Read Saluan 2 SAMUEL 6 Bible Online

2 SAMUEL 6 - Saluan bible

2 SAMUEL 6

¹Lapas aijo' ilaga mule' i Daud na to sulu-suludadunyo anu otaha imani hi aha Israel, da sihuk pe'e mae konjoo'nyo 30.000 na mian.

² Aha binoanyomo i Baale-Yehuda da mongala mae kiijo' Peti Palajanjian anu osa-osanggohi Tumpu Daka' hondo na kuasanyo anu naninsuhang aita hi to mala-malaikat.

³ Peti' Palajanjian aijo' ingalamo hi laigan i Abinadab aita i bungkutnyo ka' pinosake'mo mae i kaleta anu daagi bu'ou. Lantas i Uza tiba i Ahio to ana-anak i Abinadab na nombatuki kaleta aijo'; i Uza ilumajang koko sohipi'nyo,

⁴ka' i Ahio na ilumajang aita momona.

⁵I Daud tiba aha iwi-iwi' na bansa Israel na ilumajang aita momona, ka' jinukutmo hondo na aha lewa' nonsalelei ka' lewa' nonyanyiakon salaku bau pongadati Tumpu. Aha lewa'mo nongkuti' kasapi', gambus, gandang, nompo onyi' dio-dio, simbal.

⁶Salatan aha tinokamo itampat pongututan gandum anu i Nakhon, sapi' haha aijo' anu mohela' kaleta aijo' tinosumpunmo lantas i Uza nontoongi Peti' Palajanjian da boli manabu'.

⁷Sahingga Tumpu pinusamo hi Uza, kalana apaa na anu binaunyomo sumomo nongambangimo Tumpu. I Uza pinatean-Nyomo itampat aijo' koko Peti' Palajanjian.

⁸Sahingga lengkat pe'e tempo'nyo aitu tampat aijo' sinanggohanmo Peres-Uza. I Daud pinusamo kalana Tumpu nompateimo i Uza.

⁹Panyo i Daud mongkabuhuk ahi Tumpu, sahingga ia notataemo, “Jadi uuka aiya mosia na Peti' Palajanjian aiya ku boa?”

¹⁰Kalana aijo' ia madi'mo nongka'oho' nomboa Peti' Palajanjian aijo' oboa i Yerusalem, panyo pino una'nyomo hi laigan i Obed-Edom mian nu Gat.

¹¹ Peti' Palajanjian aijo' jinojoongmo ikiijo' tinotolu' na bitu'on na kinopinnyo, ka' i Obed-Edom tiba aha salaigan binalakatanmo nu Tumpu.

¹²Salatan ihongomo i Daud na i Obed-Edom ka' aha salaigan ka' mule' iwi-iwi' apaa na anu daagi hi aha, binalakatanmo nu Tumpu kalana Peti' Palajanjian pinojoongmo hi aha. Sahingga ia nambamo hi laigan i Obed-Edom nongala Peti' aijo' ka' ilalinnyomo namba i Yerusalem ka' nombaumo bau-bauon na aha nolame'akon Peti' aijo'.

¹³Salatan anu nohangkat Peti' Palajanjian aijo' ilumajangmo salaje' anolangkas pinoto'imo i Daud da bolimo pe'e lumajang. Lantas ia nonsombahkonmo koloban hi Tumpu, te sapi' lakinyo ka' anak nu sapi' anu pinilompo'anmo.

¹⁴Lapas aijo' i Daud lebemo hondo nonsalelei salaku bau pongadatinyo Tumpu. Tempo'nyo aitu ia ola nompusok, lipa' lenan kodo-kodo' pinotapi'nyo.

¹⁵Sumo aijo' na i Daud tiba aha mian da'isan iwi-iwi' Israel nolalin Peti' Palajanjian namba i Yerusalem lewa' ingaisan ka' nontaligalai ka' lewa'mo nompuuhi tolompet.

¹⁶Salatan Peti' aijo' hau-haunyomo minsoop i kota' i Mikhal anak boune i Saul nontoamo mae itolongan ka' nontoamo i Tomundo' Daud nahalumpatanmo na nonsalelei salaku bau pongadatinyo TUMPU, i Mikhal nompai nolua'imo na nontoa i Daud.

¹⁷Peti' Palajanjian aijo' pino una'mo i tampatnyo anu pinotokamo i Daud i uno nu kemah. Lapas aijo' i Daud nonsombahkonmo hi Tumpu koloban anu opotunu ka' koloban paladamean.

¹⁸Lantas binalakatannyomo na aha mian nu Israel i uno nu sanggo nu Tumpu Anu Daka' na kuasanyo.

¹⁹ Lapas aijo' binagi-baginnyomo anu okaan na aha iwi-iwi'. Toto samian na aha anu ikiijo' to momo'ane tiba to bou-boune binee'annyo sampadot na ponoha' anu tinunuanmo, roti tiba kukis kismis. Lapas aijo' aha iwi-iwi' ninsusule'mo ilaigan nu aha toto samian.

²⁰Tempo'nyo i Daud ninsusule'mo ilaigan nu tomundo' kaka jojoongannyo ka' nonsalando'aimo bengkele' tiba to ana-anaknyo, i Mikhal nosabatmo mae nolalabot i Daud ka' notatae, “Sinaa uuka tomundo' nu Israel totu-totu'u nombaumo butongnyo da o adati! Ia nilanggomo susumo mian anu ponga' anu madi'mo na ambang i ahop nu to bou-boune aijo'mo to posa-posaihon nu aha mian anu ko pangkatnyo anu mokalaja ilaigan nu tomundo'!”

²¹Tinaaman i Daud, “Aku monsalelei bau pongadati Tumpu anu madi'mo nongala tuuma nu beleyum tiba to utu-utusnyo lantas nompile'imo aku binau pamalentah nu Israel mian anu pinalesayamo hi Ia. Kalana aijo' aku sabole-bole ahi monsalelei bau pongadati Tumpu.

²²Ka' mule' sanang na aku o alu ka' opopo ambang mau pe'e molabi anu susumo u'uka. Timbali beleyum montaloakon aku anu madi' ko kaliangannyo, panyo to posa-posaihon anu sinanggo nu beleyum u'uka na mongadati ahi' aku!”

²³I Mikhal anak boune i Saul aijo' madi' nohumpak anak sampe ia sinilakamo.