Read Saluan 2 SAMUEL 8 Bible Online

2 SAMUEL 8 - Saluan bible

2 SAMUEL 8

¹Madi' pinin ilapas na aijo' i Tomundo' Daud nontumbuhimo mule' mian nu Filistin. Pinatundu'nyomo na aha ka' ingalanyomo na tano' nu aha.

²I Daud nompatundu' mule' aha mian nu Moab. Pinokaunyo na aha nale' nale' i tano' lantas salatan de totolu'mo na olanggai opateimo na ohua' na mian. Jadi aha mian nu Moab nongkabuhukmo hondo i Daud ka' nombayanmo hasin hi ia.

³Lapas aijo' i Daud nompatundu' mule' i Tomundo' Hadadezer anak i Rehob anu nompalentah kiijo' i Zoba, sa'angu' na kalajaan koko Damsyik. Tempo'nyo aijo' i Hadadezer, hau-haunyo nambamo kahanda' monsoba de opoko ala po ule' nu kuasai na da'erah koko mata nu Kaunyo Efrat.

⁴I Daud nohakopmo aha 1.700 na mian, te suludadu anu nonsake'i ajahan tiba aha 20.000 na mian, te suludadu anu ilumajang tengke. Pinaha pengko'annyo na ajahan sangga'at, ola sambagian anu unggalannyo sa'atu na ajahan na madi' da mohela' kaleta anu opake bau pahampate.

⁵Aha mian nu Siria anu lengkat mae i Damsyik nonsaimo mae suludadu nu aha da montulungi i Tomundo' Hadadezer. Panyo aha ola pinatundu' i Daud ka' pinateannyomo na aha 22.000 na mian.

⁶Lapas aijo' i Daud nombaumo kemah da bau kajojoongan nu to sulu-suludadunyo i da'erah nu aha ka' aha mule' tinulutmo ka' nombayanmo hasin hi ia. I Daud saja'mo pino untung nu Tumpu na nahampate maumo pa' iyaya mae.

⁷Kanta nu suludadu i Hadadezer anu pinokonan mosoni' pinahuhuakonmo i Daud ka' binoanyomo i Yerusalem.

⁸Ka' sangga'at mule' tambaga' suele manjoo' hondo na ingala mae i Daud kiijo' i Betah ka' kiijo' i Berotai, to kota-kota' anu naipuan mae kinuasanmo i Hadadezer.

⁹I Tomundo' Tou anu kiijo' mae i Hamat nohongomo lele nu aha suludadu i Hadadezer iwi-iwi' pinatundu'mo i Daud.

¹⁰Sahingga ia nonsaimo anaknyo momo'ane i Yoram da mamba mompotokakon salando'anyo hi Tomundo' Daud ka' mompotoka suele talima kase kalana ia inguntungmo na nahampate kalana i Hadadezer toho'mo nahampate tiba i Tou. I Yoram nambamo hi Daud nomboa mosoni' manjoo' hondo bau palasen ka' mule' tambaga tiba salaka.

¹¹I Tomundo' Daud nonsombahkonmo palasen haha aijo' iwi-iwi' hi Tumpu, da ogunakon de monsombahmo Tumpu. Sumo aijo' suele na mosoni' tiba salaka anu pinahuhuakonnyo mae hi Hadadezer tiba hi to bansa-bansa sangga'at anu pinatundu'nyomo aijo'mo bansa Edom, Moab, Amon, Filistin tiba Amalek.

¹³ Sanggo i Daud nompaka talasanggomo mule' salatan ia ninsusule'mo mae ka' nompateimo mae aha 18.000 na mian nu Edom kiijo' i Bangka'nyo nu Asin.

¹⁴Ia nombaumo kemah da bau kajojoongan nu suludadunyo i songko-songko na Edom, ka mian nu Edom iwi-iwi' tinulutmo hi ia. Tumpu saja'mo nompo untung i Daud mahampate maumo pa' iyaya mae.

¹⁵Sumo aijo' na i Daud nompalentah songko-songko na Israel ka' nu jaga da mian anu nu palentah, opalentah ma'i-ma'ma' adin.

¹⁶Aiya na to mia-mian anu ko pangkatnyo matangkas anu ihangkat i Daud: Talenga' nu suludadu: i Yoab anak i Zeruya; Julutulis nu anu mokalaja i laigan nu tomundo' i Yosafat anak i Ahilud; To ima-imam: i Zadok anak i Ahitub, ka' i Ahimelekh anak i Abyatar; Julutulis nu kalajaan: i Seraya.

¹⁸Kapala nu anu monjagai i tomundo': i Benaya anak i Yoyada; To ima-imam ilaigan nu tomundo': to ana-anak i Daud.