Read Saluan KAJADIAN 44 Bible Online

KAJADIAN 44 - Saluan bible

KAJADIAN 44

¹Hau-haunyo aijo' i Yusuf nompalentahmo to kapa-kapala nu anu mongulus laigannyo, “Isiakon na kalung nu mian haha aijo' nu gandum iyamo na anu nupoko boa nu aha, ka' isiakon doi na kalung nu aha toto samian opotudu i gandum aijo'.

²Po'osiakon suele na mangko'ku salaka i uno nu kalung hi utus ise' nu aha anu tatampalui', tiba doi anu pinongolinyo gandum,” pokauhon aijo' nombaumo apaa na anu pinalentahkonmo aijo'.

³Dodododopnyo, subu-subu hondo i Yusuf noga'a-ga'atmo tiba to utu-utusnyo lantas aha nambamo tiba keledai nu aha.

⁴Aha ma'isa majo'on lengkat i kota aijo', tempo'nyo aijo' i Yusuf notataemo hi kapala nu anu mongulus laigannyo, “Lia-lia' loloi' na mian haha kiijo'. De osampamo, taloakon hi aha, 'Kadaka' komiu nombalosimo ka'ima'an nu ka'idekan?

⁵Kadaka' komiu nombulingmo mangko' salaka nu tuanku? Mangko' aijo' bau ponginumannyo ka' opake bau popohondawitan. Belemiu talalomo hondo nombau anu ma'idek!”

⁶Salatan posaihon aijo' tinokamo hi to utu-utus i Yusuf, pinoto'inyomo apaa na anu pinalentahkonnyomo i Yusuf.

⁷Tinaaman nu aha hi ia, “Mosia na pongka'oho' i Tuan? Kami basumpa' saba' kami madi' nombau anu sumo aijo'!

⁸Posi i Tuan nonsumbu'mo saba' doi anu i humpak i uno nu kalung haha aiya tudu-tudu i gandum aijo', sinule'akonmo mami hi Tuan. Jadi, madi' minsoop i akan na kami nombulingmo salaka kabai mosoni' i laigan nu gubernur!

⁹O Tuan, de bisuannyo balang aijo' o humpak i sala'samian aiya hi kami, bakas na ia da ohukumo o silakai ka' kami timbalimo posaihon i Tuan.”

¹⁰Posaihon aijo' notatae, “Ma'ima'mo; panyo ola hi ia anu pohu-pohumpakan mangko' aijo', iamo na timbali posaihonku; anu sangga-sangga'atannyo timbalimo minsusule'.”

¹¹Lantas lia-lia' na aha toto samian nontau'akon ka' nombukai kalungnyo.

¹²Posaihon i Yusuf aijo' nompalesamo kalung haha aijo' totu-totu'u lengkat pe'e i kalung anu nu utus tumpe tinoka i kalung anu nu tampalui', ka' mangko' aijo' i humpak i uno nu kalung i Benyamin.

¹³To utu-utusnyo tu'a talalomo hondo sinusa' sahingga baju' nu aha binea-beaknyomo. Pinaha posake'mo nu aha na boaon nu aha i keledai ka' po'ule'mo ninsusule' i kota.

¹⁴Salatan i Yehuda ka' to utu-utusnyo tinokamo i laigan i Yusuf, ia daagi' kiijo', ka' aha dinumaladupumo nonsombah i ahopnyo.

¹⁵Lantas notataemo na i Yusuf, “Apaamo na anu binaumo nu belemiu aiya? Madi' osumbu' nu belemiu na mian anu susumo aku aiya daagi' ko ilimu' anu madi' otoa, timbali monsumbu' hahan anu ma'idek anu binaumo nu belemiu?”

¹⁶“Apaa na anu daagi' otaloakon mami o Tuanku?” Tinaaman i Yehuda. “Mosia na kami timbali monggagakon ka' mompototu'u butong mami? Tumpu Allah nompotoamo kasala'an mami. Uuka aiya kami iwi-iwi' timbalimo posaihon nu belento Tuan, misa' ola hi ia anu pinohumpakan mangko' aijo'.”

¹⁷Notatae na i Yusuf, “Madi'! Aku madi' ko kahanda' mombau sumo itina'! Ola ahi ia anu pinohumpakan mangko' aijo' na timbali posaihonku. Sangga'at bebasmo timbalimo minsusule' hi tuuma nu belemiu.”

¹⁸I Yehuda nokiijo'mo nongohani i Yusuf ka' notatae, “Ampun, Tuanku, de timbali da aku motatae pe'e hi belento Tuanku. Boli montambuha'i mae aku; belento Tuanku sumomo Tomundo nu Mesir.

¹⁹Kita Tuanku nompokilawamo hi kami aiya, pa' komiu daagi' ko tuuma kabai utus sangga'at?'

²⁰Tinaaman mami, 'Tuuma mami i langkai'mo ka' utus ise' mami i hampe tempo'nyo tuuma mami i langkai'mo hondo. Utus tu'a anu sa'a-sa'angu' na tina tiba utus ise' mami aijo' sinilakamo, jadi uuka aiya anu aha ua'aha me ia sausa' na daagi' tutuu', ka' tuuma mami talalo hondo mongkalibosi ia.'

²¹Belemiu Tuanku nompalentahmo kami da momboa mae ia mo'uka da belento Tuanku timbali montoa ia,

²²lantas kami nontaami, anak aijo' madi' timbali moga'at hi tuumanyo; de ia moga'at hi tuumanyo, tuuma mami silakamo.

²³Lapas aijo' kita Tuanku notataemo, 'Komiu madi' timbali po'ule' mangadap hi belengku, de madi' momboa mae utus ise' nu belemiu aijo'.'

²⁴Salatan kami ninsusule'mo hi tuuma mami, pinoto'imo mami na potatae nu belento Tuanku aijo'.

²⁵Lapas aijo' tuuma mami po'ule' nonsai kami mamba mae mongoli anu okaan.

²⁶Kami nontaami, 'Kami madi' timbali mamba kalana kami madi' timbali mangadap hi gubernur de utus ise' mami anu tatampalui' madi' mombatuki. Kami timbali mamba mokiijo' ola suele de ia mamba.'

²⁷Lapas aijo' tuuma mami notataemo, 'Osumbu'mo miu saba' i Rahel bengkele'ku, ola ohua' na anaknyo.

²⁸Anu momona tumpenyo nompala'imo aku. Ia tantu kinaanmo nu binatang mahangas, kalana sampe uuka aiya aku madi'mo daagi' nontoa ia.

²⁹De komiu mongalamo anu tatampalui'nyo aiya hi belengku, ka' daagi' ko apa-apaa anu timbali hi ia, kasusa'an anu opotoka miu hi belengku aijo' mongahenakonmo kasilakanku, kalana aku aiya i langkai'mo.' ”

³⁰“Kalana aijo' kita Tuanku,” notatae na i Yehuda hi Yusuf, “De aku minsusule' hi tuuma mami madi'mo ko utus ise' mami aijo', tantu tuuma mami silakamo. Santuu'nyo totoong hi anak aijo', ka' ia talalomo hondo i langkai', sahingga kasusa'an anu opotoka mami hi ia aijo' mongahenakonmo kasilakannyo.

³²Lapas mule', aku binajanji'mo hi tuumangku saba' akumo na bau timbali pontokong anak aijo'. Aku notataemo hi ia, tukongku de aku madi'mo monsule'akon mae anak aijo' hi ia, akumo na montanggung hukuman sampe silaka.

³³Jadi, ku kakaase hi belento Tuanku, de timbali akumo na jojoong i aiya timbali posaihon nu kita Tuanku mombolosakon utus ise' mami aiya; bakas da ia minsusule'mo hingga-hinggat tiba to utu-utusnyo tu'a.

³⁴Mosia na aku timbali minsusule' hi tuuma mami de anak aijo' madi' mombatuki? Aku madi' moko ala mongintim na montoa balaa' anu mongkona tuuma mami aijo'.”