Read Saluan 1 TOMU-TOMUNDO' 20 Bible Online

1 TOMU-TOMUNDO' 20 - Saluan bible

1 TOMU-TOMUNDO' 20

¹Daagi' kinosansinaan i Benhadad, tomundo' nu Siria nomposihukmo suludadunyo iwi-iwi', tiba aha 32 na tomundo' sangga'at ka' kereta anu bau pahampate, ka' kuda nu aha, lantas tinumbuhannyomo na kota Samaria.

²Lantas ia nonsaimo mian namba hi Ahab, tomundo' nu Israel, i kota aijo' ka' pinotuunnyomo sumo uuka,

³“I Tomundo' Benhadad sabole-bole momoita da nu bee' hi ia na mosoni', salaka, to bengke-bengkele' nu beleyum, ka' to ana-anak nu beleyum anu toto hoso-hoson.”

⁴I Ahab nontaami, “Poto'i hi Tomundo' Benhadad, aku situjumo. Ia timbali mongala aku ka' iwi-iwi' apaa na anu daagi' hi belengku.”

⁵Lapas aijo' aha anu sinainyo aijo' po'ule' mule' ninsusule' hi Ahab mompoto'i apa-apaa na anu nu poita mule' sangga'at i Benhadad. Sumo uuka na koonyo anu pinoitanyo mae aijo', “U'utu mae tomundo' mami sabole-bolemo nontuntut da belento mombee' hi ia mosoni' ka' salaka ka' to bengke-bengkele' nu belento ka' to ana-anak nu belento.

⁶Panyo' uuka ia nonsaimo mae to sulu-suludadunyo anu toto tangka-tangkas na pangkatnyo tokamo mae mompoliba'i laigan nu belento tomundo' ka' mongala apa-apa na anu ko angga'nyo ka' laigan nu to mia-mian anu ko pangkatnyo mongala apa-apaa na anu ko angga'nyo hi aha. Aha toka mae mo'uka dodop sumo sinaa uuka aiya.”

⁷Sahingga i Tomundo' Ahab nolagamo iwi-iwi' na polaya' nu Israel ka' pinoto'inyomo, “Belemiu nonsakisimo mian haha aiya, ia ko kahanda' mompatei kita. Aha sabole-bole montuntut da ku bee'mo na to bengke-bengkele'ku, ka' to ana-anaku tiba mosoni' ka' salakangku, ka' aku sabole-bolemo mombee' apaa na anu pinoto'inyomo mae aijo'.”

⁸To pola-polaya' ka' mian da'isan notatae, “Boli mompajuli ia, Tomundo'! Boli montuluti pongka'oho'nyo.”

⁹Mokonyo' aijo' tinaaman i Ahab na aha anu sinai mae i Benhadad haha aijo' sumo uuka, “Poto'i hi Tomundo', tomundo' nu belemiu ititina' apaa na anu pinoitanyo momona ku situjuimo.” Sahingga nambamo na aha anu sinai mae aijo', ka' lapas aitu po'ule' mule' aha ninsusule' hi Ahab ka' pinoto'inyo.

¹⁰“Tomundo' mami nonsaimo mae suludadu manjoo' hondo toka mae mongidei kota nu belemiu, sahingga abu nu kota anu motoyo'mo aijo' me sangkakup na nukakup nu aha ka' nu boa nu aha. Ia binasumpa'mo da nu hukum nu to pilo-pilogot, ka' nu patei na ia, de han aijo' madi' nu bau!”

¹¹Tinaaman i tomundo' Ahab, “Poto'i hi Romundo' Benhadad; Suludadu anu talakana', lapasje na mahampate ka' mongoa'i sanang misa' ma'isa mahampate polo'mo sanang.”

¹²Apaa na anu pinontaami i Ahab aijo' pinotokakonmo hi Benhadad tempo'nyo ia gombu-gombu tiba to tomu-tomundo' sangga'at anu mongsangaja'i ia hau-haunyo lewa batawa na aha i kemah. Salatan nohongo aijo', i Benhadad nompalentahmo to sulu-suludadunyo anu toto tangka-tangkas na pangkatnyo da mosadiamo montumbuhi kota Samaria. Sahingga aha nosadiamo.

¹³Tempo'nyo aitu nambamo na nabi samian hi Tomundo' Ahab ka' pinoto'inyomo, “Koonyo nu Tumpu: 'Tinoamo nu belento na konjoo'nyo nu suludadu haha aijo'? Ku bee'imo kauntungan na Belento mahampate mongewa aha sinaa aiya. Atina'je ka' nu nusumbu' taalu' Akumo aiya na Tumpu.’ ”

¹⁴“Ihe pe'e na momona montumbuhi, na koonyo i Ahab?” Tinaaman nu nabi aijo' “To sulu-suludadu anu toto oli-olitau, aha na anu monsangalui to kapa-kapala da'erah. Sumo aijo' na koonyo nu Tumpu.” “Lantas ihe na anu mongkapalai de montumbuhimo?” na koonyo i tomundo' mule'. “Belento Tomundo',” na koonyo nu nabi aijo'.

¹⁵Sahingga i tomundo' nontipaha'imo to sulu-suludadu anu daagi' to oli-olitau na monsagalui to kapa-kapala da'erah. Iwi-iwi' aha 232 na suludadu. Lapas aijo' binaunyo mule' sumo aijo' na suludadu nu Israel. Iwi-iwi' aha 7.000 na mian.

¹⁶Nontumbuhi tinampu'unan sina-sinaa tempo'nyo i Benhadad ka' 32 na tomundo' anu nonsangaja' tiba ia aijo' hau-haunyo lewa' batawa' sampe aha nalangu i kemah nu aha.

¹⁷Anu namba momona suludadu anu toto oli-olitau haha aijo'. To mia-mian anu sinai i Benhadad namba mondoyoni sampo bali', nompoto'imo hi Benhadad tukoonyo nu aha sanggombu na suludadu nompoukaimo mae aha, aha lengkat mae i sasu Samaria.

¹⁸I Benhadad nompalentahmo da suludadu nu sampo bali' haha aijo' o hakop boli opatei, pa'aha mamba mae mompahampateakon kabai toka mae da simpiamo.

¹⁹To sulu-suludadu anu toto oli-olitau haha aijo' pipinalentahmo mae i tomundo' Ahab aijo' nontampu'unimo mae nontumbuhi lengkat i Samaria, hingga-hinggat tiba suludadu nu Israel.

²⁰Aha toto samian bubu'mo nompatei sampo bali'nyo anu ingahopannyomo. To mia-mian nu Siria nopalaimo, aha iloloi'mo nu mian Israel. Panyo' i Benhadad madi' pinoko ala nu aha pinatean. Ia nopalaimo nonsake'i ajahan sinangaluan nu suludadu pa' aha sangkuka nonsake'i ajahan.

²¹I Tomundo' Ahab suele nambamo nahampate lantas nohansuni iwi-iwi' na kareta anu pinake nu sampo bali' nahampate ka' nompateimo kudanyo iwi-iwi'. Sinaa aitu mian nu Siria pinatundu'mo ka' manjoo' hondo na kalugia'an.

²²Lapas aitu nabi ai-aijo' tinokamo hi Ahab ka' notatae “Uuka aiya, sahanyo kita tuan pinsusule'mo ka' montoukai kahosonan ka' balatanga' ma'i-ma'ima, kalana tomundo' nu Siria po'ule'mo toka mae montumbuhi de pimbuhakanmo mule' nu kau' anu aiya mae o ahopi.”

²³Suludadu i Tomundo' Benhadad anu toto tangka-tangkas na pangkatnyo nompoto'imo hi Benhadad, “To pilo-pilogot anu nu sombah nu bansa Israel balakuasa' aita' mae i bungkutnyo, mokonyo' aijo' kita pinatundu'mo nu bansa aijo'. Panyo' timbali opoko hungku'into na aha de kita mahampate i hatanyo.

²⁴Sahanyo uuka aiya aha to tomu-tomundo' anu 32 aijo' obolosimo nu posi to sulu-suludadu nu belento Tomundo' anu toto tangka-tangkas na pangkatnyo.

²⁵Ka' mule' gombuan nu suludadu anu oposadia nu belento sumo konjoo'nyo nu suludadu anu pinatundu'mo nu aha aijo', ka' mule' ajahan ka' kareta anu opake mahampate konjoo'nyo sumo anu pinosadiamo u'utu mae momona. Kita mompahampateakonmo bansa Israel haha aijo' i hatanyo, ka' uuka kita memang untungmo, na mahampate.” I Tomundo' Benhadad sinitujumo, lantas i hongo-hongonyomo na pokinde' nu to sulu-suludadunyo anu toto tangka-tangkas na pangkatnyo aijo'.

²⁶Tinoka i lonunyo, tempo'nyo kau' nimbuhakmo, ia nompalentahmo suludadunyo da mambamo i kota Afek montumbuhimo mian nu Israel.

²⁷Mian nu Israel suele nomposadiamo suludadunyo ka' pinalentahmo nu aha. Lantas suludadu nu Israel haha aijo' nambamo binagi ohua' na gombuan nu suludadu ka' binakemahmo mompaha ahop tiba to mia-mian nu Siria haha aijo' De opokakanakon tiba suludadu nu Siria anu binagi-bagimo nonsongkohi da'erah aijo', paya' na gombuan nu Israel otoa la sumo ohua' na gombuan nu mee'.

²⁸Lantas tinokamo na nabi samian hi Tomundo' Ahab ka' nompoto'i, “Sumo uuka na pinoto'i mae nu Tumpu: 'Kalana mian nu Siria haha aijo' monsangka tukoonyo Aku ola mongkuasai bungkutnyo panyo' hatanyo madi', jadi Ku po'untungmo na belemiu mahampate mongewa suludadu nu aha anu talalo hondo manjoo'. Beleyum ka' mian anu nu palentah monsumbu'je taalu' Akumo na Tumpu.’ ”

²⁹Pinitun sinaa na kinopinnyo na mian nu Siria ka' mian nu Israel jinojoong i kemah nu aha mompaha ahop. Tinoka i sinaa kino ipitunnyomo aha nontampu'unimo nahampate. Aha nahampate aijo' mian nu Israel nompateimo 100.000 na mian nu Siria.

³⁰Aha anu madi' sinilaka nopalaimo namba i kota Afek panyo' pagan mesen nu kota aijo' nohobo' sahingga nongutuni mo aha 27.000 na mian nu aha Siria. I Benhadd mule' nompala'imo namba i kota aijo' ka' naninsulukmo i sa'angu' na laigan i salipi'nyo sasu unonyo.

³¹To sulu-suludadu anu toto tangka-tangkas na pangkatnyo tinokamo hi ia ka' nompoto'i, “Koonyo nu mian, to tomu-tomundo' nu Israel, aha aijo' to tomu-tomundo' anu kokalibosan hi sangko mian. Kalana aijo', pobee' mae na kami mamba mangadap hi tomundo' Israel mompusok baju' kalung salaku tanda nompele-pele'mo ka' kahohon i gogohong salaku tanda nabuhukmo. O'amalakon da ia madi' mompatei belento Tomundo'.”

³²Sahingga aha nompusokmo baju' kalung ka' kahohon i gogohong nu aha, lantas nambamo nangadap hi Ahab ka' notatae, “I Benhadad posaihon nu belento Tomundo'. Ia mongkakase da belento Tomundo' boli mompatei ia.” Tinaaan i Ahab, “Daagi' tutuu' na ia, utusku kiijo'?”

³³Memang to sulu-suludadu i Benhadad anu toto tangka-tangkas na pangkatnyo kiijo' hau-haunyo montanda'i tanda anu ma'ima' lengkat hi Ahab. Jadi, salatan tinaloakon i Ahab “Utus”, balomo tinaaman nu aha, “Totu'u, i Benhadad memang utus nu belento Tomundo'.” Lantas notataemo na i Ahab, “Boakon mae na ia mo'uuka!” Salatan i Benhadad aijo' tinokamo, ingindeanmo i Ahab na ia da maninsake' i kareta.

³⁴Lantas notataemo na i Benhadad hi ia, “Ku sule' akonmo hi belento Tuan na kota iwi-iwi' anu i ngalamo nu tuumangku hi tuuma nu belento Tuan. Belento Tuan timbalimo ahi mombau puso nu badagangan i kota Damsyik susumo anu binaumo nu tuumangku kiijo' i Samaria.” Tinaaman i Ahab, “Kalana nojanji'mo na belento Tuan sumo itina', sahingga ku pobebasmo na belento Tuan.” Lapas aijo' nombaumo palajanjian na i Ahab tiba i Benhadad lantas pinobebasnyomo na ia.

³⁵Daagi' ko nabi pa' aha sangkuka na konjoo'nyo, samian na nabi pinalentahmo nu Tumpu da motatae hi sangko nabinyo, doke mae na ia sangalunyo aijo'. Panyo sangalunyo aijo' madi' ahi' mondoke sangko nabinyo aijo'.

³⁶ Lantas pinoto'imo nu nabi aijo', “Kalana beleyum madi' montuluti palentah nu Tumpu beleyum nusa'umo nu singa de beleyum minsusule'mo lengkat i aiya.” Totu'u madi' sala', salatan ia ninsusule'mo lengkat i kiijo', sa'angu' na singa labotmo nonsa'u ia.

³⁷Lapas aitu nabi aijo' nambamo hi mian sangga'at ka' notatae, “Doke mae na aku!” Sahingga dinokemo nu mian aijo' nahoson hondo ampe binelaon.

³⁸Lapas aijo' nombobodimo ohup nyo nu hude, da madi' nusumbu' nu mian, lantas ia nambamo tinuminjo i sohipi' nu jalan montanda'i tomundo' nu Israel motulu.

³⁹Salatan i Tomundo' notulumo, nabi aijo' notataemo hi ia, “Belento Anu Opopodaka', tempo'nyo aku hau-haunyo nahampate i pahampatean, samian na suludadu nomboa mae hi belengku samian na sampo bali' anu i hakop. Notatae na suludadu aijo', 'Ojagai ima-ima' na mian aiya. De ia malai, beleyum tionyo opatei bau pontokong ia, kabai mombayan 3.000 na doi salaka'.'

⁴⁰Panyo salatan aku sinibukmo mian aijo' nalaimo.” Tinaaman i Tomundo', “Beleyum nosi hukummo posi butong nu beleyum tionyo ahi' nu tanggungmo.”

⁴¹Nabi aijo' nombukaimo hude pinombobodi ohupnyo, ka' tomundo' aijo' nonsumbu'je taalu' samian na nabi.

⁴²Sahingga notataemo na nabi aijo' hi tomundo', “Aiyamo na anu tinaloakonmo nu Tumpu: 'Mian anu pinalentah-ngKumo da opatei ola pinojohok da malai. Kalana aitu tionyo ahi' beleyum mate da bau pontokong Suludadu nu beleyum timbali mohopu' kalana nompopilayamo suludadu nu sampo bali' nalaimo.’ ”

⁴³I Tomundo' ninsusule'mo namba i Samaria ka'kinyonyoanyo nompele-pele'mo ka' pinusamo.