Read Saluan 2 SAMUEL 11 Bible Online

2 SAMUEL 11 - Saluan bible

2 SAMUEL 11

¹ To tomu-tomundo' biasanyo mamba mahampate kakona pilondekanmo nu kau'. Tempo'nyo taun aitu kau' ni londekmo i Daud nompalentahmo i Yoab da mambamo mahampate hingga-hinggat tiba to sulu-suludadu anu matangkas na pangkatnyo ka' aha iwi-iwi' na suludadu nu Israel; lantas aha nompatundu'mo mae mian nu Amon ka' nontumbuhimo mule kota' Rama. Panyo i Daud na jinojoong ahi' i Yerusalem.

²Daagi kino sansinaan mamalommo salatan i Daud nobulamo lengkat i hoyot ia ihoyot ia kinolalajangmo aita mae iloteng nu laigan nu tomundo' anu kakajojoongannyo aijo'. Ikiita' ia nontoamo samian na boune hau-haunyo mindii' ka' mule' boune aijo' handa hondo.

³Lantas i Daud nonsaimo mian namba nompokilawa pa' ihe na boune aijo' ka' pinoto'imo nu mian hi ia na boune aijo' sanggonyo i Batsyeba; tuumanyo sanggonyo i Eliam ka' mule' langkai'nyo i Uria mian nu Het.

⁴I Daud nonsaimo mian da mamba mompoboa boune aijo' ka' salatan tinokamo i laigan nu tomundo' kinamale'anmo i Daud na boune aijo'. (I Batsyeba salaje' nompilapasi nombau adat nomposusi' butongnyo kalana salaje' ilapas na adat nu aha boune). Lantas ia ninsusule'mo ilaigannyo.

⁵Madi' pinin i Batsyeba pinoboamo ka' pinolelenyomo hi Daud na han aijo'.

⁶Lia-lia' na i Daud nompotuun palentah hi Yoab, tukoonyo, “Sai pe'e mae na i Uria mian nu Het aijo' mamba mae pe'e hi belengku.” Sahingga sinaimo i Yoab na i Uria da mamba pe'e hi Daud.

⁷Salatan i Uria nangadapmo hi Tomundo' Daud, pinokilawamo i tomundo' hi ia, mosiamo na i Yoab tiba suludadu nu Israel ka' suele mosiamo na belemiu nahampate.

⁸Lapas aijo' i Daud po ule' mule' notatae hi Uria, “Lako'mo pinsusule' ilaigan nu belemiu ka' pilawemo pe'e.” Salatan i Uria nompala'imo laigan nu tomundo' i Daud nompakatumo palasen namba hi laigan i Uria.

⁹Panyo i Uria madi'mo ninsusule' ola ahi' ia ihoyotmo i ahop nu sabatan daka' nu laigan i tomundo' tiba to mia-mian anu monjagai i tomundo'.

¹⁰Han aijo' pinoto'imo hi Daud. Sahingga pinokilawanyomo hi Uria, “Beleyum salaje mae tinoka i tampat anu majo'on na olajangi mae, kadaka' beleyum madi'mo minsusule' ilaigan nu belemiu?”

¹¹Tinaaman i Uria, “Suludadu nu Israel tiba Yehuda hau-haunyo kiijo' mae mahampate taha-tahahumo ka' Peti' Palajanjian nu Tumpu na monsangalui aha; i Yoab talenga' mami tiba to sulu-suludadu anu matangkas na pangkatnyo binakemah'mo i padang. Toho' mule' na aku aiya minsusule' ilaiganku, ka' mongkaan ka' monginum ka' mule' hoyotmo tiba bengkele'ku? Kalana monsawan nyawa nu belento Tomundo' tiba mule' nyawangku, aku madi' mombau han aijo'!”

¹²Lantas notataemo na i Daud, “Yo ii' pilawemo pe'e i aiya, sinaa uuka sampe toka dodop daagi subu, ku pobee'mo nabeleyum mamba.” Jadi i Uria jinojoongmo i Yerusalem sinaa aitu. Dodododopnyo ia ilagamo i Daud nongkaan.

¹³Jadi nongkaanmo na ia ka' pino inumanmo manjoo' hondo na ia sahingga ia nalangumo. Panyo pihi-pihi aijo' mule' i Uria madi' ahi' ninsusule' ilaigannyo ola ahi' ia nilatasmo nu sabutnyo ka' ihoyotmo i tampat ponjagaian nu anu monjagai laigan nu tomundo'.

¹⁴Dodododopnyo i Daud nontulismo sulat toka hi Yoab, ka' i Uria na sinainyo nomboa.

¹⁵Anu pinotulisnyo, “Koonyo, sai na i Uria da mamba aita momona nu batukije nu suludadu sangga'at i tampat pahampatean anu taha-tahahumo hondo lantas pobalikmo mae na beleyum hoko-hokot da ia osilakaimo.”

¹⁶Sahingga hau-haunyomo i Yoab nontumbuhimo kota aijo' i Uria pinokaunyomo namba nokiita momona anu nu sumbu' memang aijo' na anu nu jaga hondo totu-totu'u nu sampo bali'.

¹⁷Salatan suludadu nu sampo bali' nosabatmo mae i kota' ka' nontumbuhimo suludadu i Yoab, tino pia-piangkuka na suludadu i Daud anu matangkas na pangkatnyo pinateanmo tibamo suele i Uria.

¹⁸Lapas aijo' i Yoab nonsaimo mian namba hi Daud da mompoto'i lele nu aha nahampate aijo'.

¹⁹Anu pinalentahkon i Yoab hi mian anu sinai aijo', “De i Tomundo' mohongomo anu nu poto'i nu beleyum mongkona pahampaten aijo',

²⁰ugaat ia pusamo ka' ia mompokilawamo hi beleyum, 'Kadaka' belemiu ingohanimo mae hondo i kota aiya? Te madi' osumbu' nu belemiu na sampo bali' mompana' mae mo uuka aita' mae ipagan mesen nu kota?

²¹ Te kinolilimanmo na i Abimelekh anak i Gideon aijo' pinatean kiijo' mae i Tebes? Temisa' ia sinilaka kalana sinabapan nu boune samian na nolumbu'akon mae batu gilingan labu aita mae i pagan mesen nokaiyong hi ia?' De nupokilawa i Tomundo' sumo aijo' poto'i hi ia, 'I Uria suludadu i Tomundo' anu matangkas na pangkatnyo suele sinilakamo!’ ”

²²Lantas nambamo na mian anu sinai aijo' nangadap hi Daud ka' nompoto'i apaa na anu pinalentahkonmo i Yoab hi ia.

²³Mian anu sinai aijo' notatae, “Sampo bali'mami na lebe mahoson aha nosabat mae i kota' ka' nontumbuhimo kami kiijo' i padang. Panyo suele binaanimo hondo na kami nongewa aha sahingga aha ninsusule'mo sampe tinoka i sabatan daka' nu kota'.

²⁴Lapas aijo' aha nompana'mo mae kami pinobuanakaon nu aha aita' mae i pagan mesen nu kota' ka' tino pia-piangkuka na suludadu i Tomundo' anu matangkas na pangkatnyo sinilakamo tibamo suele i Uria.”

²⁵I Daud notataemo, hi mian anu sinai aijo', “Opobaani na kinyonyoa i Yoab ka' opoto'i hi ia da boli hente na kinyonyoa kalana madi' opokoala osumbu' ihe na silaka i uno nu pahampatean. Poto'i hi ia da lebe opokopiani na mahampate ka' lebe makolit mule' na montumbuhi kota' aijo' sahingga kota' aijo' timbalimo opoko ala opatundu'.”

²⁶Salatan i Batsyeba nohongo taalu' langkai'nyo sinilakamo, ia lewa'mo nondoso'akon adatnyo nu tomate.

²⁷Salatan ilapasmo na adat nu tomate sinaimo i Daud na mian namba nolaga boune aijo' da toka mae i laigan nu tomundo' kaka jojoongannyo ka' ingosoannyomo na ia. Tino pia-piangkuka na bitu'on ihampemo na anaknyo, anak aijo' mo'ane. Panyo madi' nu ka'ima'i nu Tumpu na palabuatan i Daud aijo'.