Read Saluan KAJADIAN 45 Bible Online

KAJADIAN 45 - Saluan bible

KAJADIAN 45

¹ I Yusuf madi'mo noko ala nongintim anu uutu i kinyonyoanyo i ahop nu aha anu singkap ko pangkatnyo anu mokalaja hi ia. Kalana aijo' pinalentahnyomo na aha da mosabat i salipi' pokalajan aijo' da ia timbali basisik hi to utu-utusnyo ihe sabenannyo na ia.

²Salatan iwi-iwi' na anu ko pangkatnyo nosabatmo i salipi' pokalajan, atina'je ahi' ka' i Yusuf i humang totu-totu'u, sahingga to mia-mian nu Mesir anu i sambiha' nu salipi' nohongomo, ka' tinoka-tokamo na lele aijo' i laigan nu tomundo.

³I Yusuf notataemo hi to utu-utusnyo, “Aku aiya i Yusuf. Daagi' tuu' na tuumanto?” Nontoa aijo' to utu-utusnyo nabuhukmo hondo sahingga madi'mo noko ala nontaami.

⁴Lantas notataemo na i Yusuf hi aha, “Imbo' po'uuka mae.” Aha nongohanimo, ka' ia po'ule' mule' notatae, “Aku i Yusuf, anu pinobalukmo nu belemiu i Mesir.

⁵Boli mabuhuk kabai monsosoli butong nu belemiu kalana belemiu nompobalukmo aku. Sabenannyo Tumpu Allah na nompopohimoonakonmo nomboa mae aku no'uuka, atina'je ka' belemiu da momposalamat mian da'isan.

⁶Uuka aiya ohua'je na taun na tempo' nu kasusa'an i anu okaan, ka' daagi' olima' na taun na kopinnyo mian madi'mo timbali mompajeko kabai mongala hasin nu ale'.

⁷Tumpu Allah nompopohimoonakonmo nomboa mae aku atina'je ka' belemiu da momposalamat belemiu tiba jalan anu okabangangi aiya da montanggungi kasalamatan nu belemiu da sabole-bole ko lee' na belemiu.

⁸Jadi sabenannyo misa' belemiu na nonsaduakonmo aku tinoka mae i aiya, panyo tanga'an nu Tumpu Allah. Ia nompotimbalimo aku ko pangkat matangkas anu mokalaja hi tomundo nu Mesir. Aku binee'anmo kuasa mongulus kapalaluan nu aha salaigan ka' songko-songko na Mesir.

⁹ Uuka aiya sampamo pinsusule' na belemiu hi tuuma ka' sisik hi ia taalu' i Yusuf anaknyo, notataemo sumo uuka, 'Tumpu Allah nompotimbalimo aku mongkuasai songko-songko na Mesir; mambamo mae lia-lia'.

¹⁰Aha tuuma jojoongmo i da'erah nu Gosyen koko aku — aha tuuma, tiba to maku-makumpu, domba, mee', sapi' ka' iwi-iwi' na anu nu aha tuuma.

¹¹De aha tuuma jojoongmo i Gosyen, aku timbali mompalakai aha tuuma. Tempo' kasusa'an i anu okaan daagi' olima' na taun na kopinnyo ka' ku usahakon da aha tuuma, ka' to ana-anak aha sa'anakan ka' potuu'on nu aha tuuma, boli ko anu maga'a.' ”

¹²Notatae mule' na i Yusuf, “Uuka aiya komiu nosi toamo, beleyum mule' Benyamin, saba' aku totu-totu'u i Yusuf.

¹³Poto'i hi tuumanto mosia na kodaka'nyo nu kuasangku i aiya, i Mesir, ka' sisikakon hi ia iwi-iwi' na anu tinoamo nu belemiu. Lantas boamo mae lia-lia' na ia i aiya.”

¹⁴Lapas aijo' tinanggogolannyomo na i Benyamin utus ise'nyo aijo' lantas i humangmo; i Benyamin suele i humangmo ka' nontanggogolimo i Yusuf mule'.

¹⁵Lapas aijo', hau-haunyo daagi' humang, i Yusuf nontanggogolimo iwi-iwi' na to utu-utusnyo, ka' nongookimo aha. Lapas aijo' aha lewa'mo binasale' tiba ia.

¹⁶Salatan kiijo' i laigan nu tomundo i hongomo na lele taalu' to utu-utus i Yusuf tinokamo mae, i tomundo ka' to pangka-pangkat anu mokalaja hi ia suele sinanangmo.

¹⁷Lantas i tomundo nompoto'imo hi Yusuf, “Palentah na to utu-utus nu beleyum haha aijo' mompaha posake'i gandum i keledai nu aha ka' pinsusule'mo i Kana'an,

¹⁸da mompoboamo mae tuuma nu belemiu ka' aha sa'anakan, lantas polalinmo mae. Aku mombee'ije aha tano' anu ma'ima' hondo, aiya i Mesir, ka' aha mohumpakje kantumuu'an anu sukup i hasin nu tano' aijo'.

¹⁹Palentah na aha mule' momboa lengkat i aiya to pia-piangkuka na kaleta bau kasake'an nu bengkele' ka' to ana-anak nu aha anu daagi' ise' ka' bau kasake'an mae nu tuuma nu aha.

²⁰Bolimo palalu na aha mompotutugakon to bala-balang anu daagi' osusuai na opala'i mae nu aha, kalana anu talalo ma'ima' i songko-songko na Mesir, ahamo na tumpunyo.”

²¹To ana-anak i Yakub nombaumo anu pinalentahkon nu tomundo aijo'. I Yusuf nombee'imo aha tino pia-piangkuka na kaleta susumo anu pinalentahkonmo nu tomundo, ka' mule' mantu anu okaan i jalan.

²²Binee'annyo mule' na aha toto samian sapaan na baju' anu daagi' bu'ou, panyo hi Benyamin binee'annyo tolu'atu na doi salaka ka' olima' na paan na baju' anu daagi' bu'ou.

²³Ia nompakatu hi tuumanyo sampulu' na keledai anu pinosake'an to bala-balang anu ma'ima' hondo lengkat mae i Mesir, ka' sampulu' na keledai mule' anu pinaha posake'an gandum, roti ka' anu okaan sangga'at bau mantu soo' okaan i jalan de mambamo i Mesir.

²⁴Lapas aijo' ia nompolengkatmo to utu-utusnyo, ka' nompoto'i hi aha, “Boli painggaga i jalan.”

²⁵Aha nompala'imo Mesir ka' ninsusule'mo i Kana'an hi Yakub tuuma nu aha.

²⁶“I Yusuf daagi' tutuu'!” Pinoto'i nu aha hi ia, “Ia mongkuasai songko-songko na Mesir!” Nohongo lele aijo', i Yakub binangangmo ka' ia madi' palesaya hi aha.

²⁷Panyo salatan aha nonsisikmo iwi-iwi' apaa na anu tinaloakonmo i Yusuf hi aha, ka' salatan ia nontoamo kaleta anu pinakatu mae i Yusuf bau kasake'annyo ka' da bau pompoboa ia da mambamo i Mesir, ia sininsumbu'mo ka' madi'mo binangang.

²⁸Ia notataemo: “Anakku i Yusuf daagi' tutuu'! Ola aijo' na anu ku kahanda'i! Aku tionyo ahi' mambamo ka' montoa ia da ma'isa pe'e aku silaka!”