Read Saluan KAJADIAN 5 Bible Online

KAJADIAN 5 - Saluan bible

KAJADIAN 5

¹ Aiyamo na daputan nu lee' i Adam. (Tempo'nyo aitu Tumpu Allah nompotimbalimo manusia, binau-Nyomo na aha susumo Tumpu Allah.

² Binau-Nyomo na aha mo'ane ka' boune. Aha binalakatan-Nyomo ka' sinanggohan-Nyomo “Manusia”.)

³Salatan i Adam umunnyo 130 mo na taun, ia nohumpakmo anak mo'ane anu monsasuhi mae butongnyo lantas sinanggohan-Nyomo i Set.

⁴Lapas aitu i Adam daagi' tinumuu' 800 na taun ka' nohumpak mule' to anak-anak sangga'at.

⁵Ia sinilaka umunnyo 930 mo na taun.

⁶Salatan i Set umunnyo 105 mo na taun, ia nohumpak mule' anak mo'ane, sanggonyo i Enos.

⁷Lapas aitu i Set daagi' tinumuu' 807 na taun ka' nohumpak mule' to anak-anak sangga'at.

⁸Ia sinilaka umunnyo 912 mo na taun.

⁹Salatan i Enos umunnyo 90 mo na taun, ia nohumpakmo anak mo'ane, sanggonyo i Kenan.

¹⁰Lapas aitu i Enos daagi' tinumuu' 815 na taun ka' nohumpak mule' to anak-anak sangga'at.

¹¹Ia sinilaka umunnyo 905 mo na taun.

¹²Salatan i Kenan umunnyo 70 mo na taun, ia nohumpakmo anak mo'ane, sanggonyo i Mahalaleel.

¹³I Kenan daagi' tinumuu' 840 na taun ka' nohumpak mule' to anak-anak sangga'at.

¹⁴Ia sinilaka umunnyo 910 mo na taun.

¹⁵Salatan i Mahalaleel umunnyo 65 mo na taun, ia nohumpakmo anak mo'ane, sanggonyo i Yared.

¹⁶Lapas aitu i Mahalaleel daagi' tinumuu' 830 na taun ka' nohumpak mule' to anak-anak sangga'at.

¹⁷Ia sinilaka umunnyo 895 mo na taun.

¹⁸Salatan i Yared umunnyo 162 mo na taun, ia nohumpakmo anak mo'ane sanggonyo i Henokh.

¹⁹Lapas aitu i Yared daagi' ti numuu' 800 na taun ka' nohumpak mule' to anak-anak sangga'at.

²⁰Ia sinilaka umunnyo 962 mo na taun.

²¹Salatan i Henokh umunnyo 65 mo na taun, ia nohumpakmo anak mo'ane sanggonyo i Metusalah.

²²Lapas aitu kantumuu'an i Henokh saja'mo mompaha kona tiba Tumpu Allah 300 na taun na kinopinnyo. Ia nohumpak to ana-anak sangga'at,

²³ka' umunnyo 365 mo na taun.

²⁴ Kalana kantumuu'an i Henokh saja'mo nompaha kona tiba Tumpu Allah, ia nolapusmo kalana binoamo nu Tumpu Allah.

²⁵Salatan i Metusalah umunnyo 187 mo na taun, ia nohumpakmo anak mo'ane sanggonyo i Lamekh.

²⁶Lapas aitu i Metusalah daagi' tinumuu' 782 na taun, ka' nohumpak mule' to anak-anak sangga'at.

²⁷Ia sinilaka umunnyo 969 mo na taun.

²⁸Salatan i Lamekh umunnyo 182 mo na taun, ia nohumpakmo anak mo'ane.

²⁹I Lamekh notataemo, “Anak aiya na saidi' mae montulungi kita de tahahumo na mokalaja, mongusahakon tano' anu kinutukan mo nu Tumpu.” Kalana aijo' sinanggoahanmo i Lamekh na anak aijo' i Nuh.

³⁰Lapas aitu i Lamekh daagi' tinumuu' 595 na taun. Ia nohumpak mule' to ana-anak sangga'at,

³¹ka' ia sinilakamo umunnyo 777 mo na taun.

³²Salatan i Nuh umunnyo 500 mo na taun, ia nohumpakmo totolu' na anak mo'ane aijo'mo, i Sem, i Ham, ka'i Yafet.