Read Saluan 1 TOMU-TOMUNDO' 19 Bible Online

1 TOMU-TOMUNDO' 19 - Saluan bible

1 TOMU-TOMUNDO' 19

¹I Tomundo' Ahab nonsisikmo hi Izebel bengkele'nyo, iwi-iwi' na anu binaumo i Elia, ka' mule' mosia na i Elia nompateimo iwi-iwi' nabi Baal haha aijo'.

²Sahingga i Izebel nompotuunmo hi Elia sumo uuka, “O' amalakon da iwi-iwi' na pilogot mohukumo mae, pakalaus mompateimo aku, de dodop sumo sinaa aiya, madi' ku patei na beleyum susumo anu binaumo nu beleyum hi nabi Baal haha kiijo'.”

³I Elia nabuhukmo lantas nopalaimo da boli opatei. Ia nambamo tiba posaihonnyo namba i Bersyeba kiijo' mae i Yehuda. I kiijo' mae ia madi'mo nongka'oho' da susumo nabi,

⁴ lantas ia i lumjangmo tengke nambamo i padang mateges sinansinaa na ia i lumajang sampe tinoka no kiijo' i patu nu kau' anu hopo' hondo na honnyo. I kiijo'mo na kina suhangannyo ka' gagalannyo sahanyo matemo. “Madi'mo ku poko ala mongintim O Tumpu.” Na pinoto'inyo hi Tumpu. “Alamo na nyawangku. Aku madi' lebe ma'ima' molingkudui mompole'ku mae!”

⁵Lantas ia nale'mo i patu nu kau' aijo', ka' kinahoyotanmo. Monti-montiik samian na malaikat nolikomo ia ka' nompoto'i “Bulamo Elia, pongkaanmo!”

⁶I Elia noposilele'mo duhu-duhuk, lantas nontoamo koko ubaknyo saangu' na roti anu tinunu ka' selekan ko isinyo uee. Kinaannyomo ka' inginumnyomo, lapas aijo' po'ule' mule' ia nale'.

⁷Tinoka kinopinduannyomo malaekat nu Tumpu noliko ia mule' ka' nompoto'i, “Pobulamo, Elia ka' pongkaanmo da beleyum moko ala montahan lumajang majo'on.”

⁸I Elia nobulamo ka' nongkanmo ka' nonginummo. Sahingga ia nahosonmo ka' noko alamo lumajang pinatompulu' na sinaa na kinopinnyo namba i Bungkutnyo nu Sinai, tampat pinanintoan nu Tumpu Allah.

⁹Kiita' mae i Elia i hoyotmo i uno nu liang. Lantas notataemo na Tumpu hi ia, “Apaa na nubau aiya Elia?”

¹⁰Tinaaman i Elia, “O Tumpu, Tumpu Allah Anu Daka' na kuasanyo, aku saja'mo nokalaja ola samata-mata mombau anu nu palentahkon. Panyo mian nu Israel anu pinalesayamo nolanggaimo palajanjian nu aha hi belento Tumpu. Aha nohobo'akonmo mezbah nu Belento ka' nompateimo to nabi-nabi nu Belento. Me aku sausa' na daagi' aiya tinumuu', ka' uuka aiya aha kahanda'mo mompatei aku!”

¹¹“Posabatmo mae atina' i liang,” na koonyo nu Tumpu hi ia, “tinjo aita' i bungkutnyo mongahopi mae Aku.” Lantas Tumpu notulumo kiijo', panyo mombun na momona notulu makansang hondo, sahingga to bungku-bungkutnyo nobiha'mo ka' to bungku-bungkutnyo nu batu noposo-poso'mo. Panyo Tumpu madi' nanintoa i mombun aijo'. I lapas na mombun aijo' tinoka mule' na luulu', panyo' hau-haunyo ko luulu' aijo', Tumpu madi' ahi' nanintoa.

¹²Lapas aijo' tinoka mule' na apu, panyo' Tumpu madi' ko anu i uno nu apu aijo'. Lapas aijo' apa-apaa na anu jinadimo aijo' ilingmo lantas nohongomo potatae anu ise' hondo ka'nompomalasi.

¹³Salatan i hongomo i Elia na potatae aijo', kinukubannyomo na ohupnyo nu juba'nyo lantas ia nosabatmo mae i liang aijo' ka' tinuminjomo inganga' nu liang aijo' lantas nohongomo potatae nontaloakon, “Elia, apaa na nubau i aiya!”

¹⁴Tinaaman i Elia, “O Tumpu, Tumpu Allah Anu Daka' na kuasa'nyo, aku saja'mo nokalaja ola samata-mata mombau anu o palentahkon nu Belento. Panyo' mian nu Israel anu pinalesayamo hi belento nolanggaimo palajanjian nu aha hi belento. Aha nohobo'akonmo mezbah nu belento ka' pinaha pateanmo nu aha na iwi-iwi' na nabi nu belento. Me aku aiya sausa' na daagi' tutuu', ka' uuka aiya aha kahanda'mo mompatei aku!”

¹⁵ Tumpu notatae, “Pinsusule'mo mamba i padang mateges koko Damsyik! Lantas lako'mo mamba i kota ka' dudu'akon na lanya' i ubak i Hazael salaku tanda saba' ia i hangkatmo binau Tomundo' nu Siria.

¹⁶ Ka' suele obau mule' sumo aijo' hi Yehu anak i Nimsi da ia baumo tomundo' nu Israel, ka' suele i Elisa anak i Safat mian nu Abel-Mehola, da ia baumo nabi mombolosakon beleyum.

¹⁷Ihe na ma'isa pinatean i Hazael nupateije i Yehu, ka' aha anu ma'isa nu poko patei i Yehu nupateije i Elisa.

¹⁸ Panyo' 7.000 na mian nu Israel Ku posalamatmo, aijo'mo to mian-mian anu sabole-bole montuluti Aku, ka' madi' toho' tolodadupu monsomba patong nu Baal kabai mongooki ia.”

¹⁹Jadi nambamo na i Elia da mompahakabot tiba i Elisa anu hau-haunyo mompajeko. Sampulu' ka' ohua' na pan na sapi' aita' momona nu tuntuni, ka' i Elisa mompajeko sapan na sapi' akaong mae mihi-mihinyo. Salatan i Elia nontulumo koko hi Elisa, ingukatmo i Elia na juba'nyo ka' pinosalabombonyomo i bikoang hi Elisa.

²⁰Sahingga pinala'ianmo i Elisa na sapi'nyo haha aijo' ka' nopadeka'mo nololoi' i Elia, ka' notatae, “Pobee' pe'e mae na aku mamba hi tu'anyongku momoita da nu pobee' mae na aku, lapas aijo' aku mombatukije belento Tuuma.” Tinaaman i Elia, “Ii' lako' pe'e. Madi' ku tewa' na beleyum.”

²¹I Elisa po'ule'mo ninsusule' i ale'nyo lantas pinahangkolotakonnyomo na sapi'nyo iwi-iwi'. Kau' nu pajekonyo pinosunnyomo bau pinongunjang antoknyo nu sapi' haha aijo'. Lapas aijo' pinaha bagi-bagiakonnyomo na antoknyo haha aijo' hi to mia-mian anu mokalaja hi ia, ka' kinaanmo nu aha. Lapas aijo' i Elisa nambamo nombatuki i Elia ka' tinimbalimo sangalunyo anu saja' montulungi ia.