Read Saluan 1 TOMU-TOMUNDO' 1 Bible Online

1 TOMU-TOMUNDO' 1 - Saluan bible

1 TOMU-TOMUNDO' 1

¹Uuka aiya i Tomundo' Daud i langkai'mo hondo. Maumo ia minsabut nu hude anu butolu, tataap ia mabakin.

²Kalana aijo' to mimian anu ko pangkatnyo nompoto'imo, “Kita mian anu talasanggo, lebe ma'ima' da olioimo mami samian na langkoyang jojoong hi belento Tomundo' da mompalakai belento Tomundo'. Ia hoyot tiba belento Tomundo' da belento Tomundo' mongoa'i mamut.”

³Lantas iliomo hi aha songko-songko na Israel samian an langkoyang anu handa hondo. Sahingga kiijo' i Sunem i humpakmo na samian anu langkoyang hondo sanggonyo i Abisag. Ia binoamo hi tomundo' lantas nontamongimo ia ka' nompalakaimo ia. Panyo' i Tomundo' madi' nompatiduhusi.

⁴

⁵ Kalana i Absalom sinilakamo, sahingga i Adonia, anak mo'ane i Daud anu ko ohua'nyo na tinimbalimo anu tumpenyo. Tinanyo i Hagit na sanggonyo. I Adonia olitau hondo. Tuumanyo madi' toho' montambuha'i ia de ia mombau kasala'an. I Adonia mongka'ima'i hondo bau Tomundo' sahingga ia nomposadiamo kareta bau pahampate ka' suludadu anu monsake'i ajahan ka' aha limampulu' na suludadu anu monjagai ia

⁶

⁷lantas ia nambamo binasale' ka' i Yoab tiba i Imam Abyatar, tinanyo i Yoab sanggonyo i Zeruya. I Yoab ka' i Imam Abyatar sinitujumo monsangaja'i tanga'an i Adonia.

⁸Panyo' i Imam Zadok, i Benaya anak i Yoyada, i Nabi Natan, i Simei, i Rei, ka' suludadu anu lewa'monjagai Tomundo' Daud madi' monsangaja'i i Adonia.

⁹Daagi' kino sansinan i tampat sanggonyo Batu Ulo koko mata nu uee En-Rogel, i Adonia nomsombahkonmo domba binau koloban, sapi' lakinyo tiba anak nu sapi' anu toto lompo-lompo'. Ia nolagamo to ana-anak mo'ane sangga'at i Tomundo' Daud ka' to mia-mian anu ko pangkatnyo monjagai laigan nu tomundo' aha mae tulunan nu bansa Yehuda da mamba i bau-bauon mongkolobanakon aijo'.

¹⁰Panyo i Salomo utus ise'nyo, tiba i Nabi Natan ka' mule' i Benaya ka' suludadu anu monjagai i Tomundo' Daud madi' i laganyo.

¹¹ Sahingga nambamo na i Nabi Natan siningkabot i Batsyeba, tina i Salomo, lantas notataemo hi ia, “Pa' belento bengkele' nu Tomundo' ma'isa nohongo i Adonia, anak mo'ane i Hagit, nosi hangkatmo butongnyo bau tomundo', padahan i Tomundo' Daud madi' nonsumbu-sumbu' han aijo'?

¹²De belento bengkele' i Tomundo' mongkahanda'i da i Salomo tiba belento bengkele' i Tomundo' salamat ku pokinde'i,

¹³malia-lia' mamba mangadap hi Tomundo' Daud, ka' poto'i hi ia sumo uuka: ‘Te misa' belento Tomundo' binaumpa'mo hi belengku da i Salomo anaku anu momo'ane o hangkatmo bau tomundo' mombolosi belento Tomundo'? Uuka aiya, kadaka' i Adoniamo na tinimbali tomundo'?’ ”

¹⁴I Natan po'ule' mule' notatae, “Saidi' mae, de belento bengkele' nu Tomundo' motataemo hi tomundo' minsoopje na aku da mompaka pohoson apaa na anu nu taloakon nu belento Bengkele' nu Tomundo'.”

¹⁵Sahingga nambamo na i Batsyeba nangadap hi tomundo' i uno nu salipi'nyo. I Tomundo' tempo'nyo aitu i langkai'mo hondo, ka' i Abisag, langkoyang anu lengkat mae i Sunem aijo' hau-haunyo montoukai kapalaluan i tomundo'.

¹⁶I Batsyeba tinolodadupumo i ahop hi tomundo' lantas pinokilawamo i tomundo' na ia, “Apaa na anu nu kahanda'i mae?”

¹⁷Tinaaman i Batsyeba, “Kita mian daka' anu talasanggo belentoo Tomundo' binasumpa'mo hi belengku i unonu sanggo nu Tumpu Allah nu belento Tomundo', saba' i Salomo anaku momo'ane baumo tomundo' mombolosi belento Tomundo'.

¹⁸Panyo uuka aiya madi' sinumbu' nu belento Tomundo' i Adonia tinimbalimo tomundo'.

¹⁹Ia nonsombahkonmo domba manjoo' hondo, sapi' lakinyo ka' anak nu sapi' anu toto lompo-lompo'. Ia nolagamo mule' anu namba i bau-bauon aijo' to ana-anak mo'ane nu belento Tomundo' ka' i imam Abyatar tiba i Yoab, talenga' nu suludadu nu belento Tomundo'. Panyo' ia madi' nolaga i Salomo.

²⁰Kita mian daka' anu talasanggo, iwi-iwi' na mian da'isan nu Israel, uuka aiya lewa'mo montanda'i ihe na otiju' nu belento Tomundo', timbali tomundo' mombolosakon belento Tomundo'.

²¹De belento Tomundo' madi' malia-lia' monuju' ihe na mombolosakon tantu de belento Tomundo' silakamo, aku tiba anaku momo'ane obuamo nu aha susumo mian anu nombaumo gau' anu ma'idek.”

²²Hau-haunyo i Batsyeba daagi' basisik, i Nabi Natan tinokamo i laigan nu tomundo'

²³lantas pinoto'imo hi tomundo' na kahanda' i Natan tinoka mae. I Batsyeba nosabatmo ka' i Natan ninsoopmo, lantas tinolodadupumo i ahop nu tomundo'.

²⁴I Natan notataemo “Kita mian daka' anu talasanggo i, pa' belento Tomundo' nombebakonmo i Adonia na mombolosakonmo belento Tomundo', iamo na bau tomundo'?

²⁵Sinaa uuka aiya ia nonsombahkonmo manjoo' hondo na domba, sapi' lakinyo ka' anak nu sapi' anu toto lompo-lompo' hondo. Iwi-iwi' na to momo'ane anak nu belento Tomundo' i laganyomo. Ka' suele to tale-talenga' nu suludadu i Tomundo' ka' i Imam Abyatar. Aha tempo' uuka hau-haunyo nombaumo bau-bauon tiba ia ka' lewa'mo binilahi, 'Higahiakon ame na i Tomundo' Adonia!'

²⁶Panyo' ia madi'nolaga aku. I Imam Zadok ka' i Benaya tiba i Salomo suele madi' ilaganyo.

²⁷Pa' belento Tomundo' na nompalentah ia nombau anu sumo aijo' iwi-iwi', mau madi' pilenje mompoto'i hi to mia-mian anu ko pangkatnyo mokalaja hi belento Tomundo', ihe na saidi' mae mombolosakon belento Tomundo'?”

²⁸I Tomundo' Daud notatae, “Laga mae na i Batsyeba”, sahingga nosabatmo na i Nabi Natan ka' i Batsyeba po'ule'mo nangadap hi tomundo'.

²⁹Lantas notataemo na i Tomundo' hi ia, “Memang aku nojanji'mo hi beleyum, i uno nu sanggo nu Tumpu Allah nu Israel, tukoongku i Salomo anak nu beleyum momo'ane na momobolosakon aku bau tomundo', jadi uuka aiya aku balajanji' hi beleyum i uno nu sanggo nu Tumpu anu tumuu', anu nolapasakon aku i kasansala'anku iwi-iwi', sinaa uuka aiya ku baumo apaa na anu jinanji'kumo hi beleyum.”

³⁰

³¹Sahingga tinolodadupumo na i Barsyeba ka' notatae, “Higahiakon mae na kita mian daka' anu talasanggo sampe toka sidu-sidutu'!”

³²Lantas i Tomundo' Daud nompalentahmo anu molaga mae i Zadok, i Natan tiba i Benaya. Salatan aha tinokamo,

³³notataemo na i tomundo' hi aha, “Laga mae na to sulu-suludadungku anu matangkas na pangkatnyo ka' lako' tiba aha hi Salomo anaku momo'ane. Posake' mae na ia i bagalku, ka' boa na ia i mata nu uee Gihon.

³⁴Kiijo' mae i Zadok ka' I Natan tionyo ahi' ohangkatmo da ia baumo tomundo' nu mian Israel. Lapas aijo' opo'onyi'mo nu bele miu na tolompet ka' lewa' otaligalai, 'Higahiakon mae na i Tomundo' Salomo!'

³⁵Lapas aijo' batukimo mae na ia minsusule' mae i aiya monsuhangi kasuhanganku, kalana ia na anu pinile'ankumo bau tomundo' mombolosakon aku, da mompalentah Israel tiba Yehuda.”

³⁶“Ii', sumo itina'mo,” kita mian anu talasanggo tinaman i Benaya, “o'amalakon da Tumpu Allah nu belento Tomundo' mompohoson palentah nu belento Tomundo' aijo'.

³⁷Susumo Tumpu nonjagai belento Tomundo' O'amalakon da ia suele mombalakati i Salomo. O'amalakon da Tumpu lebe mombee'i kabilahian de ia mompalentahmo nulingkudui na belento Tomundo' nompalentah.”

³⁸Sahingga i Zadok, i Natan, i Benaya ka' suludadu anu monjagai tomundo' nompoitamo i Salomo da sumake'mo i bagal i tomundo' lantas sinangaluanmo nu aha namba i mata nu uee Gihon.

³⁹Lapas aijo' i Zadok nongalamo tampat pongisian lanya' nu Zaitun anu binoanyo mae lengkat kiijo' mae i kemah nu Tumpu, lantas binalakatannyomo na i Salomo ka' sinapuakonnyomo na lanya' aijo'. Tolompet mule' pino'onyi'mo ka' iwi-iwi' na anu tinoka i kiijo' nontalagalaimo, “Higahiakon mae na i Tomundo' Salomo!”

⁴⁰Lapas aijo' aha iwi-iwi' nombatukimo ia ninsusule' ka' lewa'mo nontaligalai ka' nompoonyi' puloit sahingga tano' sumo anu mobiha'mo kalana tahahumo i lame'.

⁴¹I Adonia tiba iwi-iwi' na anu ilaganyo sala'je i lapas na nombaubauon tempo'nyo aha nohongo kalame'an aijo'. Salatan i Yoab nohongomo onyi' nu tolompet, ia nompokilawamo “Apaa na anu jinadimo kiijo' i kota' sahingga tahahumo i lame'?”

⁴²Ma'isa pinupus na i Yoab notatae, monti-montiik tinokamo na i Yonatan anak i imam Abyatar. “Imbo' pinsoop mae,” na koonyo i Adonia. “Beleyum mian anu ma'ima', tantu anu nu boa mae aiya lele anu ma'ima'.”

⁴³“Tabea'je boli kulang, misa' lele anu ma'ima',” na koonyoi Yonatan. “I Tomundo' Daud no hangkatmo i Salomo binau tomundo'!

⁴⁴I Zadok, i Natan, i Benaya ka' suludadu anu monjagai tomundo' pinalentahmo mombatuki i Salomo ka' lewa' montaligalai pinosake'mo nu aha i bagal i tomundo'.

⁴⁵Ka' i Zadok, tiba i Natan nohangkatmo ka' nombalakatimo i mata nu uee Gihon. Uuka aiya aha ninsusule'mo i kota ka' i lame'mo hondo na aha lewa' nontaligalai ka' iwi-iwi' na mian nu kota nohongomo aijo'. Aijo'mo na kalame'an anu i hongomo nu belemiu u'uka.

⁴⁶I Salomo uuka aiya tinimbalimo tomundo'.

⁴⁷Ka' suele to sulu-suludadu i tomundo' anu matangkas na pangkatnyo nambamo nontalima kase hi Tomundo' Daud. Aha notatae 'Amalakon da Tumpu Allah i Tomundo' mompotimbali i Salomo lebe talasanggo molingkudui belento Tomundo', o'amalakon da i Salomo mompalentah lebe mohumpak kabilahian molingkudui belento tomundo' nompalentah.' Lapas aijo' kiijo' i kahoyotannyo, i Tomundo' Daud tinolodadupumo nonsombah Tumpu Allah,

⁴⁸ka' binalado'a ‘Ku puji' na belento O Tumpu, Tumpu Allah anu nu sombah nu mian Israel. Sinaa aiya samian na lee' ku i hangkatmo nu belento binau tomundo' nombolosakon aku. Ka' belento Tumpu nompobee'mo mae aku tinumuu' daagi' Nonsakisi'i!’ ”

⁴⁹To mia-mian anu i laga nombaubauon hi Adonia nabuhukmo sahingga aha iwi-iwi' tinuminjomo ka' nambamo, toto samian nosi alamo jalan.

⁵⁰Sahingga i Adonia nongkabuhukmo i Salomo sahingga ia nopalaimo namba i Kemah nu Tumpu ka' nontoongi iwi-iwi' pasu'nyo nu mezbah i kiijo'.

⁵¹Mian nompoto'imo han aijo' hi Tomundo' Salomo. Aha nompoto'i tukoonyo nu aha kalana i Adonia talalomo nabuhuk i Salomo, sahingga ia nambamo i mezba ka' nontoongi pasu'nyo iwi-iwi' nu mezba aijo' ka' notatae, “Aku madi' mamba mompala'i tampat aiya, de ma'isa pe'e i Salomo basumpa' hi belengku, montaloakon tukoonyo ia madi'mo daagi' mompatei aku.”

⁵²Tinaaman i Salomo, “De ia mombau mee anu ma'ima' ia madi' ku hukum mau pe'e ola babanggan; panyo' de ia mombau mae anu ma'idek, ia tionyo' ahi' ku patei.”

⁵³Lantas pinalentahnyomo na mian mamba mongala i Adonia kiijo' i mezba. Sahingga tinokamo mae na i Adonia nangadap hi tomundo', ka' tinolodadupumo i ahopnyo. Lantas i tomundo' notataemo, “Beleyum timbalimo minsusule'!”