalesang roti, osabatakon mae i talungku' ka' oboa mae hi ahop nu aha iwi-iwi' anu ko pangkatnyo i laigan nu tomundo.

²¹Anu mongkalesang inumon po'ule'mo pinokalajanyo i kalajanyo u'utu mae.

²²Panyo anu mongkalesang roti i hukumo pinatean. Iwi-iwi' aijo' tinimbalimo susumo anu tinaloakonmo i Yusuf.

²³Panyo anu mongkalesang inumon aijo' madi'mo nonginau' i Yusuf, kinolilimannyomo totu-totu'u na ia.