Read Saluan 2 SAMUEL 16 Bible Online

2 SAMUEL 16 - Saluan bible

2 SAMUEL 16

¹ Ma'isa pinin na i Daud noliu-liu bawo nu puge'nyo monti-montiik tinokamo na i Ziba posaihon i Mefiboset kahanda' singkabot tiba ia, nomboa mae sapaan na keledai anu ko sosake'onnyo ua atu na batuan nu roti, ka' sa atu na pumpungan nu anggur anu nahamo, sa atu na' segotan nu bua-bua' anu salaje' ingala, ka' sa angu' na botutu nu anggur anu o inum.

²Pinokilawa i Daud hi ia, “Baumo apaa na aiya iwi-iwi'?” Tinaaman i Ziba, “Keledai haha aiya anu bau kasake'an obee'mo hi belento Tomundo' sa'anakan, roti tiba bua-bua' haha aiya obee'mo hi to posa-posaihon nu belento Tomundo' ka' anggur anu o inum aiya obee'mo hi aha anu nalawemo kiijo' i padang anu mapeges.”

³Lantas pinokilawa mule' i tomundo' hi ia, “Iyamo na i Mefiboset makumpu nu tuan nu beleyum, i Saul?” “Ia daagi sakiijo'nyo i Yerusalem.” Tinaaman i Ziba, “kalana sinumbu'nyomo hondo-hondo, uuka aiya mian nu Israel po ule'mo mompotinjo kalaja'an i Saul, kai'nyo, obee'mo hi ia.”

⁴Lantas notataemo na i tomundo hi Ziba, “Jadi uuka aiya apa-apaa na anu i Mefiboset beleyumo na tumpunyo.” “Salamat Tomundo',” na koonyo i Ziba, “O'amalakon da belento Tomundo' saja' ma'ima' mae hi belengku!”

⁵Salatan i Daud tinokamo i Bahurim, tinokamo mae na samian anu itampat aijo' ka' nongohanimo i tomundo' anu aijo' gombu-gombu tiba mian sangga'at ka' nontotobi'akonmo i Daud. Mian aijo' sanggonyo i Simei anak i Gera, potoutusan mae i Saul.

⁶I Simei nompahambunu'akonmo i Daud tiba to mia-mian anu ko pangkatnyo nu batu, padahan aijo' titikup hi Daud to sulu-suludadunyo ka' suele ikiijo' to sulu-suludadunyo anu matangkas na pangkatnyo.

⁷I Simei nontotobi'akon nu potatae sumo uuka, “Tula' lamba! Anu lewa' mompatei! Anu lewa' mombau anu ma'idek.

⁸Kalaja'an i Saul ingagoanmo nu beleyum. Uuka aiya nu hukumo nu Tumpu na beleyum, kalana lewa'mo nompatei sampoto utusan mae i Saul manjoo' hondo. Kalaja'an nu beleyum nu bee'mo nu Tumpu hi Absalom anak nu beleyum. Uuka aiya nompahabindak na beleyum anu lewa'mo nompatei!”

⁹I Abisai utus ise' i Yoab anak i Zeruya, notataemo hi tomundo', “Kadaka' opojohokmo nu belento Tomundo' na mian anu nambamo mae nontotobi'akon belento Tomundo'? Pobee'mo mae da lako'mo ku tekok na gogohongnyo!”

¹⁰Panyo notatae na i tomundo' hi Abisai ka' hi Yoab utusnyo tu'a, “Boli mohongo-hongo. Pojohokmo da nu totobi'akon mae na aku. Saba de Tumpu na mompokau ia, ihe na timbali moko ala mompokilawa, kadaka' ia nombaumo anu sumo aijo'?”

¹¹Lantas i Daud po ule' mule' notatae hi Abisai ka' hi iwi-iwi' na posaihonnyo, “Posi anaku pe'e ko gia'mo mompatei aku; yo kadaka' na belemiu na ko banga-bangangmo na montoa mian nu Benyamin aiya? Tantu Tumpu na nompokau mae ia montotobi'akon aku; kalana aijo' boli opoposia na ia ka' pojohokmo na ia montotobi'akon mae aku.

¹²Ihe na monsumbu' Tumpu montoakonmo mae kasansala'an anu ingoa'ankumo aiya ka' mombalakatimo mae aku salaku bau pombolosi mae totobi' anu binee'mo mae hi belengku.”

¹³Lantas i Daud tiba anu monsangalui ia nambamo lau-laus ka' suele i Simei ilumajangmo lia-lia' nombatuki aha isohipi' nu puge'nyo ka' lewa'mo nontotobi'akon ka' lewa'mo nompahambunu'akon nu batu tiba tano'.

¹⁴I Tomundo' tiba suludadunyo iwi-iwi' nongoa'imo hondo lawe salatan aha tinokamo i Kaunyo nu Yordan lantas nilawemo na aha ikiijo'.

¹⁵Hau-haunyo aijo' i Absalom tiba iwi-iwi' na mian nu Israel anu monsangalui, aha ninsoopmo i kota' Yerusalem, ka' i Ahitofel suele nombatukimo aha.

¹⁶Salatan i Husai sangalu i Daud anu mompahasumbu' hondo' aijo' siningkabotmo tiba i Absalom tinaligaga'anmo i Husai, “Salamat kopian na i Tomundo'! Salamat kopian na i Tomundo'!”

¹⁷Panyo pinokilawamo i Absalom hi ia, “Ola mosia na beleyum mongkalibosi sangalu nu beleyum i Daud? Kadaka' beleyum madi'mo nombatuki ia?”

¹⁸Tinaaman i Husai, “Te toho' mule'! Aku na maninggalum ahi' hi mian anu pinile'anmo nu Tumpu, ka' anu pinile'anmo nu mian haha aiya ka' aha mian nu Israel iwi-iwi'. Mian aijo' na anu ku kubatuki.

¹⁹Ka' mule' daagi ihe na anu kutuluti na palentahnyo? Temisa anaknyomo ahi' momo'ane nu tuanku? Susumo aku nontulutimo tuuma nu belento Mian daka', sumo aitu mule' na aku montuluti belento Mian daka' uuka aiya.”

²⁰Lapas aitu pinokilawamo i Absalom hi Ahitofel, “Soba poto'i mae apaa na anu tionyo ahi' obaunto.”

²¹Tinaaman i Ahitofel, “Lako' hi ambahue' nu tuuma nu belento Tuanku haha kiijo' anu jinojoong mae nonjagai laigan nu tomundo' ka' poduhusmo hi aha. Da nusumbu' nu aha mian Israel iwi-iwi' na palabuatan nu belento Tuanku, sahingga belento Tuanku o'anggapmo sampo bali' nu tuuma nu belento Tuanku. Sahingga iwi-iwi' na aha anu monsagalui belento Tuanku lebemo baani.”

²² Jadi i Absalom binauanmo kemah aita i loteng ilaigan nu tomundo' anu kantoan. Lantas tinoamo nu mian iwi-iwi' na i Absalom ninsoopmo i kemah aijo' ka' noduhusmo tiba to amba-ambahue' nu tuumanyo.

²³Tempo'nyo aitu iwi-iwi' na pokinde' i Ahitofel tinulutanmo sumomo ahi' potatae nu Tumpu Allah; mau i Daud maumo i Absalom nontulutimo sili na pokinde'nyo.