Read Saluan KAJADIAN 49 Bible Online

KAJADIAN 49 - Saluan bible

KAJADIAN 49

¹Lapas aijo' i Yakub nolagamo to ana-anaknyo ka' notatae, “Imbo' sihuk mae i aiya, koko aku. Da ku poto'i hi belemiu apaa na anu o'oa'ije nu belemiu, sinaa aiya mae i mihi:

²Sihu'mo mae, na to ana-anak i Yakub, potombihing mae na i Israel, tuuma nu belemiu.

³I Ruben, anakku tumpe, beleyumo na kahosonanku, bua' momona nu kabaanianku. Beleyum baani hondo ka' mahoson hondo molingkudui anakku iwi-iwi'.

⁴Beleyum dengke na mokokembong susumo uee, sahingga misa'mo anu tongkoimoona; kalana beleyum nongkamale'imo ambahue'ku, beleyum nombusikimo kamale'an nu tuuma nu beleyum.

⁵I Simeon ka' i Lewi moto utus; toongon anu bau pimuhuk tinimbalimo binau kabaanian nu aha.

⁶Aku madi' nanintuang i posa'angu'an nu aha binatanga', ka' suele madi' ninsoop i posa'angu'an nu aha. Kalana aha motambuha'mo sahingga aha nompateimo, nompengko'imo sapi' kalana molio kasanangan.

⁷Mohumpak kutuk na tambuha' nu aha, kalana talalomo hondo. Mohumpak kutuk na pusa nu aha, anu tala-talalomo ahi' nombau han anu ma'idek. Ku ga'a-ga'atakonmo na aha hi songko-songko na Israel. Ku bagi-bagimo na aha hi songko-songko na bansa.

⁸I Yehuda, beleyum mompateije to mia-mian anu monsampobali' beleyum, to Utu-utus nu beleyum mompuji'mo beleyum ka' monsombah i ahop nu beleyum.

⁹ I Yehuda sumo singa anu daagi' bata'nyo; ia mompatei gampanyo binatang da nu kaan, lantas po'ule' minsusule' jojoong i liangnyo; ia uminyohatmo lantas lumukutmo, ka' madi' ko samian pe'e na baani mohenggo ia.

¹⁰I Yehuda na montoongi tokon nu tomundo da mompalentah, lee'nyo na mompalentah sampe toka sidu-sidutu'. To bansa-bansa momboa hasin, ka' monsombah i ahopnyo kalana ia okabuhuk.

¹¹Anak nu keledainyo pinosegotnyomo i kau', i kau' anggur anu ma'ima' hondo. Ia mombaso'i hudenyo nu anggur, anggur momea' susumo baso'.

¹²Matanyo nomea'mo kalana monginumo anggur, bese'nyo nopute'mo kalana monginumo susu.

¹³I Zebulon jojoong koko ambai; to kapa-kapan manilabumo i biwi nu bone'; toka-toka i Sidon na potempasan nu da'erahnyo.

¹⁴I Isakhar aijo' sumomo keledai anu mahoson luku-lukut i olot nu kalanjang anu lewa' oposake' hi ia.

¹⁵Nu toa ma'ima' hondo na tampat aijo' ka' nu toa ma'ima' hondo na lipu' aijo', sahingga natidukumo na ia ka' sanang na oposake'i boaon, ka' opakisa na mokalaja susumo posaihon.

¹⁶Beleyum Dan, na momputusi bansa nu beleyum beleyum timbalimo tulunan nu bansa susumo bansa sangga'at hi aha i Israel.

¹⁷Beleyum sumomo ulo i sambiha' nu jalan, ulo anu ko bisa'nyo i biwi nu jalan ise', anu montubuk pantigan nu ajahan sahingga anu monsake'i mabuhukmo.

¹⁸O Tumpu, kasalamatan anu obee' nu Belento aijo'mo na anu kupo-kupopea'.

¹⁹I Gad, beleyum nutumbuhi nu tololang, panyo po'ule' suele nutololangi nu beleyum na aha.

²⁰I Asyer, anu okaan miu molabi-labih ka' to ima-ima', beleyum na montoukai anu nukaan nu to tomu-tomundo.

²¹I Naftali, sumomo jonga anu lapa-lapas, to ima-ima' na to ana-anaknyo.

²²I Yusuf sumomo keledai anu daagi' bata'nyo, keledai anu ma'ela' koko mata nu uee lewa' mopadeka' isohipi' nu bungkutnyo.

²³Nupoko idek hondo nu sampobali'nyo na montumbuhi ia, tiba pana' ka' hihisnyo na pontumputnyo.

²⁴Panyo i Yusuf tatap mahoson na limanyo, tataap mahoson na pana'nyo, kalana Daka' hondo na kuasa nu Anu monjagai ia, Tumpu Allah i Yakub, na anu monjagai Israel.

²⁵Tumpu Allah nu tuuma nu beleyum na montulungi beleyum; Anu Daka' hondo na kuasanyo na mombalakati beleyum, aijo'mo ujan lengkat mae i langit ka' uee lengkat mae i uno nu tano'. Tiba anak ka' sapi', gandum ka' buhaknyo.

²⁶Balakat nu Tumpu Allah, nu tuuma nu beleyum molingkudui kakaya'an nu to bungku-bungkutnyo anu pininmo hondo. O amalakon da balakat aijo' toka mae iwi-iwi' aita' i ubak i Yusuf, aita' i siakannyo. Iamo na anu talasanggo molingkudui to utu-utusnyo.

²⁷I Benyamin aijo'mo serigala anu mahangas hondo. Daagi' subu ia monsa'umo sangko binatangnyo bau kaanonnyo. De pihimo ia mombagi-bagiakonmo.”

²⁸Aijo'mo na aha anu sampulu' ka' ohua' na tulunan nu bansa Israel, ka' potatae anu tinaloakonmo nu tuuma nu aha salatan nonsalando'amo hi aha toto samian kalana moga'a-ga'atmo.

²⁹ Lapas aijo' i Yakub nompotuunmo hi to ana-anaknyo, “Gagana' uuka aku silakamo susumo mompolee'ku. Lamun na aku i sohipi' nu aha i liang anu kiijo' i Makhpela, sasu kabete'an Mamre i tano' nu Kana'an. I Abraham nongolimo liang ka' ale' koko Efron mian nu Het da bau polamunan.

³¹ Ikiijo anu pinolamunan i Abraham ka' i Sara, i Ishak ka' i Ribka; ka' ikiijo' suele na pinolamunanku i Lea.

³²Ale' ka' liang anu daagi' ikiijo' ingolimo hi mian nu Het. Lamun na aku ikiijo'.”

³³ Noko potuun na i Yakub hi to ana-anaknyo, i nale'mo na ia lantas sinilakamo.