Read Saluan KAJADIAN 46 Bible Online

KAJADIAN 46 - Saluan bible

KAJADIAN 46

¹I Yakub nompotoukamo iwi-iwi' na halata'nyo lantas nambamo. Tinoka i Bersyeba ia nonsombahkonmo koloban hi Tumpu Allah anu nunu sombah i Ishak tuumanyo.

²Salatan i nalomo ia nontoamo, Tumpu Allah notatae hi ia, “Yakub, Yakub!” Tinaamannyo, “Apaa, Tumpu”.

³Ia notatae, “Aku Tumpu Allah, Tumpu Allah anu nunu sombah nu tuuma nu beleyum. Boli mabuhuk na mamba mokiijo' i Mesir. Ku potimbalije na lee' nu beleyum bansa anu daka' ikiijo' mae.

⁴Ku sangaluije na beleyum mokiijo' i Mesir, ka' po'ule' momboa mae lee' nu beleyum minsusule' mae i lipu' aiya. I Yusuf na montoa beleyum de tokamo na ukun nu beleyum.”

⁵Lantas nambamo na i Yakub nompala'i Bersyeba. To ana-anaknyo nomposake'mo tuuma nu aha tiba anak ka' bengkele' nu aha i kaleta anu pina-pinakatu mae i tomundo Mesir.

⁶ Aha suele nomboa potuu'on ka' iwi-iwi' na halata' anu i humpak nu aha i Kana'an, lantas nambamo i Mesir. Binoa i Yakub iwi-iwi' na lee'nyo, aijo'mo

⁷iwi-iwi' na makumpunyo mo'ane ka' boune.

⁸To mia-mian anu minsoop sa'anakan i Yakub anu namba nombatuki nokiijo' i Mesir atina'mo:

⁹I Ruben anak tumpe; to ana-anaknyo: I Henokh, i Palu, i Hezron, ka' i Karmi.

¹⁰I Simeon; to ana-anaknyo: I Yemuel, i Yamin, i Ohad, i Yakhin, i Zohar ka' i Saul, anak nu bengkele'nyo i samian na boune nu Kana'an.

¹¹I Lewi to ana-anaknyo: I Gerson, i Kehat ka' i Merari.

¹²I Yehuda to ana-anaknyo: I Syela, i Peres, ka' i Zerah, ka' mule' anak i Yehuda sangga'at, aitumo i Er ka' i Onan sini-sinilakamo i Kana'an. To ana-anak i Peres: I Hezron ka' i Hamul.

¹³I Isakhar to ana-anaknyo: I Tola, i Pua, i Ayub ka' i Simron.

¹⁴I Zebulon to ana-anaknyo: I Sered, i Elon ka' i Yahleel.

¹⁵Aha iwi-iwi' aijo'mo to ana-anak anu i hampe'akon i Lea anaknyo hi Yakub kiijo' mae i Mesopotamia, ka' sangga'at mule' anaknyo boune sanggonyo i Dina. Jadi iwi-iwi' na lee' i Yakub lengkat pe'e hi bengkele'nyo i Lea konjoo'nyo tolumpulu' ka' totolu' na mian.

¹⁶I Gad to ana-anaknyo: I Zifyon, i Hagi, i Syuni, i Ezbon, i Eri, i Arodi ka' i Areli.

¹⁷I Asyer to ana-anaknyo: I Yimna, i Yiswa, i Yiswi ka' i Beria tiba i Serah, utus boune nu aha. To ana-anak i Beria atina'mo i Heber ka' i Malkiel.

¹⁸Aha sampulu' ka' anom aijo' atina'mo na lee' i Yakub hi bengkele'nyo i Zilpa, i Zilpa aijo' posaihon boune anu binee'mo i Laban hi Lea, i Lea aijo' anak boune i Laban.

¹⁹I Rahel bengkele' i Yakub kino anak ua'aha, aijo'mo i Yusuf ka' i Benyamin.

²⁰ Kiijo' i Mesir i Yusuf nohumpak ohua' na anak, aijo'mo i Manasye ka' i Efraim anu i hampe'akon nu bengkele'nyo i Asnat, anak i Potifera anu montoongi imam kiijo' i Heliopolis.

²¹I Benyamin to ana-anaknyo: I Bela, i Bekher, i Asybel, i Gera, i Naaman, i Ehi, i Ros, i Mupim, i Hupim ka' i Ared.

²²Aha sampulu' ka' opat na mian aijo'mo na lee' i Yakub hi bengkele'nyo i Rahel.

²³Ka' mule' i Dan anaknyo i Husim.

²⁴I Naftali to ana-anaknyo: I Yahzeel, i Guni, i Yezer, ka' i Syilem.

²⁵Aha popi-popitu' aijo'mo na lee' i Yakub hi Bilha, posaihonnyo boune i Laban anu binee'nyomo hi Rahel anaknyo.

²⁶Lee' mae i Yakub anu namba nokiijo' i Mesir iwi-iwi' konjoo'nyo anompulu ka' anom na mian, madi' minsoop na to moni-moniannyo.

²⁷ To ana-anak i Yusuf anu i hampe i Mesir ua'aha, sahingga sa'anakan i Yakub anu tinoka i Mesir iwi-iwi' konjoo'nyo pitumpulu' na mian.

²⁸I Yakub nonsai i Yehuda mamba imoona molaga i Yusuf da monsingkaboti tuumanyo kiijo' mae i Gosyen. Salatan aha tinokamo i Gosyen,

²⁹i Yusuf sinumake'mo i kaletanyo da mompaha pia tiba tuumanyo ikiijo' mae. Salatan aha nompaha piamo, tinanggogolanmo i Yusuf na tuumanyo ka' pinin hondo na i humang.

³⁰Notataemo na i Yakub hi Yusuf, “Uuka aiya aku sanangmo na silaka, kalana tinoangkumo na beleyum, ka' sinumbu'kumo taalu' beleyum daagi' tutuu'.”

³¹Lantas notataemo na i Yusuf hi to utu-utusnyo ka' hi to julu-julunyo sangga'at, “Aku tionyo ahi' mamba mompoto'i hi tomundo kalana to utu-utusku ka' iwi-iwi' na to julu-julungku anu jojoong i Kana'an tinokamo mae.

³²Ku poto'ije saba' belemiu to pola-polaya' nu domba ka' sapi', ka' nomboamo mae to bina-binatang nu belemiu ka' iwi-iwi' apaa na anu nu belemiu.

³³De i tomundo molaga belemiu ka' mompokilawa apaa na kalaja nu belemiu

³⁴poto'i hi ia taalu' belemiu daagi' pe'e ise' nompotuu'mo to bina-binatang, susumo mompolee' nu belemiu. Tiba jalan anu sumo aijo' ia monsaimo komiu jojoong i da'erah Gosyen.” I Yusuf nompoto'i sumo aijo' kalana mian nu Mesir mongoa'i madi' pantas na aha mosangalu tiba to pola-polaya' binatang.