Read Saluan KAJADIAN 47 Bible Online

KAJADIAN 47 - Saluan bible

KAJADIAN 47

¹Lapas aijo' i Yusuf nomboamo aha olima' na mian to utu-utusnyo lantas nangadapmo hi tomundo. Ia notatae, “Tuumangku ka' to Utu-utusku tinokamo lengkat mae i Kana'an tiba pahasan nu mee' ka' domba, sapi' ka' iwi-iwi' na anu nu aha. Tempo' uuka aiya aha kiijo'mo i da'erah Gosyen”. Lantas pinaha poto'inyomo na sanggo nu to utu-utusnyo haha aijo' hi tomundo.

³I Tomundo nompokilawamo hi aha, “Apaa na kalaja miu?” Tinaaman nu aha, “Kami aiya polaya' binatang susumo mompolee' mami.

⁴Kami toka da jojoong i lipu' aiya, kalana i tano' Kana'an talalomo sinusa' i anu okaan, sahingga madi'mo ko hemput pompo'ototan pahasan nu mee' ka' domba mami. Pobee' mae na kami jojoong i da'erah Gosyen.”

⁵Lantas notataemo na i tomundo hi Yusuf, “Uuka aiya tuuma nu beleyum ka' to Utu-utus nu beleyum tinokamo i aiya.

⁶Lipu' nu Mesir sumomo posi lipu' nu belemiu. Bakasmo da aha jojoongmo i da'erah Gosyen, da'erah anu ma'ima' hondo i lipu' aiya. Ka' bee'i kalaja na mian anu pande molaya' binatang da mongkalesang potuu'onku.”

⁷I Yusuf suele nompoto'imo sanggo nu tuumanyo aijo' hi tomundo. I Yakub nombalakatimo i tomundo.

⁸Lantas i tomundo nompokilawamo hi ia, “Sangkukamo na umun nu belento Tuuma?”

⁹Tinaaman i Yakub, “Aku tinumuu'mo sa'atu ka tolumpulu'mo na taun salaku mian anu madi' tataap i sa'angu' na tampat. Kantumuu'anku saja' sinusa' ka' madi' tuu'an, de opokakanakon tiba umun nu mompolee'ku salaku mian anu madi' tataap i sa'angu' na tampat.”

¹⁰Lapas aijo' i Yakub siniloloamo ka' nombalakatimo kalana aha noga'a-ga'atmo.

¹¹I Yusuf nontulungimo tuumanyo ka' to utu-utusnyo da jojoongmo i Mesir. Binee'annyomo na aha tano' ka' da timbalimo ahi' anu nu aha totu-totu'u, i bahagian anu ma'ima' hondo i lipu' aijo', koko kota Ramesas, susumo anu pinalentahkonmo i tomundo.

¹²Lantas i Yusuf nontoukaimo posadiaon anu okaan nu tuumanyo ka' iwi-iwi' na to julu-julunyo toka-toka hi anak anu daagi' ise' hondo.

¹³Talalomo hondo kinasusa'an i anu okaan sahingga iyaya mae madi'mo daagi' ko anu okaan. Layat nu Mesir ka' layat nu Kana'an madi'mo moko ala mombau apa-apaa kalana mo'ohop.

¹⁴De aha tokamo mongoli gandum, i Yusuf molimu' doi oli nu gandum aijo', lantas nu po'una' i laigan nu tomundo.

¹⁵Salatan iningkotmo na doi nu Mesir ka' Kana'an, to mia-mian nu Mesir tinokamo hi Yusuf ka' notatae, “Bee'i mae na kami anu okaan! Boli opojohok na kami silakamo. Doi mami iningkotmo.”

¹⁶Tinaaman i Yusuf, “De doi miu iningkotmo, bee' mae na potuu'on miu; ku bee'ije na komiu anu okaan.”

¹⁷Lantas binee'mo nu aha na potuu'on nu aha hi Yusuf, ka' binee'annyomo na aha anu okaan salaku pontolosi ajahan, domba, mee', sapi' ka' keledai nu aha. I taun aijo' i Yusuf nombee'i anu okaan hi aha, ingoli nu aha nu potuu'on.

¹⁸Sinataun, aha po'ule' mule' tinoka hi ia ka' notatae, “Kami mangakumo sahondo-hondonyo hi belento Tuan, saba' doi mami iningkotmo ka' potuu'on mami tinimbalimo belento Tuan na tumpunyo. Kami madi'mo daagi' ko apa-apaa anu timbali obee' mami hi belento Tuan, me butong mami ka' tano' mami.

¹⁹Boli opojohok na kami silakamo! Boli opojohok na tano' mami timbalimo mateges. Olimo na kami ka' tano' mami nu gandum salaku bau pombayan. Kami ka' tano' mami i tomundo'mo na tumpunyo. Bee'i mae na kami gandum da pompolaus pe'e kantumuu'an mami ka' suele bine' da o tugan i ale' mami!”

²⁰Lantas ingolimo i Yusuf iwi-iwi' na tano' nu Mesir sahingga tinimbalimo anu i tomundo. Batu-batu mian nu Mesir nompobalukmo tano'nyo kalana tempo' kasusa'an i anu okaan aijo' tinalalomo hondo; lantas iwi-iwi' na tano' nu Mesir tinimbalimo i tomundo na tumpunyo.

²¹Iwi-iwi' layat nu Mesir binaumo posaihon i Yusuf.

²²Ola tano' anu madi' ingolinyo aijo'mo tano' nu to imam-imam. Aha madi' palalu mompobaluk tano' nu aha kalana tataap nubee'i nu tomundo na aha anu opalalui i kantumuu'an nu aha.

²³I Yusuf notataemo hi layat haha aijo', “Toa, belemiu ka' tano' miu ingolingkumo ka' i tomundo'mo na tumpunyo. Aiya na bine' anu o tugan i ale' miu.

²⁴De mompadakmo, na belemiu tionyo mombee'i mae anu olima' na bahagiannyo, sambahagian na hi tomundo. Labinyo ala hi belemiu da bau bine' ka' okaan nu belemiu ka' bau bagi' nu nu belemiu sa'anakan.”

²⁵Tinaaman nu aha, “Belento Tuan nomposalamatmo kami, ka' kami suele montalima kaseh. Kami sanang na timbali posaihon i tomundo.”

²⁶Lapas aijo' binauakonmo i Yusuf atulannyo i lipu' Mesir, pinoto'inyo anu olima' na bahagian na opadak sambahagian tionyo i tomundo na tumpunyo. Sampe tempo uuka aiya atulan haha aijo' daagi' lewa' obau. Ola tano' nu to imam-imam na madi' timbali nu ala nu tomundo.

²⁷Sumo aijo' na to mia-mian nu Israel jinojoongmo i Mesir, i da'erah Gosyen. Aha kinayamo ka' nomolee'mo manjoo' ikiijo'.

²⁸I Yakub daagi' tinumuu' sinampulu' ka' popitu' na taun i Mesir sampe umunnyo nontokaimo sina'atu ka' pinatompulu' ka' popitu' na taun.

²⁹ Salatan ohanimo na tempo'nyo ia silakamo, ilaganyomo na i Yusuf anaknyo aijo', lantas pinoto'inyomo hi ia, “Potiik mae na lima nu beleyum i olot nu jalempakan nu pa'angku ka' basumpa' saba' beleyujm madi' molamun aku i Mesir aiya.

³⁰Pongka'oho'ku da aku olamun i tampat nu mompolee'ku; boa na bangke'ku lengkat i lipu' aiya ka' lamun i pinolamunan aha.” Lantas tinaamanmo i Yusuf, “Tionyo ahi' ku bau apaa na anu pinoto'imo nu belento uuma atina'.”

³¹Notatae na i Yakub, “Basumpa'mo taalu' tionyo ahi' nubau.” I Yusuf binasumpa'mo, ka' i Yakub nontaloakonmo talima kase hi Tumpu Allah hau-haunyo aijo' i kamale'annyo.