Read Saluan KAJADIAN 8 Bible Online

KAJADIAN 8 - Saluan bible

KAJADIAN 8

¹Tumpu Allah madi' mongkolilimi i Nuh ka' binatangnyo iwi-iwi' anu daagi' hi ia i uno nu kapan aijo'. Tumpu Allah nompotobungmo mombun, sahingga uee nontampu'unimo tinolo tutus.

²Mata nu uee iwi-iwi' i aluk nu dunia ka' sabatan nu uee aita' i langit ingompok-Nyomo. Madi'mo kino ujan, ka' uee nompaka tinolo tutusmo.

³Ilapas 150 na sinaa, uee madi'mo talalo naleeng.

⁴I tanggan sampulu' ka' popitu' bitu'on ko popitu'nyomo, kapan aijo' tinosasamo i sa'angu' na tuu' nu bungkutnyo, aijo'mo bungkutnyo nu Ararat.

⁵Uee saja'mo tinolo tutus ka' i tanggan sa'angu' bitu'on ko sampulu'nyomo, to tutuu'nyo nu bungkutnyo nontampu'unimo kinantoaan.

⁶Salatan pinatompulu'mo na sinaa, i Nuh nontuhea'akonmo sa'angu' na tolongan nu kapan

⁷da molapasakon sa'angu' na tomonsi' papaa'. Tomonsi' aijo' madi'mo ninsusule' mae i kapan panyo saja'mo i lumahap mokiijo' mo'uuka sangkutnyo uee nu iyaba' no'otimo hondo-hondo.

⁸Hau-haunyo aijo' i Nuh nolapasakonmo mule' sa'angu' na malapati' da bau ponsumbu'an pa' uee aijo' no'otimo.

⁹Panyo kalana uee daagi' moleetabi songko-songko na kilit nu tano', tomonsi' malapati' aijo' madi' nohumpak katengke'an. Sahingga ia po'ule'mo ninsusule' mae i kapan; i Nuh nontajuakon limanyo ka' i hakopnyo ka' pinosoopnyo.

¹⁰Tinanda'an i Nuh mule' pinitun sinaa, lantas po'ule' mule' nolapasakon tomonsi' malapati' aijo'.

¹¹Mamalom tomonsi' aijo' ninsusule'mo mae hi ia nontongon mae santake na hon nu zaitun anu malonde' i tungkusnyo. Aijo'je ka' sinumbu' i Nuh taalu' uee no'otimo.

¹²Noko tanda'annyo pinitun sinaa, ia po'ule' mule' nolapasakon malapati' aijo', ka' tempo'nyo aitu tomonsi' aijo' madi'mo po'ule' ninsusule' mae hi ia.

¹³Salatan umun i Nuh 601 mo na taun i tanggan sa'angu' bitu'on sa'angu', uee no otimo hondo. I Nuh nombukaimo atop nu kapan aijo' ka' pinosilele'nyomo duhu-duhuk. Ia nontoa saba' kilit nu tano' kinantisanmo.

¹⁴Itanggan uampulu' ka' popitu' bitu'on ko ohua'nyo tano' kinantisanmo hondo-hondo.

¹⁵Lantas notataemo na Tumpu Allah hi Nuh,

¹⁶“Posabatmo mae ikapan atina' hingga-hinggat tiba bengkele' nu beleyum, to ana-anak nu beleyum ka' to bengke-bengkele' nu aha.

¹⁷Sabatakonmo iwi-iwi' na tomonsi' ka' binatang sangga'at, anu daka' ka' anu ise', da aha timbali momolee' ka' monsongkohi songko-songko na dunia.”

¹⁸Lantas nosabatmo mae na i Nuh i kapan aijo' hingga-hinggat tiba bengkele'nyo, to ana-anaknyo ka' to bengke-bengkele' nu aha.

¹⁹Iwi-iwi' na tomonsi' ka' binatang i katano'an nosabatmo mae i kapan aijo', toto sangahan nosi poga-pogala'mo.

²⁰I Nuh nombaumo sa'angu' na mezbah bau ponsombahkonan koloban hi Tumpu. Toto sangahan na tomonsi' ingalanyo sa'angu' ka' binatang sangga'at anu timbali okaan. Lantas sinombahkonnyomo salaku koloban anu opotunu i mezbah aijo'.

²¹Hongohisnyo nu koloban anu sinombahkonmo aijo' nomposanangmo kinyonyoa nu Tumpu, sahingga Ia notataemo i uno nu kinyonyoa-Nyo, “Aku madi'mo daagi' mongkutuki dunia aiya kalana palabuatan nu manusia; Ku sumbu' saba' aha daagi' pe'e tempo'nyo ma'isa motu'a, pikilan nu manusia aijo' ma'idek. Aku madi'mo daagi' monsilakai iwi-iwi' apaa na anu ko nyawanyo, susumo anu sala'je binaung-Ku aiya.

²²Salatanmo pe'e dunia aiya daagi' ko tempo'nyo mosu'an, ka' mongala bua'nyo, tempo'nyo nu bakin ka' tempo'nyo nu panas, tempo'nyo nu posinaa ka' tempo'nyo nu ehua, sina ka' malom.”