Read Saluan KAJADIAN 48 Bible Online

KAJADIAN 48 - Saluan bible

KAJADIAN 48

¹Madi' pinin ilapas na aijo' pinolelemo hi Yusuf na tuumanyo, sakitnyo naboatmo. Jadi nambamo na ia tiba ua-ua aha na anaknyo, aitumo i Manasye ka' i Efraim da mamba montoa i Yakub.

²Salatan i Yakub nohongo i Yusuf tinokamo, pinaga-pagalanyomo sinumuhang i tampat kahoyotannyo.

³ Notatae na i Yakub hi Yusuf, “Tumpu Allah Anu Daka' hondo na kuasanyo nanintoamo hi belengku kiijo' mae i Lus, i tano' nu Kana'an, ka' nombalakatimo aku.”

⁴Ia notatae hi belengku, “Ku bee'ije na beleyum makumpu manjoo', da lee' nu beleyum timbali bansa anu manjoo'; Ku bee'mo na lipu' aiya hi lee' nu beleyum da ahamo na tumpunyo sampe toka sidu-sidutu'.”

⁵I Yakub notatae mule', “Yusuf, ua-ua'aha na anak nu beleyum i Efraim ka' i Manasye anu i hampe i Mesir aiya ma'isa pe'e aku tinoka i aiya, aijo' sumo-sumomo anakku, pokakanamo sumo i Ruben ka' i Simeon.

⁶De beleyum mohumpak mule anak, aha misa'mo sumo anakku, panyo tataap ahi' anak nu beleyum; pusaka' anu nu humpak nu aha, aha mohumpakje anu lengkat hi Efraim, ka' hi Manasye.

⁷ Ku bau na han aiya sumo aijo' kalana i Rahel tina nu beleyum. Tempo'nyo aku ninsusule'mo mae lengkat i Mesopotamia tina nu beleyum sinilakamo i tano' nu Kana'an, madi' majo'on lengkat i Efrata, ka' aku nolibosmo hondo. Aku nolamunmo ia kiijo' mae i sohipi' nu jalan mamba mokiijo' i Efrata.” (Tempo' uuka Efrata sinanggohanmo Betlehem.)

⁸Salatan i Yakub nontoamo to anak-anak i Yusuf haha aijo' pinokilawanyomo, “Ihe na to ana-anak haha aiya?”

⁹Tinaaman i Yusuf, “Aiyamo na to ana-anakku anu binee' nu Tumpu Allah hi belengku i aiya, i Mesir.” I Yakub notatae, “Po'ohani mae na aha hi belengku da ku balakati.”

¹⁰I Yakub madi'mo manasa na montoa kalana i langkai'mo hondo ka' matanyo pinahaamo. I Yusuf nompo'ohanimo to ana-anaknyo aijo' hi Yakub, lantas tinanggogolannyomo ka' ingookannyomo na aha.

¹¹Lantas notataemo na i Yakub hi Yusuf, “Madi'mo tinaha'imananku daagi' singkabot tiba beleyum, panyo uuka aiya Tumpu Allah ahi' na nompobee' aku da montoa to ana-anak nu beleyum.”

¹²Lapas aijo' i Yusuf nongalamo aha aijo' tanggo-tanggogon hi Yakub, lantas ia tinolodadupumo i ahop nu tuumanyo.

¹³Lapas aijo' i Yusuf nompo'ohanimo ua-ua'aha na anaknyo hi Yakub, i Efraim anu tatampalui' aijo' i sasu kewe' ka' i Manasye i sasu koanan. Panyo i Yakub nompotiik limanyo koanan i ubak hi Efraim, lantas nompotiik limanyo kewa' i ubak hi Manasye.

¹⁵Lapas binalakatannyomo na i Yusuf, ia notatae, “Tumpu Allah, Iamo na Tumpu, anu nu sombah i Abraham ka' i Ishak. Iamo na nolaya' aku sampe tempo' uuka aiya;

¹⁶Iamo na malaekat anu nonjagaimo mae aku sahingga iwi-iwi' na balaa' madi'mo mompoposia. O'amalakon da Tumpu Allah mombalakati anak haha aiya. O'amalakon da saja' osanggo na sanggongku ka' sanggo i Abraham ka' i Ishak kalana anak haha aiya! O'amalakon da aha mohumpak makumpu, ka' ko lee' manjoo' i dunia aiya.”

¹⁷I Yusuf madi'mo sinanang salatan nontoa tuumanyo nompotiikmo limanyo koanan i ubak hi Efraim, lantas tinoongannyo na lima nu tuumanyo da molalin limanyo anu aijo' i ubak hi Efraim opokiijo'akon hi ubak i Manasye.

¹⁸Ia notatae hi tuumanyo, “Boli sumo aitu kita Tuuma, aiya na anak anu tumpe-tumpe; potiik kita Tuuma na limanto koanan i ubaknyo.”

¹⁹Panyo ginagakon nu tuumanyo, ia notatae, “Ku sumbu', na anakku, ku sumbu'. I Manasye timbali daka' na kuasanyo ka' lee'nyo timbali bansa anu manjoo'. Panyo utusnyo ise' na lebe daka' na kuasanyo molingkudui ia ka' lee' nu utusnyo ise' aijo' timbali to bansa-bansa anu manjoo'.”

²⁰ Lantas po'ule' mule' binalakatannyo na anak haha aijo' i sinaa aitu, ia notatae, “Mian nu Israel monsanggo sanggo nu belemiu de aha mombalakatimo mian. Aha notatae, 'O'amalakon da Tumpu Allah mompotimbali beleyum susumo i Efraim ka' i Manasye.' ” Tiba jalan anu sumo aijo' i Yakub lebe mompalahatikan i Efraim kalana ia na saidi' mae molingkudui i Manasye.

²¹Lantas notataemo na i Yakub hi Yusuf, “Sumo anu tinoamo nu beleyum, ukunku silaka malia'mo, panyo Tumpu Allah na montulungi belemiu ka' momboa belemiu minsusule' i lipu' nu mompolee' nu belemiu.

²²Olamo hi beleyum, misa' hi to utu-utus nu belemiu, ku bee'mo na Sikhem da'erah anu molumba' aijo' anu i humpaku nompatundu' mian nu Amori nu bajak ka' pana'ku.”