Read Saluan 2 SAMUEL 17 Bible Online

2 SAMUEL 17 - Saluan bible

2 SAMUEL 17

¹Lapas aijo' madi' pinin notatae mule' na i Ahitofel hi Absalom, “Pobee' mae na aku mompile'i aha 12.000 na mian. Da saidi de malomo aku mambamo mololoi'i Daud.

²Ia kutumbuhije de malawemo na ia ka' hentemo na kinyonyoanyo. Ku potolokengkengje na ia sahingga mopalaimo na suludadunyo iwi-iwi'. Ola i Tomundo' Daud na ku patei.

³Panyo suludadunyo iwi-iwi' ku boa mae hi belento Tuanku susumo panganten boune minsusule'mo hi langkai'nyo. Temisa belento Tuanku ola ahi mongka'ima'i nyawanyo nu samian? Sangga'at na boli ahi' opoposia.”

⁴Pokinde' aijo' kina'ima'anmo i Absalom tiba suele to pola-polaya' nu aha mian Israel.

⁵Maumo sumo aijo' panyo i Absalom notatae ahi', “Soba laga mae uuka aiya na i Husai; da ohongonto pa' mosia na koonyo.”

⁶Salatan i Husai tinokamo mae nangadap, pinoto'imo i Absalom na tanga'an i Ahitofel ka' notatae, “Pa' otulutintomo na pokinde'nyo aijo'? De madi', yo soba paha polubat mae na tanga'an sangga'at.”

⁷Tinaaman i Husai, “Pokinde' i Ahitofel uuka madi' ma'ima'.

⁸Belento Mian Daka' tantu monsumbu'mo i Daud tiba to sulu-suludadunyo baani hondo na mahampate. Ko baaninyo nu aha sumomo ahi' tinanyo nu beruang anu nolapusmo na anaknyo. Ka' mule' i Daud anu saja'mo nahampate, jadi ia pinandemo ahi' na mahampate, madi'mo toho' hoyot maninggalum tiba to sulu-suludadunyo.

⁹Ku gantang tempo uuka ia naninsulukmo i uno nu liang kabai i tampat sangga'at. Jadi bisuanyo suludadu nu belento Mian Daka' nu tumbuhi mae i Daud ka' ko anumo silaka tantu maumo ahi' pa' ihe na mohongo mae lele aijo' motataemo tu koonyo nu aha to sulu-suludadu i Absalom pinatundu'mo.

¹⁰Sahingga mian anu toto babaani tiba anu toto hoso-hoson susumo singa, tantu mabuhukmo. Kalana aha mian nu Israel iwi-iwi' monsumbu'mo tuuma nu belento Mian Daka' aijo' memang ahi' talenga' ka' mule' to sulu-suludadunyo anu ahi' to babaani.

¹¹Kalana aijo' pokinde'ku sumo uuka: Posihuk mae iwi-iwi' na aha mian nu Israel lengkat mae i lipu' songko-songko sahingga konjoo'nyo sumo bone' ibiwi nu ambai. Lantas posi belento ahi' Mian Daka' na mongkapalai aha mamba mahampate.

¹²Jadi tionyo ahi' ohumpakto na i Daud maumo ahi' pa' iya na kinajojoongannyo, ka' otumbuhintomo na ia da ma'isa pe'e nu sumbu' pa' apaa na anu jinadimo.

¹³Madi' ko samian na anu moko ala mopalai i sa'angu' na kota', iwi-iwi' na mian da'isan mongalamo kahohon ka' mompahampunguakon mian anu i kota' aijo' ka' otuamo na aha isa'angu' na keles anu ohani. Mau sambatu pe'e na batu madi' ko anu tontuha' aita'i bawo nu puge'nyo.”

¹⁴Nohongo potatae aijo' i Absalom tiba aha mian nu Israel iwi-iwi' notataemo, “Pokinde' i Husai na lebe ma'ima' molingkudui pokinde' i Ahitofel.” Memang, Tumpumo na nontantukan da boli otuluti na pokinde' i Ahitofel anu ma'ima' aijo' da i Absalom mohumpakmo balaa'.

¹⁵Ilapas na aijo' pinoto'imo i Husai hi Imam Zadok ka' hi Imam Abyatar mosia na pokinde' i Ahitofel ka' suele pokinde'nyo hi Absalom ka' hi to pola-polaya' nu aha mian Israel.

¹⁶Koonyo i Husai, “Palia-lia'! Poto'i hi Daud da boli male' i tampat potaapan itina' i kaunyo i padang anu mateges. Ia tionyo ahi' malia-lia' sampa motaap i Kaunyo Yordan. De madi' ia tiba iwi-iwi' na suludadunyo ohopu'imo.”

¹⁷Tempo'nyo aitu i Yonatan anak i Abyatar tiba i Ahimaas anak i Zadok nontanda'imo koko mata nu uee En-Rogel, isohipi' nu kota' Yerusalem. Aha madi' baani na minsoop i kota' kalana mabuhuk na nu toa nu mian. Susumo anu saja'mo obau samian na posaihon boune mompotoka lele hi aha da tionyo ahi' opoto'i hi Tomundo' Daud.

¹⁸Panyo tempo'nyo aitu, samian na anak mo'ane nontoamo aha ka' nompoto'imo hi Absalom. Jadi aha sampamo ahi' namba naninsuluk ilaigan nu mian anu jojoong i kampung Bahurim. Koko laigannyo aijo' daagi ko bubung jadi aha naninsulukmo i unonyo.

¹⁹Bengkele' nu tumpunyo nu laigan aijo' nongkukubimo bubung aijo' nu hude ka'tinalayaanyomo na gandum sahingga bubung aijo' madi'mo kinantoaan.

²⁰To mia-mian anu sinai mae i Absalom tinokamo ilaigan aijo' ka' pinokilawanyomo hi boune aijo', “Iya mae na i Ahimaas tiba i Yonatan?” Tinaamannyo, “Aha sala'je notaap i kaunyo.” Iliomo nu aha na olitau ua-ua aha aijo' panyo madi' i humpak nu aha, lantas ninsusule'mo na aha i Yerusalem.

²¹I Ahimaas tiba i Yonatan nosabatmo mae kiijo' i bubung lantas sampamo aha namba hi Daud ka' nompoto'i han aijo' iwi-iwi'. Koonjo nu aha, “I Ahitofel nompokinde'imo da belento Tomundo' otumbuhimo. Jadi inda mambamo uuka aiya motaapmo i kaunyo aiya.”

²²Lantas i Daud tiba to sulu-suludadunyo notaapmo i Kaunyo nu Yordan, tinoka i santoanyo sinaa binete'mo.

²³Salatan sinumbu'mo i Ahitofel taalu' pokinde'nyo madi' tinulutan pinokonanyomo na bau kasake'an i keledainyo ka' ninsusule'mo i kota'nyo. Noko baunyo na kalajanyo iwi-iwi' ia ninoo'mo naningkalayo' lantas ilamunmo itampat polamunan aha sa'anakan.

²⁴I Daud tinokamo i kota' Mahanaim salatan i Absalom notaapmo i Kaunyo Yordan sinangaluan nu aha mian Israel. (

²⁵I Absalom nohangkatmo i Amasa da mongkapalai suludadu bau pombolosi i Yoab. I Amasa anak i Yitra mian nu aha Ismael: tinanyo i Abigail anak i Nahas, utus boune i Seruya tina i Yoab).

²⁶I Absalom tiba suludadunyo binakemahmo itano' nu Gilead.

²⁷Salatan i Daud tinokamo i Mahanaim, ia ilalabotmo i Sobi anak i Nahas anu nolengkat mae ikota' Raba kiijo' i Amon, ka i Makhir anak i Amiel anu nolengkat mae i Lodebar, ka' i Barzilai anu nolengkat mae i Rogelim anu kiijo' mae i Gilead.

²⁸Aha nomboamo mae mangko', pamutu', kasun obee' hi Daud ka' hi to sulu-suludadunyo, ka' mule' gandum, jelai, labu, gandum anu ginorengmo, sanggoleng anu momea', sanggoleng anu daka' momea', juu' nu uani' keju, susu anu momonanyo pinao' tiba domba tinopia-piangkuka. Nu sumbu' nu aha na i Daud tiba to sulu-suludadunyo no ohopmo ka' negotmo ka' mule' nalawemo kalana aha lengkatje mae i padang anu mateges.