Read Saluan 2 SAMUEL 13 Bible Online

2 SAMUEL 13 - Saluan bible

2 SAMUEL 13

¹I Absalom anak i Daud anu momo'ane ko utusnyo ise' samian na boune anu handa-handa hondo' sanggonyo i Tamar. I Amnon anak i Daud anu momo'ane hi bengkele'nyo sangga'at, nongka'ima'imo i tamar,

²ka' kahanda'mo moduhus tiba ia. Panyo aijo' ma'isa toho' jinadi, kalana i Tamar ma'isa no 'osoa ka' ma'isa timbali opobee' mompahakanaya tiba mo'ane. I Amnon saja'mo nompo'inau akon han ijo' sampe ahennyo ia nasakitmo.

³I Amnon ko bela'nyo samian anu pande hondo, sanggonyo i Yonadab, anak i Simea utus tu'a i Daud.

⁴I Yonadab notatae hi Amnon, “O anak nu Tomundo' Kadaka' sansina-sinaa otoa na beleyum sumo anu talalo hondo' susa'? Pa' daagi ahi' ko apa-apaanyo?” Tinaaman i Amnon, “Aku talalomo hondo' mongka'ima'i i Tamar utus ise i Absalom, utusku aijo'.”

⁵Lantas notataemo na i Yonadab hi ia, “Itina' na dengke ahi'! Soba male' i tampat kahoyotan nu beleyum ka' mimbudi-budi au'aitu nasakitmo. De tuuma nu beleyum tokamo mae montoa beleyum, poto'imo hi ia, 'Papa' pobee' pe'e mae na i Tamar momboai mae anu okaan. De kutoa ia mongunjang anu anu okaan i aiya, yo aku majota na mongkaan.’ ”

⁶Lapas aijo' i Amnon i nale'mo i kahoyotannyo nimbudi-budimo masakit. Salatan i Tomundo' Daud tinokamo nontoa ia, i Amnon notataemo hi ia, “Papa, pobee' pe'e mae na i Tamar da toka mae mombaui aku kukis aiya i ahopku; da majota na aku mongkaan.”

⁷Lapas aijo' pinotuunmo i Daud na i Tamar kiijo' mae ilaigan nu tomundo', koonyo sumo uuka, “Lako' pe'e ilaigan nu utus tu'a nu beleyum hi Amnon, ka' unjangiakon anu okaan na ia.”

⁸Lantas i Tamar nambamo nokiijo' hi Amnon tinokaannyo male-male' i kahoyotannyo. I Tamar nongalamo sangkiding na labu ka' kinompo-komponnyomo lantas binauannyomo kukis anu opanggang aijo' isasu ahop i Amnon.

⁹Lapas aijo' ihangkatnyomo na kukis aijo' ikuhon anu pinompanggangannyo ka' tinatuakonnyomo hi ia. Panyo i Amnon madi' nongka'oho' nongkaan, ia notatae, “Sai pe'e na mian iwi-iwi' da mosabat!”

¹⁰Salatan iwi-iwi' na mian nosabatmo i salipi' aijo' notataemo na i Amnon hi Tamar. “Boa mae na kukis haha aijo' ikayotanku aiya ka' pokaan mae na aku!” Lantas tinulutanmo i Tamar.

¹¹Panyo salatan tinajuakonmo i Tamar na kukis aijo' hi ia, tinoonganmo i Amnon na lima nu langkoyang aijo' ka' notatae, “Tamar, imbo' da kita moduhusmo!”

¹²“Ha, boli Amnon na koonyo nu boune aijo'!” “Boli nu pakisa na aku mombau anu moko ambang aijo'! Han anu sumo aijo' madi' toho' obau nu mian Israel.

¹³De obaumo sumo aijo' iya mae na pomposulukanku ohupku? Ka' mule' beleyum suele opopo ambangmo nu mian Israel haha aiya. Sahanyo nu bisalakon hi tomundo' tantu nu situjuimo na aku bau bengkele' nu beleyum.”

¹⁴Panyo i Amnon madi' nontuluti, jadi kalana ia ahi' na lebe mahoson, sabole-bolemo ahi' pinakisanyo na utusnyo ise' aijo' ka' pinatiduhusannyomo ahi'.

¹⁵Panyo noko lapas aijo' kina'idekanmo hondo i Amnon na i Tamar, ka' ia nongka'ideki aijo' tahahumo hondo, ilingkuduannyomo na ia nongka'ima'i u'uka momona. Lantas pinoto'inyomo hi utusnyo ise aijo', “Posabatmo!”

¹⁶Tinaaman i Tamar, “Ha, kadaka' sumo aitu Amnon? De nu laa' na aku, tahahumo geguan na beleyum molingkuduimo anu binaumo nu beleyum u'uka!” Panyo madi' pinajulian i Amnon.

¹⁷Ia nolaga posaihonnyo anu saja' montoa ia ka' pinoto'inyo, “Boa na boune aiya isambiha'nyo ka' kunsi mae na tumban!”

¹⁸Apaa na anu pinalentahnyo binaumo nu posaihon aijo'. Baju' i Tamar te Juba' mantan ka' limanyo mule' mantan. Tempo'nyo aitu tolalangkoyang anu ma'isa no osoa mompusok baju' susumo aijo'.

¹⁹Lantas ingabu'anmo i Tamar na ubaknyo, binea-beaknyomo na juba'nyo ka' nambamo, ka' ohupnyo kinukubannyomo nu limanyo ohu-ohua' ka' i humaangmo noli-nolibos.

²⁰Salatan binoamo hi Absalom pinokilawanyomo, “Te i Amnon u'uka nombaumo anu moko ambang hi beleyum? Pojohokmo Tamar, bolimo lewa' nu potutugakon. Manau' ahi' utus nu beleyum tu'a na ia, jadi boli opoto'i na han atina' maumo pa' hihe.” Lantas i Tamar nambamo jinojoong hi laigan i Absalom ka' ia sinusa'mo hondo ka' lewa'mo nongkomoho.

²¹Han aijo' ihongomo i Tomundo' Daud ka' ia pinusamo hondo.

²²I Amnon kina'idekanmo hondo i Absalom ka' madi'mo nu samposisik na ia, kalana ia nompakisamo noduhus tiba i Tamar utus ise'nyo aijo'.

²³Noko lapas ingohua' na taun i Absalom nombaumo bau-bauon monggunting bulu nu domba kiijo' i Baal-Hazor, koko kota' Efraim, ka' ilaganyo iwi-iwi' na to momo'ane anak i tomundo'.

²⁴Ia nangadapmo hi Tomundo' ka' nompoto'i, “Papa aku mombaumo bau-bauon mongguntingmo bulu nu domba. Ku poita da toka mae ahi' na kita Tuuma i bau-bauon aijo' tiba to mia-mian anu kopangkatnyo daka' i uno nu kalaja'an nu belento tomundo'.”

²⁵Panyo tinaaman i tomundo', “Boli, Anaku, kalana de kami iwi-iwi' mambamo kami momposusa'mo beleyum.” I Absalom sabole-bolemo nongkakase, panyo tuumanyo madi' ahi' nongka'oho' namba. Ia ola ahi' nompobee'mo da mombau bau-bauon aijo'.

²⁶Lantas notataemo na i Absalom, “De sumo aitu yo pobee' mae na utusku i Amnon toka mae hi kami.” I Tomundo' notatae, “Bolimo pilenje ia mamba.”

²⁷Panyo kalana sabole-bole ahi' kinakase i Absalom, ahennyo pinobee'mo ahi' i Daud na i Amnon tiba anaknyo anu to momo'ane sangga'at nambamo hi Absalom. (Lantas i Absalom nontatuakonmo kaanon anu toto ima-ima').

²⁸To posa-posaihonnyo pinalentahnyomo, “Otoa ima-ima' de i Amnon malangumo kalana nonginumo anggur, ku bee'ije tanda lantas pateimo na ia. Boli mabuhuk, Aku na montanggung han aijo'. Babaani ka' boli bata-bata!”

²⁹Posaihon haha aijo' nombaumo apaa na anu pinalentahkonmo i Absalom, lantas pinateanmo nu aha na i Amnon. Nontoa han aijo' to ana-anak i Daud anu to momo'ane sinumake'mo i bagal nu aha to samian ka' nopalaimo.

³⁰Hau-haunyo aha daagi i olot nu jalan minsusule'mo, pinoto'imo nu mian hi Daud, “I Absalom nompateimo to ana-anak mo'ane nu belento Tomundo' iwi-iwi'. — mau samian madi'mo ko anu tinumuu'!”

³¹Tinuminjo na i Tomundo' ka' bineaknyo na baju'nyo kalana sinusa'mo hondo ka' nati male'mo i salo. Iwi-iwi' na anu ko pangkatnyo suele nombeakmo baju' nu aha.

³²Panyo i Yonadab anak i Simea utus tu'a i Daud nompoto'imo, “Kita Tomundo' boli mangada' na kinyonyoa ka' boli pe'e monsangka au'aitu anak nu belento Tomundo' anu to momo'ane sinilakamo iwi-iwi'. Ola i Amnon na sinilakamo, kalana nanasamo saba' ia-iamo aijo' na nu kahanda'i i Absalom salatanmo pe'e i Tamar utusnyo ise' pagalamo pinakisa i Amnon noduhus tiba ia.

³³Jadi boli pe'e opalesaya na to ana-anak mo'ane nu belento Tomundo' sinilakamo iwi-iwi', kalana anu sinilakamo ola ahi' i Amnon.”

³⁴Tempo'nyo aitu i Absalom nopalaimo. Anu monjagai laigan nu Tomundo' nontoamo mian da'isan nintatau'mo mae i bungkutnyo lengkat mae i sasu Horonaim. Sahingga nambamo na ia hi tomundo' nompoto'i han aijo'.

³⁵Lantas i Yonadab notataemo hi Daud, “Aijo'mo na to momo'ane anak nu belento Tomundo'! To tu'u susumo anu tinaloakonkumo u'uka.”

³⁶Sala'je ilapas na ia notatae, ninsoopmo mae na to ana-anak mo'ane i Daud i unonyo. Aha aijo' i humaangmo, i Daud tiba to posa-posaihonnyo suele sinusa'mo hondo ka' suele i humaangmo.

³⁷ I Absalom nopalaimo namba i laigan nu tomundo' nu lipu' Gesur, aijo' mo i Talmai anak i Amihur. Ia jinojoong kiijo' mae tinotolu' na taun na kinopinnyo. Pinin hondo na i Daud nontoongi adat nu tomate i Amnon,

³⁹panyo salatan i Daud madi'mo sinusa' na kinyonyoanyo, ia daagi ahi' saja' nonginau i Absalom.