Read Saluan 2 SAMUEL 18 Bible Online

2 SAMUEL 18 - Saluan bible

2 SAMUEL 18

¹I Tomundo' Daud nomposihukmo suludadunyo iwi-iwi' lantas binagi-baginyomo, daagi ko anu sanggombu samadala na miannyo, daagi ko anu sanggombu sa'atu na miannyo. Lapas aijo' ihangkatnyomo na to sulu-suludadu anu matangkas na pangkatnyo da mongkapalai gombuan nu suludadu haha aijo'.

²Lantas sinainyomo namba nahampate na aha, binaginyo totolu' na gombuannyo ka' anu nongkapalai toto sanggombu: i Yoab, i Abisai utus ise' i Yoab ka' i Itai anu nolengkat mae i Gat. I Daud notatae hi to sulu-suludadunyo haha aijo', “Aku suele mamba hingga-hinggat tiba belemiu.”

³Panyo mian haha aijo' nontaami, “Boli Tomundo'. Kalana de kami mopalaimo kalana madi'mo opoko ala mami kabai kami mau olaje sambagian na silaka, sampo bali' ma'isa ahi' sanang kalana belento ahi' Tomundo' na nulio nu aha. Belento Tomundo' angga'nyo bailako' sampulu' na madala na kami. Ka' mule' lebe ma'ima' belento Tomundo' monsaije mae mian anu montulungi kami lengkat aiya ikota'.”

⁴Lantas notataemo na i tomundo' “Ma'ima'mo de sumo itina', yayamo belemiu.” Lapas aijo' ia tinuminjomo isohipi' nu sabatan daka' nu kota' ka' to sulu-suludadu nojiji'mo na nosabat toto sanggombu daagi ko anu sa madala na mian, ka' sa'atu na mian.

⁵Lantas pinalentahmo i tomundo' na i Yoab, i Abisai tiba i Itai tukoonyo, “Boli obelai nu belemiu na i Absalom olitau aijo' o'inau'akon mae na aku.” Iwi-iwi' na suludadu nohongo apaa na anu pinalentahkonmo i Daud aijo'.

⁶Lantas nambamo na gombuan nu suludadu i Daud nompahampateakon gombuan nu suludadu nu aha mian Israel, ka' nahampatemo na aha i uno nu alas kiijo' mae i Efraim.

⁷Gombuan nu suludadu nu aha Israel pinatundu'mo nu suludadu i Daud; anu pinatundu' aijo' manjoo' hondo, aha 20.000 na mian anu sinilaka isinaa aitu.

⁸Nahampate tempo'nyo aitu nompaka lambanimo iwi-iwi' na da'erah aijo' ka' mule' lebe manjoo' na mian sinilaka kalana kinadang nu panga' nu kau' kiijo' i uno nu alas, sahanyo anu sinilaka nahampate na madi' nanjoo'.

⁹Tempo'nyo i Absalom nonsake'i bagalnyo monti-montiik ia siningkabotmo suludadu i Daud. Bagal aijo' notulu i patu nu kau' anu daka' ka' heede' sahingga tinosagamo na ubak i Absalom i panga'nyo. Bagalnyo sinapopopadeka'nyomo panyo i Absalom tinongkalayo'mo ikiijo'.

¹⁰Samian na suludadu i Daud nontoa ia lantas pinoto'inyomo hi Yoab, “O Tuan, u'uka tinoangku na i Absalom tinongkalayo'mo i batang nu kau' anu daka'.”

¹¹Tinaaman i Yoab, “Mosia? Tinoa nu beleyum na ia? Kadaka' madi' sampa pinatean nu beleyum na ia? Saba' binee'anku sampulu' na doi salaka ka' sa'angu' na pombutu' de pinateanmo nu beleyum.”

¹²Panyo tinaaman nu mian aijo', “Mau mule' aku binee'an mae 1.000 na doi salaka aku madi' mongka'oho' molaniti anak mo'ane nu tomundo'. Kami iwi-iwi' nohongomo apaa na anu pinalentahkonmo i tomundo' hi belento Tuan ka' hi Abisai ka' hi Itai da boli obelai na i Absalom olitau aijo' kalana monginau' i tomundo'.

¹³Ka' de pinateankumo na i Absalom u'uka tantu nu sumbu'mo ahi' i tomundo' kalana maumo ahi' mosia iwi-iwi' nu hongomo i tomundo' ka' belento Tuan maumo ahi' pa' mosia madi' moko ala montinjohi mae aku.”

¹⁴“Angganmo! Madi'mo ko tempo, ola kalana moto-moto taaman tiba beleyum,” na koonyo i Yoab. Lantas i Yoab nongalamo totolu' na talombo' ka' binunu'akonnyomo hi saha'an i Absalom anu tempo'nyo aitu daagi tutuu' aijo' kala-kalayo' i kau'.

¹⁵Ka' mule' aha sampulu' na suludadu i Yoab nompahambunu' akonmo ka' nompateimo ia.

¹⁶I Yoab nompo'onyi'mo tolompetnyo sahingga suludadunyo madi'mo nololoi' gombuan nu suludadu nu aha Israel.

¹⁷Lapas aijo' bangke i Absalom ihangkatmo ka' tinuamo i uno nu bubung anu maleeng kiijo' i alas. Bubung aijo' tinabuhanmo nu aha nu batu sampe na bungkut. Iwi-iwi' na gombuan nu suludadu nu aha Israel nopalaimo namba ilaigan nu aha toto samian.

¹⁸Daagi tempo'nyo i Absalom tutuu' nompotinjomo na ia sa'angu' na tambulan nu batu anu matangkas da ia boli okolilimi kiijo' i Bangka'nyo nu Tomundo' kalana koonyo ia madi' ko anak mo'ane anu momole'akon lee'nyo. Batu anu tinambun tangka-tangkas aijo' sinanggohannyomo nu sanggonyo ka' sampe tempo' uuka aiya batu anu tinambun tangka-tangkas aijo' daagi osumbu' Batu anu tinambun tangka-tangkas i Absalom.

¹⁹Lapas aijo' notataemo na i Ahimaas anak i Zadok hi Yoab, “Pobee' mae da aku mopadeka' mamba hi tomundo' ka' mompolele lele anu moko lame', te Tumpu nomposalamatmo i Tomundo' madi'mo ko sampo bali' mompoposia.”

²⁰“Boli na koonyo i Yoab, to nau-nau'je ahi' sinaa uuka madi' timbali beleyum momboa lele mompoto'i anak itomundo' momo'ane sinilakamo.”

²¹Lantas notataemo na i Yoab hi posaihonnyo mian nu Sudan, “Lako'mo mamba poto'i hi tomundo' apaa na anu tinoamo nu beleyum.” Posaihon aijo' tinolodadupumo nonsombah lantas nopadeka'mo na ia namba.

²²Panyo i Ahimaas sabole-bolemo nongkakaase hi Yoab da ia ahi' no opobee' mamba, “Maumo pa apaa na jadi pobee'mo mae da mambamo ku polele.” “Kadaka' beleyum talalomo sumo atina' kahanda'mo sabole-bole mamba, o'anaku?” na koonyo i Yoab. “Madi' ko tambonyo na beleyum mamba atina'.”

²³“Madi' mongkuka,” na koonyo mule' i Ahimaas, “Aku mambamo.” De sumo itina' yo lako'mo, na koonyo i Yoab. Sahingga nopadeka'mo na i Ahimaas nontusakon jalan anu so' montulu Bangka'nyo nu Yordan, ka' madi' pinin ia na sampa tinoka, leoknyo na posaihon mian nu Sudan aijo'.

²⁴I Daud hau-haunyo suha-suhang i sa'angu' na tampat i olot nu sabatan daka' nu kota' sasu unonyo ka' sabatan daka' nu kota' sasu sambiha'nyo. Anu monjaga noliba'mo i pagan mesen nu kota' ka' tinuminjo aita iloteng nu sabatan daka' nu kota'. Salatan ia nontanggalakonmo nokiijo' ia nontoamo samian anu popopadeka' mo uukamo mae.

²⁵Anu monjaga aijo' notataemo daka-daka' nokaiyong i patuunyo mompoto'i han aijo' hi tomundo', jadi koonyo i tomundo', “De ola ia sausa'nyo tantu ia momboa mae lele anu ma'ima'.”

²⁶Salatan mian aijo' malia'mo toka anu monjaga aijo' nontoa mule' samian popopadeka' mae suele. Jadi ia notatae mule' daka-daka', “Soba toa! Daagi mule' ko samian anu aitu mae popopadeka'.” Tinaaman i tomundo', “Tantu ia suele momboa mae lele anu ma'ima'.”

²⁷Anu monjaga aijo' notatae mule', “Mian anu momona mae aijo' i Ahimaas. Ku sumbu' na popadeka'nyo.” Ia mian ma'ima', na koonyo i tomundo', “tantu ia momboa mae lele ma'ima'.”

²⁸I Ahimaas notataemo daka-daka' na nonsalado'ai i tomundo' lantas tinolodadupumo ka' notatae, “O puji' na Tumpu Allah nu belento Tomundo' anu nombee'mo to mia-mian hi belento Tomundo' aha anu saja' moto muhut mombau anu ma'idek hi belento Tuanku!”

²⁹Pinokilawamo i tomundo', “Pa' i Absalom olitau aijo' daagi ahi' tutuu'?” Tinaaman i Ahimaas, “Kita Tomundo' u'uka salatan aku sinaimo i Yoab namba nontoamo mian anu ihengge'mo hondo panyo madi' ku sumbu' pa' apaa na anu jinadimo aijo'.”

³⁰“Tinjo aijo' mae,” na koonyo i tomundo'; sahingga i Ahimaas nokiijo'mo sasu aijo' mae ka' tinuminjo.

³¹Lapas aijo' tinokamo mae na posaihon i Yoab ka' nompoto'i hi tomundo', “Aku momboa mae lele ma'ima' hi belento Tomundo'! Sinaa aiya Tumpu nombee'imo ka'untungan nahampate hi Tomundo', mian iwi-iwi' anu saja' motomuhut mombau anu ma'idek hi belento Tomundo' pinatundu'mo.”

³²Pinokilawamo i tomundo', “Pa' i Absalom olitau aijo' daagi ahi' tutuu'?” Lantas tinaamanmo nu posaihon aijo', “Paya' iwi-iwi' na anu monsampo bali' belento Tomundo' ka' iwi-iwi' na mian anu saja' moto muhut mombau anu ma'idek hi belento Tomundo' tinokanmo nu ukun pokakanamo susumo olitau aijo'.”

³³Nohongo aijo' i tomundo' sinusa'mo hondo ka' nolibosmo lantas ia noliba'mo no kiita iloteng nu sabatan daka' nu kota' itampat anu lewa' kasuhangan ka' lewa'mo hangi ka' nontando'i, “O, anaku! Anaku Absalom! Absalom anaku! Sahanyo aku na sinilaka pinombolosi beleyum, anaku! Absalom anaku!”