Read Saluan KAJADIAN 42 Bible Online

KAJADIAN 42 - Saluan bible

KAJADIAN 42

¹Salatan i hongo i Yakub taalu' ikiijo' mae i Mesir daagi' ko gandum, notataemo na ia hi to ana-anaknyo, “Kadaka' Belemiu ola mompotongo.

² I hongongku daagi' ko gandum ikiijo' mae i Mesir; lako' mamba mokiijo' mae ka' mongoli gandum da kita madi' silaka nu ohop.”

³Lantas aha sampulu' na utus tu'a i Yusuf haha aijo' nambamo nongoli gandum i Mesir.

⁴Panyo i Yakub madi' nompobee' i Benyamin, tampalui' i Yusuf, anu sa'asa'angu' na labukan, mamba hingga-hinggat tiba aha kalana ia mongkanohobakon boli-boli ko balaa anu montokai mae anaknyo aijo'.

⁵Kalana kasusa'an kaanon i lipu' nu Kana'an, to ana-anak i Yakub tiba suele manjoo' na mian sangga'at tinokamo mongoli gandum i Mesir.

⁶Anu mompobaluk gandum hi to mia-mian anu nolengkat mae i songko-songko na dunia aijo'mo i Yusuf, salaku gubernur kiijo' i Mesir. Kalana aijo' to utu-utus tu'a i Yusuf tinokamo ka' tinolo dadupu i ahopnyo.

⁷Salatan i Yusuf nontoamo to utu-utusnyo tu'a, sinumbu'nyomo na aha, panyo ia nimpula-pulamo madi' monsumbu'. Susumo anu motambuha' na ia nompokilawa aha, “Belemiu mian lengkat mae iya?” “Kami mian nu Kana'an. Kami toka mae mongoli anu okaan,” tinaaman nu aha.

⁸Mau mule' i Yusuf monsumbu' to utu-utusnyo tu'a, panyo aha madi' monsumbu' ia.

⁹ Lantas ia tinonginau'mo i ipionnyo mongkona aha. Ka' notataemo na ia, “Belemiu aiya to koka-kokap; komiu aiya toka mae mondoyoni iya na tampat i lipu' mami aiya anu opoko ala opinsoopi miu.”

¹⁰“Madi', kita Tuanku,” tinaaman nu aha. “Kami to posa-posaihon nu belento Tuan, toka mae ola kahanda' mongoli anu okaan.

¹¹Kami aiya moto utus, kita Tuanku. Kami aiya to mia-mian anu ma'ima', misa' to koka-kokap.”

¹²I Yusuf notatae hi aha, “Madi' totu'u! Belemiu toka mae mondoyoni iya na tampat i lipu' aiya anu opoko ala opinsoopi miu.”

¹³Tinaaman nu aha, “Kami aiya sampulu' ka' ohua' na moto utus kita Tuanku, kami to ana-anak nu samian na tuuma i lipu' nu Kanaan. Samian na utus mami sinilakamo ka' anu tatampalui'nyo tempo' uuka kiijo' mae tiba tuuma mami.”

¹⁴“Memang totu'u susumo anu tinaloakonkumo,” tinaaman i Yusuf, “belemiu aiya to koka-kokap.

¹⁵Soba ku uji' na belemiu: Ku sumpa'akon nu sanggo i tomundo saba' belemiu madi'mo timbali mompala'i lipu' aiya de utus ise' nu belemiu anu tampa-tampalui' aijo' madi' toka mae.

¹⁶Samian atina' hi belemiu tionyo mamba mongala ia. Sangga'at madi' opobee' mamba sampe ko bukuti'nyoje na potatae miu. De madi', tiba sanggo nu tomundo, nyata'mo belemiu aiya to koka-kokap nu sampobali'!”

¹⁷Lapas aijo' aha pinosoopmo i uno nu talungku' tinolun sinaa na kopinnyo.

¹⁸I sinaa ko itolunnyomo i Yusuf notataemo hi aha, “Aku mian anu mabuhuk ka' tulu-tulutan hi Tumpu Allah. Belemiu madi' opoposia asan mombatuki atulanku.

¹⁹Bau pomponyata' taalu' belemiu aiya mian hodi', samian anu atina' hi belemiu daagi' otalungku', ka' sangga'at timbalimo minsusule' ka' momboamo gandum anu ingolimo miu bau kapalaluan nu belemiu sa'anakan anu hau-haunyo nongoa'imo ohop.

²⁰Lapas aijo' oboamo mae nu belemiu na utus ise' nu belemiu anu tatampalui' hi belengku. Aijo'mo na bukuti'nyo saidi' mae taalu' potatae miu memang totu'u, ka' madi' ku hukum mate na komiu.” Aha sinitujumo i kaputusan nu gubernur aijo'.

²¹Lantas notataemo na aha samian ka' samian, “Jadi, kita uuka aiya i hukumo kalana kasala'anto hi utus ise'to u'utu mae; ia nomoitamo tulung panyo madi' pinajulinto, mau mule' tinoantomo na ia sinansalamo hondo. Mokonyo aijo' kita uuka aiya nongoa'imo kasala'an aiya.”

²² Notatae na i Ruben, “Te misa' u'utu mae tinaloakonkumo hi komiu da anak aijo' boli opoposia, panyo belemiu madi' mongka'oho' mohongo. Ka' uuka aiya ia sinilakamo jadi obalosakonmo hi kita.”

²³Nusumbu' i Yusuf na sisik nu aha, panyo aha madi' monsumbu' han aijo', kalana aha basisik tiba i Yusuf pinotokakon nu samian anu monsumbu' basisik i basa' nu Mesir.

²⁴I Yusuf nompala'imo aha, lantas i humangmo salatan po'ule'mo noko ala notatae, ia po'ule'mo ninsusule' hi aha, lantas nongalamo i Simeon, ka' nompokaumo da opungu na ia i ahop nu to utu-utusnyo iwi-iwi'.

²⁵I Yusuf nompalentahmo da to kalu-kalung anu binoa mae nu to utu-utusnyo tu'a o isiakon gandum, ka' doi nu aha toto samian po'isiakon i uno nu kalung haha aijo'. Ka' mule' aha obee'i anu okaan bau mantu nu aha i jalan. Palentahnyo aijo' tinulutanmo.

²⁶Lapas aijo' to utu-utus tu'a i Yusuf nompaha posake'mo gandum haha aijo' anu ingolimo nu aha aijo', i keledai nu aha, lantas aha inambamo lengkat ikiijo'.

²⁷I tampat aha sinonso' nale, sala'samian anu aitu hi aha nombukaimo kalung nu gandumnyo da mongala bau pompakan keledainyo. Tinoanyomo na doinyo tudu-tudu i gandum aijo'.

²⁸“Doingku po'ule' sinule'akon mae,” tinaloakonnyo hi to utu-utusnyo. “Toa aiya i uno nu kalungku!” Kinyonyoa nu aha tinolokengkengmo ka' aha nabuhukmo sahingga aha nompaha poki-pokilawamo, “Apaamo na nubau nu Tumpu Allah hi kita?”

²⁹Salatan tinokamo i Kana'an, aha nonsisikmo hi tuuma nu aha iwi-iwi' apaa na anu tinimbalimo hi aha. Aha notatae,

³⁰“Gubernur nu Mesir notataemo ma'idek hondo hi kami nontuukmo kami mondoyoni lipu' nu aha.

³¹Tinaaman mami, 'Kami to mia-mian anu ma'ima', misa' anu mongkokap, kami mian anu hodi' na kinyonyoa.

³²Kami iwi-iwi' sampulu' ka' ohua' na moto utus, anak nu samian na tuuma, ka' samian na sinilakamo, panyo anu tatampalui kiijo' mae tiba tuuma mami i Kana'an.'

³³Gubernur aijo' nontaloakon, 'Ku uji' na komiu da ku sumbu' pa' belemiu mian anu hodi' na kinyonyoa. Sala'samian anu atina' hi belemiu tionyo ahi' jojoongmo; sangga'at timbalimo minsusule' momboa gandum hi belemiu sa'anakan anu hau-haunyo nongoa'imo ohop.

³⁴De komiu minsusule'mo mae ka' momboamo mae utus ise' nu belemiu anu tatampalui', atina'je ka' ku sumbu' taalu' komiu misa' anu mongkokap, panyo mian anu hodi' na kinyonyoa. Sahingga utus miu anu titinalungku'mo aijo' po'ule'mo ku sule'akon hi belemiu aijo', ka' belemiu timbalimo jojoong i lipu' aiya ka' bebas na badagang.' ”

³⁵Lapas aijo', salatan aha nongalinimo isi nu kalung haha aijo', aha nontoa dompet nu aha toto samian ko isinyo doi; lantas nabuhukmo hondo na aha ka' suele tuuma nu aha.

³⁶Lantas notataemo na tuuma nu aha, “Komiu monsaduakonmo aku, da mingkotmo na anak-ku iwi-iwi'. I Yusuf i madi'mo; i Simeon i madi'mo; ka' uuka aiya komiu nongala mule' i Benyamin. Paya' na kasansala'anku!”

³⁷Lantas notataemo na i Ruben hi tuumanyo, “Bee' mae na i Benyamin hi belengku, kita Tuumangku; po'ule'je ku sule'akon mae, de madi' pateije na anak-ku to momona ua-ua'aha.”

³⁸Panyo i Yakub notatae, “Madi'! I Benyamin madi' timbali oboa miu; utusnyo tu'a sinilakamo ka' uuka aiya me ia na anu daagi'. Boli-boli ia mohumpak balaa' i jalan komiu mamba. Aku aiya langkai'mo, ka' kasusa'an anu saidi' mae opotoka miu mae hi belengku aijo' mongahenakonmo aku silakamo.”