Read Saluan 2 SAMUEL 3 Bible Online

2 SAMUEL 3 - Saluan bible

2 SAMUEL 3

¹Anu monsangaja'i aha sampoto utusan mae i Saul tiba anu monsangaja'i aha sampoto utusan mae i Daud saja'mo nahampate. I Daud nompaka pahosonmo panyo aha sampo bali'nyo madi'mo kinokahosonan.

²To ana-anak mo'ane i Daud anu ihampe ilipu' Hebron lengkat pe'e anu momona pinohampe: I Amnon. Tinanyo i Ahinoam anu lengkat mae i Yizreel.

³I Kileab. Tinanyo i Abigail balu i Naban anu lengkat mae i Karmel. I Absalom. Tinanyo i Maakha anak boune nu Tomundo' Talmai lengkat mae i Gesur.

⁴I Adonia. Tinanyo i Hagit. I Sefaca. Tinanyo i Abital.

⁵I Yitram. Tinanyo i Egla. Aha ano-anom na anak mo'ane haha aijo' ihampe ilipu' Hebron.

⁶Hau-haunyo saja'mo nahampate na anu monsangaja'i i Daud tiba anu monsangaja'i i sampoto utusan mae i Saul, i Abner kinogau'mo da iamo na lebe ohongo nu aha anu monsangaja'i i Saul.

⁷Daagi kino sansinaan i Isyboset anak mo'ane i Saul nontuukmo i Abner tukoonyo ia nongkamilu'imo i Rizpa anak i Aya. I Rizpa aijo' ambahue' i Saul.

⁸Lantas i Abner notambuha'mo hondo ka' ia notataemo, “Kadaka' belento Tuanku mongihohopimo mae aku aiya au'aitu nombusikimo sanggo i Saul ka' mosangaja'mo hi aha Yehuda? Salatanmo pe'e momonanyo aku saja'mo tinulu-tulutan hi Saul tuuma nu belento Tuan, ka' hi sampoto utusannyo ka' mule' hi to sanga-sangalunyo. Aku nontulungimo Tuanku sahingga madi'mo pinoko patundu' i Daud. Padahan i Tuan mongambangimo mae aku ola kalana boune!

⁹ Sahanyo i Daudmo na kutulungi, pakalaus mule' jinanji'mo nu Tumpu hi ia na da'erah anu nu palentah i Saul aiya obee'mo hi Daud, ka'lee' i Saul madi'mo timbali ohangkat bau tomundo', jadi i Daudmo ahi' na bau tomundo' montomundo'i Israel tiba Yehuda songko-songko. Tumpu Allah na mompatei aku de madi' kubau na palajanjian nu Tumpu Allah hi Daud aijo'.”

¹¹I Isyboset madi'mo noko ala nontaami mau ola santaa' kalana ia nabuhukmo hi Abner.

¹²Lantas i Abner nonsaimo mian namba hi Daud anu tempo'nyo aitu kiijo' i Hebron nomboa potuunon, “Ihe na anu mongkuasai tano' aiya? Mombau me palajanjian tiba aku da ku tulungi na belento Tuanku da songko-songko na bansa Israel monsangaja'imo belento Tuanku!”

¹³Tinaaman i Daud, “Ma'ima'mo! Poto'i na potuunonku uuka hi Abner: Aku mongka oho'mo mombau palajanjian tiba beleyum panyo daagi ko anu ku poita anu tionyo ahi' nu bau: I Mikhal anak boune i Saul tionyo ahi nu boa mae hi belengku de beleyum mambamo mae mangadap hi belengku.”

¹⁴ Lantas i Daud suele nonsaimo mian namba hi Isyboset ka' nomboa potuunon, “Tionyo ahi' belento Tuan monsule'akon mae bengkele'ku i Mikhal. Ia ingolingkumo nu kilit nu kamo'anean nu aha mian Filistin.”

¹⁵Lantas pinokaumo i Isyboset na mian da mamba mompoboa mae i Mikhal kiijo' hi langkai'nyo, aijo'mo i Paltiel anak i Lais.

¹⁶Panyo i Paltiel sabole-bole ahi' nombatuki i Mikhal ka' lewa'mo nohaangi. Salatan aha tinokamo i kota Bahurim, i Abner notataemo hi ia, “Pomohokotmo, pinsusule'mo!” Lantas ninsusule'mo na i Paltiel.

¹⁷Lapas aijo' i Abner binasale'mo tiba to pola-polaya' nu mian Israel ka' pinoto'inyomo, “Pininmo na belemiu mongkahanda'i da i Daud baumo tomundo' nu belemiu.

¹⁸Jadi aiyamo na kasampatan nu belemiu. Boli okolilimi, Tumpu binalajanji'mo hi Daud tukoo-Nyo ia mongalamo i Daud da momposalamat mian nu Israel da bolimo nu pahampateakon nu aha mian Filistin ka' mule' iwi-iwi' na sampo bali'nyo sangga'at.”

¹⁹I Abner suele binasale'mo tiba aha mian nu Benyamin ka' lapas aijo' nambamo i Hebron mompoto'i hi Daud apaa na anu sinitujuanmo nu aha mian nu Benyamin tiba aha mian nu Israel.

²⁰Tempo'nyo i Abner tiba aha uampulu' na suludadunyo nangadap hi Daud kiijo' mae i Hebron, i Daud nombaumo bau-bauon nompokaan aha.

²¹Lapas aijo' pinoitamo i Abner de timbali da motatae pe'e, “Pobee' mae na aku de timbali da mamba monsale'i aha songko-songko mian Israel da mosa'angu'mo tiba belento Tuanku. Da belento Tuanku nu alamo nu aha bau tomundo' nu aha, sahingga tiba jalan anu sumo aijo' belentomo Tuanku na mompalentah songko-songko na lipu', susumo anu nu kahanda'i nu belento Tuanku.” Lantas i Abner pinobee'mo i Daud namba ka' ingusahakan ahi' i Daud da boli ko anu mompoposia mae ia.

²²Salatan i Abner nambamo i Yoab tiba suludadu i Daud sangga'at anu namba nahampate ninsusule'mo mae ka' nomboamo mae manjoo' hondo na balang anu pinahuhuakon mae.

²³Ko anu nompoto'i hi Yoab, tukoonyo nu aha i Abner tinokamo mae hi Tomundo' Daud ka' pinobee'mo namba ka' ingusahakon ahi da boli ko anu mompoposia ia.

²⁴Lantas i Yoab nambamo nangadap hi tomundo' ka' nompoto'i, “Mosia na belento Tomundo' ka' nombaumo anu sumo aijo'? I Abner tinokamo mae nangadap hi belento Tomundo'. Kadaka' belento Tomundo' nompobee'mo ia namba?

²⁵Au' toaje Tomundo' na i Abner aijo' tinoka mae ola da mongakali belento Tomundo' ka' ola kahanda' montoa pa'mosia na kita aiya ka' da nu sumbu' na tanga'an nu belento Tomundo.”

²⁶Salatan i Yoab nompala'imo i Daud, i Yoab nonsaimo mian da mamba molaga mae i Abner. Aha nonsusuakonmo i Abner lantas sinampamo nu aha koko bubung Sira. Lantas pinoboamo mae nu aha. Iwi-iwi' apaa na anu jinadimo aijo' madi' sinumbu' i Daud.

²⁷Salatan i Abner tinokamo kiijo' i Hebron koko sabatan daka' nu kota' sinalo'anmo i Yoab na ia da mo uuka mae i sohipi'nyo au'aitu daagi ko lahasia anu opohowini. Monti-montiik jinalo'mo i Yoab na kompong i Abner sahingga ia sinilakamo. Sumo aijo' na i Abner pinatean i Yoab bau pinombalosakonnyo utusnyo ise' i Asael anu pipinatean i Abner.

²⁸Salatan ihongomo i Daud na han aijo', ia notataemo, “Belento tumpu na monsumbu' saba' aku tiba aha mian da'isan madi' hondo-hondo ko kasala'an i han nompateimo i Abner aijo'.

²⁹I Yoab ahi' na ohukum tiba aha sampoto utusannyo kalana aha nombaumo han anu sumo aijo'. O'amalakon aha sampoto utusan i Yoab molundu-lundu na lee' nu aha saja' nu kona nu panyakit kilit anu okabuhuk, kabai to momo'ane nu aha madi' mahoson kabai silaka i uno nu pahampatean, kabai saja' kakulangan i anu okaan!”

³⁰Sumo aijo' na i Yoab tiba i Abisai utusnyo ise' nombalosakonmo pusah nu aha hi Abner, kalana i Abner nompateimo i Asael utus ise' nu aha tempo'nyo nahampate kiijo' mae i Gibeon.

³¹Lapas aijo' i Daud nompalentahmo i Yoab tiba to sulu-suludadunyo mombea-beak baju' nu aha ka' mompusok baju' anu opusok de ko anumo silaka ka' mohaangi i Abner. Ka' salatan nomboamo i kubulan i Daud na nontuntuni peti-peti' i Abner.

³²I Abner ilamunmo kiijo' i Hebron, ka' i tomundo' tiba iwi-iwi' na mian anu nu palentah nohaangimo ka' nontando'imo i ahop nu pinolamunan.

³³Lapas aijo' i Daud nontando'imo i Abner ka'notatae, “Te i Abner sinilaka susumo mian anu potun:

³⁴Limannyo madi' pinungu ka' tengkenyo madi' pinungu nu lante' besak? Ia sinilaka jinalo' nu mian anu ma'idek na kinyonyoanyo.” Lantas iwi-iwi' na mian anu nohaangimo i Abner nompaka polotando'mo.

³⁵Sansina-sinaa na mian mongkakase i Daud da mongkaan ahi' sangkiding panyo ia binasumpa'mo, “Ku poita da Tumpu Allah mompateimo mae aku, de aku mongkaanmo ma'isa pe'e makakinsap na batu nu sinaa!”

³⁶Nohongo aijo' mian da'isan sinanangmo. Memang maumo pa' apaa na nu bau i Tomundo' Daud saja' momposanang kinyonyoa nu aha.

³⁷Isinaa aitu iwi-iwi' na mian da'isan anu nu palentah i Daud tiba iwi-iwi' na bansa Israel nonsumbu'mo taalu' i tomundo' madi' ahi ko kinyonyoa mompatei i Abner.

³⁸I Tomundo' notatae hi to mia-mian anu monsangaja'i ia, “Madi' osumbu' nu belemiu, sinaa aiya samian na polaya' anu talasanggo i Israel sinilakamo?

³⁹Maumo aku aiya tomundo' anu pinile'anmo nu Tumpu Allah, panyo uuka aiya ku oa'i madi'mo ko kahosonan. To ana-anak i Zeruya haha aijo' talalo hondo buhingison. Madi'mo ku poko ala na mompalentah aha. O'amalakon da Tumpu mohukum mian anu toto ide-idek na kinyonyoanyo pokakana tiba apaa na anu lewa'mo binau nu aha!”