Read Saluan 1 TOMU-TOMUNDO' 3 Bible Online

1 TOMU-TOMUNDO' 3 - Saluan bible

1 TOMU-TOMUNDO' 3

¹I tomundo' nosangaja'mo tiba Mesir kalana ia nongka'ima'imo langkoyang nu tomundo' Mesir. Langkoyang aijo' binoamo i Salomo i kota Daud da jojoongmo kiijo' mae sampe timbalimo na laigan nu Tomundo' ka' laigan nu Tumpu tiba benteng titikup Yerusalem opoko baumo.

²Kalana ma'isa binau na laigan nu Tumpu tempo'nyo aitu mian da'isan daagi' monsombahkon koloban iayaya mae na tampat.

³I Salomo mongkalibosi Tumpu ka' mombatuki iwi-iwi' na pokinde' nu tuumanyo panyo' ia daagi' mongkolot ka' monsombahkon binatang iyaya mae na tampat.

⁴Tampat ponsomban anu talalo hondo talasanggo kiijo' mae i Gibeon. Toto monsan i Salomo monsombahkon koloban kiijo' mae daagi' kino sansinaan, susumo anu saja'mo nu bau, ia po'ule' namba.

⁵Pihi-pihi aitu Tumpu nanintoamo mule' hi ia i uno nu ipion ka' notatae, “O Salomo, poita mae pa'apa na anu nu ka'ima'i, aijo' da Ku bee'mo hi beleyum!”

⁶Tinaaman i Salomo, “O Tumpu, Belento nompotoamo mae taalu' totu-totu'u ahi' na Belento mongkalibosi tuumangku i Daud, posaihon nu Belento aijo'. Ia ma'ima' ka' hodi' na kinyonyoanyo, ka' montuluti hondo Belento, Ka' salaku pombalosi nu Belento taalu' belento saja' ahi' mongkalibosi ia, belento nombee'imo ia samian na anak mo'ane anu tempo' uuka aiya nompalentahmo nombolosakon ia.

⁷O Tumpu Allah-ngku Belento nohangkatmo aku binau tomundo', nombolosakon tuumangku, mau mule' aku ma'isa talalo motu'a ka' ma'isa monsumbu' pa' mosia na mompalentah.

⁸Aku jinojoongmo hinggat-hinggat tiba bansa anu pinile'antomo nu Belento timbal mian anu palesayamo. Aha sa'angu' na bansa anu daka' anu madi' opoko lekeng na konjoo'nyo.

⁹Kalana aijo' Tumpu bee'iakon mae kapandean anu ku pake mompalentah mian anu pinalesayamo hi Belento aiya ka' adin ka' mule' timbali monsumbu' iya na anu ma'ima' ka' iya na anu ma'idek. De madi' sumo aitu tantu aku madi' moko ala mompalentah mian anu pinalesayamo hi Belento ka' daka' aiya?”

¹⁰Tumpu nonsitujuimo apaa na anu pinoitamo i Salomo aijo'

¹¹ka' notataemo hi ia, “Kalana beleyum mompoita kapandean da adin na mompalentah ka' misa' da tuu'an na umun kabai kaya na beleyum kabai mate na sampo bali' nu beleyum iwi-iwi',

¹²jadi apaa na anu pinoita nu beleyum aijo' Ku ganapimo. Ku potimbalije na beleyum da lebe pande ka' lebe monsumbu' apaa-apaa molingkudui mian iwi-iwi', mau tempo' anu i hikuhakonmo, kabai tempo' anu aiya mae anu o ahopi.

¹³Ka' mule' anu madi' pinoita nu beleyum suele Ku bee'mo hi beleyum: i uno nu kantumuu'an nu beleyum kayamo ka' o angga'i molingkudui tomundo' sangga'at mau mule' iyaya mae.

¹⁴Ka' de beleyum sumo tuuma nu beleyum i Daud, montuluti Aku ka' mombatuki atulan-Ku iwi-iwi', Ku bee'i na beleyum tuumu' mantan na umun.”

¹⁵Salatan nobulamo, sininsumbu'mo na i Salomo taalu' Tumpu Allah binasisikmo hi ia i uno nu ipion. Sahingga ia ninsusule'mo i Yerusalem ka' tinuminjomo i ahop nu peti' palajanjian nu Tumpu ka' nonsombahkon koloban anu opotunu tiba koloban paladamean lapas aijo' ia nombaumo baubauon ka' ilaganyo na to mia-mian anu ko pangkatnyo.

¹⁶Daagi' kino sansinaan, ua'aha na boune anu saja'masala' tinokamo nangadap hi Tomundo' Salomo.

¹⁷Sala'samian na aha ua' aha aijo', samian na notatae, “Kita Mian Daka' Anu talasanggo, aku ka' boune aiya jinojoong salaigan. Madi' ko mian sangga'at anu jojoong tiba kami. Ma'isa pinin uuka, aku nohampeakonmo samian na anak mo'ane. Ola inguan sinaa suele boune aiya nohampeakonmo suele anak mo'ane.

¹⁹Daagi' kino sanpahuan tempo'nyo kami i hoyotmo, boune aiya madi' nontotonggolakon nongutuni mo bunga mea'nyo, sahingga anaknyo aijo' sinilakamo.

²⁰Tonga' pahu hau-haunyo aku i hoyotmo ia nobulamo lantas nongalamo bunga mea'ku aya i sohipi'ku. Bunga mea'ku aijo' pinomale'nyomo i kahoyotannyo, ka' bunga mea'nyo anu sinilakamo aijo' pinomale'nyomo i kahoyotanku.

²¹Dodo-dodopnyo subu-subuh salatan aku nobulamo ka' kahanda'mo momposusu bunga mea'ku aijo', tinoangku ia sinilakamo. Salatan saja'mo i nasahanku, sinumbu'kuje taalu' ia misa' ahi bunga mea'ku.”

²²“Madi' totu'u!” na koonyo nu boune sangga'at aijo', “Anu tutuu' aiya na bunga mea'ku, anu sinilakamo aijo na bunga mea' nu beleyum.” “Madi'!” na koonyo nu boune anu momona aijo', “Anu sinilakamo na bunga mea' nu beleyum, anu tutuu' aiya na bunga mea'ku!” Sumo aijo' na aha lewa'mo pinainggaga hi ahop i tomundo'.

²³Lantas notataemo na i Tomundo' Salomo, “Beleyum toto samian mongakui bunga mea' anu daagi' tutuu' aiya na anak nu beleyum ka' misa' anu sinilakamo aijo'.”

²⁴Noko potatae sumo aijo', i tomundo' nompalentahmo mian da mongala mae bajak.

²⁵Lapas aijo' pinalentahmo i tomundo', “Kolongmo ohua' na bunga mea' anu daagi' tutuu' aijo' ka' toto samian na boune haha aijo' obee'i toto sangkolongan.”

²⁶Salatan nohongomo palentah aijo', tinanyo ahi' anu totu-totu'u nu anak aijo' notataemo, “Ampun kita Tomundo' boli opatei na anak aijo'. Sahanyo bee'mo hi ia.” Tina nu anak aijo' notatae sumo aijo' kalana ia mongkalibosi hondo anaknyo. Panyo' boune sangga'at aijo' notatae, “Ii', sahanyo kolongmo, da kami mau samian madi' mohumpak!”

²⁷Lantas notataemo na i Salomo, “Boli opatei na bunga mea' aijo'! Bee'mo hi boune anu momona aijo' ia na tinanyo.”

²⁸Salatan bansa Israel nohongomo i Salomo nomputusi palakala aijo', aha nompuji'mo ka' nompopodaka'mo ia kalana inyata'mo taalu' Tumpu Allah nombee'imo kapandean hi ia ka' saja' adin na momputusi.