Read Saluan 2 SAMUEL 9 Bible Online

2 SAMUEL 9 - Saluan bible

2 SAMUEL 9

¹ Daagi kino sansinaan i Daud nolelekimo, “Pa' daagi ko anu tinumuu' na lee' mae i Saul? De pa' daagi aku ko kahanda' ma'ima' hi ia kalana aku monginau' i Yonatan.”

²Aha salaigan i Saul daagi ko posaihonnyo sanggonyo i Ziba, lantas ia pinotuunmo i Tomundo' Daud da toka pe'e mae mangadap hi ia. I Tomundo' nompokilawamo hi ia, “Pa' beleyumo na i Ziba?” Tinaamannyo, “Ii' kita Tomundo'.”

³ Lapas aijo' pinokilawa mule' i tomundo', “Pa' daagi ko anu tinumuu' na aha salaigan mae i Saul? Aku ko kahanda' ma'ima' hi ia susumo anu jinanji'kumo hi Tumpu Allah.” Tinaaman i Ziba, “Daagi samian na anak mo'ane i Yonatan, ia pengko'.”

⁴Pinokilawa mule' i tomundo', “Iya mae na ia?” “Kiijo' mae i Lodebar, jojoong i laigan i Makhir anak i Amiel na tinaaman i Ziba.”

⁵Lantas pinalentahnyomo da mian mamba molaga anak mo'ane i Yonatan aijo'.

⁶Anak mo'ane i Yonatan aijo' sanggonyo i Mefiboset. Salatan ia tinokamo ia tinolodadupumo noholomati i Daud. I Daud nolagamo ia tukoonyo, “Mefiboset”, sahingga tinaamannyomo, “Ii' kita Tomundo.”

⁷Notataemo na i Daud, “Boli mabuhuk. Ku kanonongimo na beleyum kalana monginau' i Yonatan tuuma nu beleyum. Iwi-iwi' na tano' anu nu kai' nu beleyum ku sule'akonmo hi beleyum ka' mule' sampe toka sidu-sidutu' beleyum mongkaanmo aiya ilaigan nu tomundo'.”

⁸I Mefiboset tinolodadupumo mule' noholomati ka' notatae, “Aku aiya anu madi' kokaliangannyo! Kadaka' belento Tomundo' talalomo mongkanonongi mae aku?”

⁹Lantas ilaganyomo na i Ziba posaihon i Saul aijo', ka' pinoto'inyomo, “Iwi-iwi' apaa na anu pinala'ianmo i Saul ka' to ana-anaknyo ku bee'mo hi makumpu nu tuan nu beleyum aiya.

¹⁰Beleyum tiba to ana-anak nu beleyum ka' mule' mian anu montulungi beleyum tionyo ahi' mongale'imo tano' nu aha aijo', da hasinnyo bau kapalaluan nu to ana-anak i Saul tuan nu beleyum aijo' ka' isi nu ale' aijo' obee' hi aha da monsukupi kapalaluan nu aha. Panyo i Mefiboset na mongkaan ahi' aiya ilaigan nu Tomundo' sampe toka sidu-sidutu'.” (I Ziba ko anak aha 15 na to momo'ane ka' aha 20 na posaihon.)

¹¹Tinaaman i Ziba hi Tomundo', “Iwi-iwi' na palentah nu belento Tomundo' ku baumo.” Jadi i Mefiboset saja'mo mongkaan hingga-hinggat tiba i tomundo' sumomo posi anaknyo mo'ane i Tomundo' Daud.

¹²I Mefiboset kino anak mo'ane sanggonyo i Mikha. I Ziba ka' aha iwi-iwi' salaigan binaumo i Mefiboset to posa-posaihonnyo.

¹³Sumo aijo' na i Mefiboset anu pinengko'mo ohu-ohua' na tengkenyo aijo' jinojoongmo i Yerusalem ka' saja'mo mongkaan hi laigan nu tomundo'.