Read Saluan KAJADIAN 50 Bible Online

KAJADIAN 50 - Saluan bible

KAJADIAN 50

¹I Yusuf tinomale'mo i butong nu tuumanyo ka' i humangmo ka' ka' nogookimo ohupnyo.

²Lantas i Yusuf nompalentahmo anu monsumbu' mompakuli'i bangke' nu to lampa-lampa da boli ma'idek na bangke' i Yakub.

³Nombau usaha aijo' pinatompulu' na sinaa na kinopinnyo, aijo'mo tempo' anu biasanyo ogunakon mompokonai to lampa-lampa i bangke' nu mian. Mian nu Mesir nontoongi toonnyo nu kinasilakaan i Yakub, pinatompulu' na sinaa na kinopinnyo.

⁴Salatan ilapasmo na tempo'nyo nontoongi toonnyo, notataemo na i Yusuf hi anu ko pangkat mokalaja hi tomundo, “Potokakon na potuunon aiya hi tomundo,

⁵ 'Salatan tuumangku ohanimo na ukunnyo, pinokaunyomo na aku da mojanji' hi ia, da aku tionyo ahi' molamun ia i polamunan anu pinotoukanyomo i tano' nu Kana'an. Kalana aitu, pobee' pe'e mae na aku mamba molamun tuumangku. Lapas aijo' aku mambaje mae.' ”

⁶Lantas notataemo na i tomundo, “Lako'mo mamba lamun na tuuma nu beleyum susumo anu jinanji'mo nu beleyum hi ia.”

⁷Lantas nambamo na i Yusuf molamun tuumanyo. Iwi-iwi' na anu ko pangkatnyo, to tu'a-tu'anyo anu mokalaja i laigan nu tomundo ka' iwi-iwi' na anu ko pangkatnyo daka' i Mesir nambamo hingga-hinggat tiba i Yusuf.

⁸Aha sa'anakan, to utu-utusnyo, ka' to julu-julunyo sangga'at i nambamo suele. Ola to ana-anak ise' ka' potuu'on nu aha na madi' binoa i da'erah Gosyen.

⁹Gombuan nu suludadu anu sinumake' i kaleta ka' sinumake' i ajahan suele nombatukimo, sahingga nokunyanyat manjoo' hondo na mian anu nomboa aijo'.

¹⁰Salatan aha tinokamo i tampat nu mian anu mongutut gandum kiijo' i Goren-Haatad, i sasu kabete'an Kaunyo nu Yordan, aha nontando'imo kalana nolibosmo hondo. I Yusuf nombaumo adat toonnyo nu mian silakamo, pinitun sinaa na kinopinnyo.

¹¹Salatan anu jojoong i Kana'an nontoamo adat toonnyo nu anu silakamo i Goren-Haatad aijo', notataemo na aha, “Palias na ko liibosnyo na adat toonnyo nu anu silakamo hi mian nu Mesir aijo'!” Mokonyo aijo' tampat aijo' sinanggohanmo Abel-Mizraim.

¹²Sumo aijo' na to ana-anak i Yakub nombaumo apaa na anu pinotuunmo i Yakub hi aha.

¹³ Aha nomboamo bangke'nyo nokiijo' i Kana'an ka' nolamunmo i Liang Makhpela, i sasu kabete'an Mamre, i ale' anu ingolimo i Abraham hi Efron mian nu Het aijo' da bau polamunan.

¹⁴Salatan i Yusuf noko lamunmo tuumanyo ia ninsusule'mo i Mesir hingga-hinggat tiba to utu-utusnyo ka' iwi-iwi' mian anu nombatuki mae ia namba nolamun tuumanyo aijo'.

¹⁵Salatan tuuma nu aha sinilakamo, to utu-utus tu'a i Yusuf notataemo, “Mosia de i Yusuf daagi' mongka'idekakon kasala'anto naipuan mae ka' ia kahanda'mo mombalosakon?”

¹⁶Kalana aijo' aha nompotuunmo, potuunon sumo uuka hi Yusuf, “Ma'isa pe'e tuumanto sinilaka,

¹⁷ia nompokaumo kami mompoto'i hi beleyum sumo uuka, 'Ampuniakon mae na kasala'an anu naipuan mae binaumo nu to utu-utus tu'a hi beleyum.' Jadi, salaku to posa-posaihon nu Tumpu Allah anu nusombah nu tuumanto, okakase mami, ampuniakon mae na kasala'an anu binaumo mami.” I Yusuf i humangmo salatan i hongonyomo na potuunon aijo'.

¹⁸Lantas to utu-utusnyo haha aijo' tinokamo ka' nonsombah i ahopnyo ka' notatae, “Kami aiya posaihonmo nu belento.”

¹⁹Panyo pinoto'imo i Yusuf hi aha, “Boli mabuhuk, kalana aku madi' timbali mombau apa-apaa susumo Tumpu Allah.

²⁰Belemiu nomposa'angu'mo tanga'an sahingga mombaumo idek hi belengku, panyo Tumpu Allah nombali'imo, ka'idekan aijo' tinimbalimo ka'ima'an, da apaa na anu jinadimo naipuan mae aijo' da'isan na mian anu tumuu' uuka aiya pinosalamatmo.

²¹Boli bata-bata. Ku bee'ije apaa na anu opalalui nu belemiu ka' suele anu opalalui nu to ana-anak miu.” Sumo aijo' na ia notatae pagala nonsale'i ka' nohase aha sahingga aha nolibosmo.

²²I Yusuf tinataapmo na jinojoong i Mesir tiba aha sa'anakan to utu-utusnyo, ia tinumuu' sampe umunnyo sina'atumo ka' sampulu' na taun.

²³Jadi i Yusuf daagi' nontoa makumpunyo, i Efraim. Ia daagi' noko ala nompojoong to ana-anak i Makhir, aijo'mo makumpu i Manasye, sumomo posi anaknyo.

²⁴Ia notatae hi to utu-utusnyo, “Ukunku malia'mo, panyo Tumpu Allah saja' monjagai belemiu, molaya' belemiu mosabat lengkat i lipu' aiya, mamba i lipu' anu jinanji'-Nyomo hi Abraham ka' sinumpa'mo sampe-sampe hi Ishak ka' hi Yakub.”

²⁵ Lantas i Yusuf nompokaumo iwi-iwi' na aha sa'anakan ka' to utu-utusnyo basumpa', ia notatae, “Balajanji'mo mae hi belengku, de Tumpu Allah molaya'mo belemiu mamba i lipu' aijo', belemiu suele momboa bangke'ku.”

²⁶Mamanga ahi' sinilakamo na i Yusuf i Mesir, umunnyo sina'atumo ka' sampulu' na taun. Aha nompaha pokonaimo lampa i bangke'nyo ka' nompo'isimo i uno nu peti po ngisian anu silakamo.