Read Saluan 2 SAMUEL 22 Bible Online

2 SAMUEL 22 - Saluan bible

2 SAMUEL 22

¹Salatan i Daud pinosalamatmo nu Tumpu lewa' nahampate nongewa i Saul ka' mule' hi iwi-iwi' na sampo bali'nyo sangga'at, i Daud nanyanyimo nyanyian nompuji Tumpu: (

²Ku ka'ima'i na belento o, Tumpu. Belentomo na binau kahosonanku.)

³Tumpu sumomo benteng anu mahoson tampat bau paninsulukanku. Tumpu Allah-ngku sumomo bungkutnyo nu batu tampat bau pinsondoanku Sumomo kanta na Ia mongkukubi mae aku, ka' saja' monjagai mae aku da madi' ko anu mompoposia.

⁴Aku notataemo hi Tumpu anu patut opuji', Ia nompobebasmo aku da madi' nu sampo bali'ku iwi-iwi'.

⁵Aku tinikubanmo nu balaa' kasilaka'an ka' iletabanmo nu iyaba' anu monsilakai.

⁶Aku tinikubanmo nu balaa' kasilaka'an anu pagala monsilakai ingahopankumo.

⁷I uno nu kasansala'anku aku notataemo hi Tumpu aku noloboo'mo hi Tumpu Allah-ngku momoita da otulungi mae. Kiita mae i Laigan-Nyo ihongo-Nyomo na potatengku ka' inginau'-Nyomo apaa na anu tinaeakonku.

⁸Lantas dunia ilulu'onmo, ka' ginayu'anmo, pu'unnyo nu bungkutnyo iwi-iwi' nongkohenggomo kalana Tumpu Allah notambuha'mo!

⁹Tibuk tinolo sumbumo lengkat mae i bolo nu sung-Nyo apu ka' oba nosabatmo mae i nganga'-Nyo.

¹⁰Langit biniha'-Nyomo lantas nintatau'mo na Ia, i kundom anu butolu hondo akaong i aluk nu tengke-Nyo.

¹¹Ia lumahap monsake'i malaekat Ia momboli-bolingkayangmo aita' i polipik nu mombun.

¹²Butong-Nyo sinabutan-Nyomo nu pintung kundom anu butolu hondo nontikubimo Ia.

¹³Lengkat i kilat anu aijo' mae i ahop-Nyo nosabatmo mae na kundom, ujan eis tiba apu.

¹⁴Lantas Tumpu sumomo gohung aita mae i langa Anu Matangkas na kuasanyo nompohongomo mae potatae-Nyo.

¹⁵Pana'-Nyo iwi-iwi' pinana' akon-Nyomo, ka' nomposubalimo anu monsampo bali' Ia saja'mo nompojohonjit kilat sahingga aha nopalaimo.

¹⁶Lana nu ambai tinabuka'mo ka' suele babatungo nu dunia tinabuka'mo tempo'nyo Tumpu nonsegaimo iwi-iwi' na sampo bali'nyo kalana Ia pinusamo.

¹⁷Lengkat mae aita, Tumpu nonguluakonmo lima-Nyo tinoongan-Nyo na aku akaong i uee anu maleeng hondo ka' i hangkat-Nyomo na aku.

¹⁸Ia nomposalamatmo aku da madi' pinatean nu sampo bali' anu baani hondo, ka' aha to mia-mian anu mongka'ideki mae aku, kalana aha talalo ahi' mahoson mohungku'i aku.

¹⁹Aha nontumbuhimo mae aku tempo'nyo aku tinokanmo nu balaa' Panyo Tumpu nontulungimo mae aku.

²⁰Ia nonjagaimo mae aku da madi' kinona nu balaa' ka' nomposalamatmo mae aku kalana Ia situju hi belengku.

²¹Tumpu nombalosimo mae palabuatanku anu totu'u Ia nombalakatimo mae aku kalana aku madi' kokasala'an.

²²Aku nontulutimo palentah nu Tumpu ka' madi' ahi' pinanggaga hi Tumpu Allah-ngku.

²³Iwi-iwi' na atulan-Nyo pinalahatikankumo palentah-Nyo iwi-iwi' saja' binaungku.

²⁴Aku sinumbu'-Nyomo madi'mo ko anu opisala'i ka' madi'mo lewa' mombau kasala'an.

²⁵Jadi Tumpu nombalosakonmo palabuatanku anu totu'u kalana sinumbu'-Nyomo na aku madi' ko kasala'an.

²⁶Belento Tumpu manonong hi mian anu manonong, ka' ma'ima' hi mian anu ma'ima'.

²⁷Kakona hi mian anu Nu poto'i na butong nu Belento susi' panyo mian anu mombau anu ma'idek na oka'ideki ahi' nu Belento.

²⁸Miana anu madi' ko bubuun oposalamat nu Belento; panyo mian anu ko bubuun na opatundu' ahi' nu Belento.

²⁹Belento nontutungimo pansona'ku Tumpu Allah-ngku nonjingkaimo mae aku ikapintungan.

³⁰Belento nompohosonmo mae aku da mompatei anu monsampo bali'. Kalana aku tinulunganmo nu Tumpu Allah-ngku sahingga ilalubusankumo na benteng nu aha.

³¹Palabuatan nu Tumpu Allah sinukupmo hondo apaa na anu jinanji'mo nu Tumpu opalesaya! Ia sumo kanta kona hi mian iwi-iwi' anu mamba hi Ia da nu jagai.

³²Kalana ola Tumpu na Tumpu Allah; ola Tumpu Allah na anu moko ala mongala-alapakon kita.

³³Iamo na Tumpu Allah anu nompohosonmo aku sahingga aku lumajang madi'mo ko anu mompoposia.

³⁴ Ia nompohosonmo tengkengku susumo tengke nu jonga, ka' nonjagaimo kasalamatanku aita isinin na bungkutnyo.

³⁵Ia nompogulu'mo aku da timbali mahampate sahingga noko alamo nompeletakon, na aku pelet anu mabalo hondo.

³⁶Tumpu Belento nonjagaimo mae ka' nomposalamat aku ka' nontinjohimo mae aku nu kuasa nu Belento aku inguntungmo na nahampate kalana kakuasa'an nu Belento.

³⁷Belento nonjagaimo mae aku da aku madi' pinoko ala ihakop ka' aku madi' toho' tinombahangkang.

³⁸Iloloi'kumo na sampo bali'ku ka' pinatundu'kumo na aha ka' madi toho' aku tinolo ule' sampe aha pinateanmo.

³⁹Pinobahangkangkumo na aha ka' madi'mo noko ala nobula aha notua' madi'mo noko ala nombau apa-apaa i ahop nu tengkengku.

⁴⁰Belento nombee'imo mae aku kahosonan nahampate ka' ka untungan nahampate nohungku'i sampo bali'ku.

⁴¹Kinalajamo nu belento na sampo bali'ku sahingga aha nopalaimo nompala'i aku; to mia-mian anu mongka'ideki mae aku pinateankumo.

⁴²Aha lewa'mo noloboo' panyo madi' ko anu nontulungi mae aha nomoita tulung hi Tumpu panyo Ia madi' nontaami.

⁴³Aku lewa'mo tinutuk sumomo abu' anu nohimpuamo ka' sinapuankumo sumomo hensek i jalan.

⁴⁴Belento nompobebasmo mae aku da boli nu patei nu bansa anu uesan, ka' nompojadimo mae aku mongkuasai aha to bansa-bansa; bansa anu madai' ku sumbu-sumbu' jinadimo posaihonku.

⁴⁵To mia-mian anu i salipu'an pinalentah-ngkumo ka' montulutimo de mohongomo palentah-ngku.

⁴⁶Aha madi'mo kinokabaaniannyo; aha ilakatnyomo ka' nosabatmo i benteng nu aha.

⁴⁷Ia nombee'imo mae aku ka untungan nahampate nongewa sampo bali'ku Tumpu tumuu'! O, puji' na anu montinjohi mae aku! Opopodaka' na kakuasa'an nu Tumpu Allah anu nomposalamatmo mae aku!

⁴⁸Ia nombee'imo mae aku ka untungan nahampate nongewa sampo bali'ku aha to bansa-bansa pinatundu'-Nyomo i ahopku.

⁴⁹pinosalamat-Nyomo mae na aku da boli nu patei nu aha anu monsampobali' mae aku O, Tumpu pino untungmo mae nu Belento na aku nahampate nongewa sampo bali'ku; Jinagaanmo nu belento na aku da boli nu patei nu to mia-mian anu uesan.

⁵⁰ Sahingga ku popodaka' na Belento hi aha to bansa-bansa; ka' aku manyanyi mompuji-puji' Belento.

⁵¹Tumpu Allah nompo untungmo hondo nahampate na i tomundo' anu i hangkat-Nyomo; Ia tataap mongkalibosi mian anu pinile'an-Nyomo, aijo'mo i Daud tiba lee'nyo sampe toka sidu-sidutu'.