Read Saluan 1 TOMU-TOMUNDO' 2 Bible Online

1 TOMU-TOMUNDO' 2 - Saluan bible

1 TOMU-TOMUNDO' 2

¹Tempo'nyo i Daud malia'mo silaka, i laganyomo na i Salomo anaknyo momo'ane ka' lewa' nombee'i pokinde' anu memenyomo aitu na ia mombee'i pokinde'. I Daud notataemo,

²“Aiyamo na tempo'nyo aku silakamo. Tionyo ahi' beleyum baani ka' palesaya totu-totu'u hi Tumpu Allah.

³Ka' obau apaa na anu nu palentahkon nu Tumpu Allah nu beleyum hi beleyum. O tuluti na to atu-atulan ka' to pale-palentahNyo anu tinulismo i uno nu Kitab i Musa, da momoya na kalambanan nu beleyum mingkaliangan na anu nu bau.

⁴De beleyum tulu-tulutan hi Tumpu, nu ganapi na janji'-Nyo aijo'mo lee'ku na mompalentah Israel, asan aha totu-totu'u na kinyonyoanyo saja' montuluti palentah-Nyo iwi-iwi'.

⁵ Daagi' mule' ko han sa'angu'! Tantu beleyum sabole-bole monginau' apaa na anu binaumo i Yoab hi belengku, aijo'mo ia nompateimo ua'aha na suludadu nu Israel anu matangkas na pangkatnyo, aijo'mo i Abner anak i Ner ka' i Amasa anak i Yeter. Ia nompatei aha tempo'nyo dinamemo kalana kahanda' mombalosakon anu pinateanmo nu aha tempo'nyo daagi' lewa' nahampate. Ia nompateimo mian anu madi' ko sala'nyo, panyo' uuka aiya akumo na montanggung apaa na anu binaunyomo ka' akumo na nongoa'i sansala.

⁶Jadi, anaku, tionyo ahi' o hukum na ia ka' baumo apaa na anu nu oa'i ma'ima', boli opojohok na ia silaka susumo silaka biasa.

⁷ Panyo' to anak-anak mo'ane i Barzilai lengkat mae i Gilead boli opoposia nu beleyum. Anu nupalalui sansina-sinaa tionyo ahi' nu posadiakon, kalana aha nanonongmo mae hi belengku tempo'nyo aku nalaimo nompala'i utus tu'a nu beleyum, i Absalom.

⁸ Mongkona i Simei anak i Gera anu lengkat mae i kota Bahurim i da'erah nu aha Benyamin, suele daagi' ko anu ku potuun hi beleyum. Tempo'nyo aku namba i Mahanaim, i Sime'i aijo' u'utu mae nontotobi'akonmo aku tinalalomo hondo. Panyo' lapas aijo' tempo'nyo ia tinokamo molalabot aku i Kaunyo Yordan, aku binasumpa'mo hi ia i uno nu sanggo nu Tumpu tukoongku aku madi'mo mompatei ia.

⁹Panyo uuka na anu ku potuun hi beleyum: boli opobebas na ia hi hukuman. Ku sumbu' na beleyum pande hondo; jadi mau mule' ia i langkai'mo hondo sabole-bole o usahakon da ia o be'i hukuman mate.”

¹⁰Lapas aijo' i Daud sinilakamo ka' i lamunmo i Kota Daud.

¹¹ Ia tinimbali Tomundo' i Israel pina tumpulu' na taun na kinopinnyo: pinopitu' na taun na ia jinojoong i Hebron. Ka' tinolumpulu' ka' totolu' na taun ia jinojoong i Yerusalem.

¹² Lapas aijo' i Salomo tinimbaimo tomundo' nombolosakon i Daud tuumanyo. Kakuasa'an i Salomo salaku tomundo' talalo hondo mahoson.

¹³Daagi' kino sansinaan i Adonia nambamo i Batsyeba. Ilelekanmo i Batsyeba hi Adonia, “Pa' ko kahanda' ma'ima' na beleyum toka mae aiya?” “Ii',” na koonyo i Adonia.

¹⁴Lantas ia po'ule' notatae, “Daagi' ko anu kahanda' ku poita hi belento pontina'on.” “Apaa?” na pinokilawa i Batsyeba.

¹⁵Tinaaman i Adonia, “Da o sumbu' nu belento pontina'on sabenannyo aku ahi' na timbali tomundo'; aijo' tinahaimananmo nu mian Israel iwi-iwi', panyo' anu jinadi misa' sumo aijo'; utus ise'kumo na tinimbali tomundo' kalana sumo aijo' na pongka'oho nu Tumpu.

¹⁶Jadi uuka daagi' ko sa'angu' na anu ku poita ka' ku kakaase da sabole-bole obee' mae nu Belento pontinaon.”

¹⁷ Pinokilawa i Batsyeba, “Apaa na anu nu poita?” Tinaaman i Adonia, “Ku poita da Belento pontina'on mompoitakon mae hi Tomundo' Salomo da opobee' mae na aku mongosoai i Abisag, langkoyang anu lengkat mae i Sunem aijo'. Ku taha'imani i Salomo madi' montewa' anu nu poita nu belento pontina'on.”

¹⁸“Ii' timbali,” tinaaman i Batsyeba, “Ku bisalakonje na itina' hi tomundo' da obee'mo hi beleyum.”

¹⁹Sahingga nambamo na i Batsyeba hi tomundo' ka' nombisalakon apaa na koonyo i Adonia. I Tomundo' nobungkutmo nolalabot tinanyo ka' nonsombah ia lantas po'ule' mule' sinumuhang i kasuhangannyo. Lapas aijo' pinalentahnyomo na mian nontoukai kadela i sasu koanannyo da bau kasuhangan nu tinanyo.

²⁰Noko sumuhang notataemo na i Batsyeba, “Aku tina nu belento kahanda' momoita apa-apaa na anu madi' maya' hi belento. Aku tina nu belento montaha'imani anu ku poita aiya tantu obee' nu belento.” “Apaa na atina' pontina'on?” pinokilawa i Salomo, “Sabole-bole ku bee'imo.”

²¹Tinaaman i Batsyeba, “Pobee'mo mae na i Adonia utus tu'a nu belento aijo' da mongosoaimo i Abisag.”

²²“Kadaka' belento pontina'on momoitamo itina' hi belengku?” pinokilawa i Salomo. “Aijo' pokakanamo momoita da aku mombee'mo kasuhanganku salaku tomundo' hi ia. Te misa' ia utusku tu'a? Ka' mule' i Imam Abyatar ka' i Yoab nonsangaja'imo ia.”

²³Noko taloakonnyo sumo aijo' binasumpa'mo na i Salomo i uno nu sanggo nu Tumpu, “Bakasmo na aku da nukona nu kutuk nu Tumpu, de madi' kupokonai hukuman mate na i Adonia, kalana ia nompoitamo sumo aijo'!

²⁴Tumpu nombalakatimo aku da binapangkat sumo aiya i kasuhangan nu tuumangku, i Daud. Tumpu nongganapimo janji'-Nyo ka' nombee'mo kalaja'an aiya hi belengku ka' hi lee'ku. Aku basumpa' i uno nu sanggo nu Tumpu anu tumuu' saba' i Adonia sinaamo aiya na ia silaka!”

²⁵Sahingga pinalentahkonmo i Tomundo' Salomo hi Benaya lantas nambamo na Benaya nompatei i Adonia.

²⁶ Lapas aijo' notataemo na i Tomundo' Salomo hi Imam Abyatar, “Lako'mo i kampung nu beleyum kiijo' i Anatot. Beleyum mohumpakmo hukuman opatei, panyo' sinaa aiya ma'isa aku mompatei beleyum, kalana beleyum daagi' tempo'nyo nosangalu tuumangku, beleyum suele nongoa'imo iwi-iwi' na kasusa'an ka' beleyum suele na lewa' nongkalesang Peti' Palajanjian nu Tumpu.”

²⁷ Lantas pinobelentimo i Salomo na i Abyatar, madi'mo binau Imam. Apaa na binau i Salomo aijo' tinimbalimo sa'angu' na bukuti' susumo anu tinaloakonmo nu Tumpu kiijo' i Silo mongkona lee' mae i Imam Eli.

²⁸Salatan i hongomo i Yoab na anu jinadimo aijo' ia nabuhukmo kalana ia nonsangaja'imo i Absalom. Sahingga ia nopalaimonamba i kemah nu Tumpu ka' nontoongi iwi-iwi' na pasu'nyo nu mezba.

²⁹Lele aiya pinotokamo i Tomundo' Salomo. Sahingga i tomundo' nompalentahmo i Benaya da i Yoab opateimo.

³⁰“I Tomundo' nompalentahmo da beleyum mosabatmo pala'imo na tampat atina'!” “Madi',” na koonyo i Yoab. “Aku matemo i aiya,” I Benaya ninsusule'mo ka' nompoto'i hi tomundo.

³¹Nohongo aijo', i tomundo' notatae, “Lako'mo ka' baumo apaa na anu pinoto'inyomo aijo'. Pateimo na ia ka' lamunmo na ia, da aku tiba iwi-iwi' na lee' nu tuumangku madi'mo montanggungi kasala'an i Yoab anu nompateimo mian anu madi' kosala'nyo.

³²Tumpu mohukummo ia, kalana ia nompateimo madi' pinai poto'inyo hi tuumangku. I Abner suludadu nu Israel anu matangkas na pangkatnyo, ka' i Amasa suludadu nu Yehuda anu matangkas na pangkatnyo, ua-ua'aha madi' ko sala'nyo. Aha na lebe ma'ima' molingkudui i Yoab, panyo pinateannyomo na aha.

³³Hukuman kalana ua'aha na suludadu anu matangkas na pangkatnyo pinateanmo i Yoab na montanggung ka' lee'nyo sampe toka sidu-sidutu'. Panyo' lee' nu tuumangku iwi-iwi' anu bau tomundo' saja' nu abalakati nu Tumpu — aha saja' mohumpak dale'.”

³⁴Lantas nambamo na i Benaya i Kemah nu Tumpu ka' nompatei i Yoab i kiijo'. Lantas i Yoab i lamunmo i sambiha' nu kota.

³⁵Lapas aijo' i tomundo' nohangkatmo i Benaya binau talenga' nu suludadu mombolosi i Yoab, ka' i Zadok i hangkatmo binau imam, mombolosi i Abyatar.

³⁶Lapas aijo' i tomundo' nolagamo i Simei ka' pinoto'inyomo hi ia, “Pombaumo laigan bau kajojongan nu beleyum i Yerusalem aiya. Jojoongmo i kiijo' ka' boli mosabat i kota.

³⁷De beleyum baani mosabat ka' mamba motaap i panga' nu kaunyo Kidron, beleyum o pateimo; ka' posi beleyum na montanggung kasala'an aijo'.”

³⁸“Ii', kita Mian Daka' Anu talasanggo,” tinaaman i Simei. “Ku baumo na palentah i Tomundo'.” Sahingga jinojoongmo na i Simei i Yerusalem tinopia-piamanga na kinopinnyo.

³⁹Salatan tinotolu'mo na taun jinadimo na han, sumo uuka: Ua'aha na posaihon i Simei, nopalaimo namba i Gat hi Tomundo' Akhis anak mo'ane i Maakha. Salatan pinoto'imo na han aijo' hi Simei,

⁴⁰ia nompokonamo kasake'an i keledainyo, lantas ia nambamo hi Tomundo' Akhis kiijo' i Gat molio posaihonnyo ua-ua'aha aijo'. Ia nohumpak aha lantas binoanyomo na aha ninsusule'.

⁴¹Salatan i hongomo i Salomo apaa na anu binaumo i Simei,

⁴²ia noki lagamo i Simei lantas pinoto'inyomo “Aku nompalentahmo beleyum da balajanji' hi Tumpu da beleyum bolimo mompala'i Yerusalem. Ka' aku mule' nompokinde'imo beleyum tukoongku, de beleyum mosabatmo aiya i Yerusalem, beleyum apateimo. Jadi, beleyum binalajanji'mo ka' sinitujuanmo nu beleyum montuluti palentah-ngku aijo', kabai mosia o?

⁴³Panyo uuka aiya kadaka' beleyum nombaleko'imo palajanjian nu beleyum aijo' ka' madi'mo nohongo-hongo palentah-ngku?

⁴⁴Nusumbu' totu-totu'u na ka'idekan nu beleyum iwi-iwi' hi tuumangku. Kalana aijo', Tumpu mohukummo beleyum,

⁴⁵panyo' aku nu balakati nu Tumpu ka' kalaja'an nu tuumangku sabole-bole ahi' nu balakati sampe toka sidu-sidutu'.”

⁴⁶Noko taloakon aijo', i tomundo' nompalentahmo i Benaya, lantas nambamo na i Benaya nompatei i Simei. Uuka aiya me samata-mata i Salomo na mongkuasai kalaja'annyo.